कोकणची बातमी

अवकाळी पावसाच्या संकटातही ग्रामस्थांचा उत्स्फूर्त सहभाग; १२३ रुग्णांची तपासणी राजापूर : सामाजिक न्याय व विशेष सहाय्य विभाग, महाराष्ट्र शासन, सहाय्यक आयुक्त समाज कल्याण कार्यालय रत्नागिरी आणि श्रीकृष्ण महिला बालकल्याण व अपंग पुनर्वसन मंडळ यांच्या संयुक्त विद्यमाने राजापूर तालुक्यातील मोरोशी गावात आरोग्य तपासणी शिबिर उत्साहात पार पडले. अवकाळी पाऊस, जोरदार वारे आणि त्यामुळे गावातील वीज, पाणी तसेच दळणवळण व्यवस्था विस्कळीत झालेली असतानाही ग्रामस्थांनी मोठ्या उत्साहाने शिबिरात सहभाग नोंदवला. गावातील अनेक ठिकाणी वीज खांब कोसळून नुकसान झाले होते. अशा प्रतिकूल परिस्थितीतही शिबिर यशस्वीरीत्या पार पडल्याने ग्रामस्थांनी समाधान व्यक्त केले. शिबिरामध्ये एकूण १२३ रुग्णांची आरोग्य तपासणी करण्यात आली. काही रुग्णांची पुढील शस्त्रक्रियेसाठी निवड करण्यात आली असून योगा शिबिरालाही उत्स्फूर्त प्रतिसाद मिळाला. विविध स्पर्धा आणि कार्यक्रमांचे आयोजनही करण्यात आले. या शिबिरासाठी श्री स्वामी समर्थ रुग्णालय, लांजा येथील डॉ. सुहास खानविलकर आणि त्यांची टीम तसेच श्री स्वामी समर्थ नेत्र रुग्णालयाचे डॉ. सुहास देसाई आणि त्यांच्या टीमने विशेष सहकार्य केले. ग्रामस्थांनी सर्व वैद्यकीय पथकांचे आभार मानले. शिबिराचे नियोजन शशिकांत चव्हाण यांनी केले. यावेळी बोलताना त्यांनी “रुग्णसेवा हीच ईश्वर सेवा” असल्याचे सांगत मोरोशी गावात दरवर्षी मोफत आरोग्य तपासणी शिबिर आयोजित करण्याचा मानस व्यक्त केला. या प्रसंगी श्री गुंडीबाई चॅरिटेबल ट्रस्टचे मुख्य विश्वस्त प्रकाश सुमती मोतीराम कानडे, विश्वस्त दिलीप कानडे, काशिनाथ केसरकर, रविंद्र कानडे, नामदेव कानडे, माजी सरपंच राजेश कानडे, अॅड. श्रीरंग कानडे, आत्माराम नारकर, पुंडलिक कानडे, गुणाजी कानडे, रमेश कानडे यांच्यासह ग्रामस्थ मोठ्या संख्येने उपस्थित होते.

शेतकरी-बागायतदारांच्या तीव्र विरोधानंतर प्रशासनाचा निर्णय रत्नागिरी, दि. १२ : नाणार आणि परिसरातील प्रस्तावित बॉक्साईट उत्खनन प्रकल्पाविरोधात स्थानिक शेतकरी व आंबा बागायतदारांनी तीव्र विरोध दर्शवल्यानंतर या प्रकल्पाची जनसुनावणी रद्द करण्याचा निर्णय प्रशासनाने घेतला आहे. पालकमंत्री डॉ. उदय सामंत यांच्या अध्यक्षतेखाली जिल्हाधिकारी कार्यालयात झालेल्या बैठकीत हा निर्णय घेण्यात आला. बैठकीला आमदार किरण सामंत, जिल्हाधिकारी मनुज जिंदल, निवासी उपजिल्हाधिकारी चंद्रकांत सूर्यवंशी, प्रांताधिकारी जीवन देसाई, माजी नगराध्यक्ष बंड्या साळवी यांच्यासह नाणार परिसरातील शेतकरी व बागायतदार उपस्थित होते. यावेळी बोलताना पालकमंत्री डॉ. सामंत यांनी सांगितले की, “नाणार बॉक्साईट प्रकल्पाबाबत स्थानिक लोकांची भूमिका हीच आमची भूमिका आहे. जवळपास १०० टक्के खातेदारांनी जिल्हाधिकाऱ्यांकडे विरोधाची पत्रे दिली आहेत. अशा परिस्थितीत लोकांवर कोणताही प्रकल्प लादला जाऊ नये.” राजापूर पंचायत समितीनेही एकमताने जनसुनावणी रद्द करण्याचा ठराव मंजूर केला होता. त्यानुसार प्रशासनाने सुनावणीला स्थगिती देण्याचा निर्णय घेतला असून पावसाळ्यानंतर पुन्हा लोकप्रतिनिधी, नागरिक आणि शासन स्तरावर चर्चा केली जाणार असल्याचे त्यांनी स्पष्ट केले. कॅनिंगसाठी हापूसला ५० रुपये किलो दर दरम्यान, जीआय मानांकन प्राप्त रत्नागिरी व देवगड हापूस आंब्याच्या कॅनिंग दराबाबतही बैठकीत महत्त्वाचा निर्णय घेण्यात आला. एक्स्टॅसिक कॅनिंग कंपनीने आंबा बागायतदारांना प्रतिकिलो ५० रुपये दर देण्यास सहमती दर्शविली. तसेच “रत्नागिरी हापूस” किंवा “देवगड हापूस” नावाने कर्नाटकातील आंब्यांची विक्री होत असल्यास त्यावर कठोर कारवाई करण्याचे निर्देश पालकमंत्री डॉ. सामंत यांनी दिले. यासाठी अतिरिक्त पोलीस अधीक्षक यांच्या अध्यक्षतेखाली विशेष समिती स्थापन करण्यात येणार आहे. समितीत पोलीस, कृषी अधिकारी आणि तालुका कृषी अधिकारी यांचा समावेश असेल. संशयित आंबा वाहतूक करणाऱ्या गाड्यांवर कारवाई करून त्या सील करण्याच्या सूचनाही देण्यात आल्या आहेत. रत्नागिरीत ‘सारथी’चे विभागीय कार्यालय सुरू होणार सारथी संस्थेचे विभागीय कार्यालय रत्नागिरी येथे सुरू करण्याबाबत सकारात्मक प्रस्ताव शासनाकडे पाठविण्यात येणार असल्याची माहितीही बैठकीत देण्यात आली. तसेच सारथीशी संबंधित विद्यार्थ्यांसाठी ऑनलाईन प्रशिक्षण सुविधा सुरू करण्याच्या सूचनाही करण्यात आल्या.

जनजागृतीसाठी जर्नालिस्ट असोसिएशनचा पुढाकार पिंपळी ग्रामपंचायत कार्यालयात जनजागृती कार्यशाळा उत्साहात चिपळूण : माझं गाव आरोग्य संपन्न गाव या शासनाच्या महत्त्वाकांक्षी अभियानासाठी जर्नालिस्ट असोसिएशन चिपळूणने जनजागृती कार्यशाळा आयोजित करून पुढाकार घेतल्याबद्दल जिल्हा परिषदेचे माजी आरोग्य सभापती तथा विद्यमान पंचायत समिती सदस्य विनोद झगडे यांनी कौतुक केले. ही योजना केवळ बक्षीसापुरती मर्यादित न राहता ती लोकचळवळ बनली पाहिजे. लोकप्रतिनिधी, पत्रकार, नागरिक आणि आरोग्य विभाग यांनी एकत्रितपणे काम केल्यास चिपळूण तालुका या अभियानात निश्चितच सरस ठरेल, असा विश्वास त्यांनी व्यक्त केला. प्राथमिक आरोग्य केंद्र दादर आणि जर्नालिस्ट असोसिएशन चिपळूण यांच्या संयुक्त विद्यमाने पिंपळी ग्रामपंचायत कार्यालयात माझं गाव आरोग्य संपन्न गाव, अभियानाच्या जनजागृतीसाठी आयोजित कार्यशाळेत ते बोलत होते. कार्यक्रमास कामथे उपजिल्हा रुग्णालयाच्या स्त्रीरोग तज्ज्ञ डॉ. कांचन मदार, जर्नालिस्ट असोसिएशन चिपळूणचे अध्यक्ष सुनील साळवी, कार्याध्यक्ष सतीश कदम, पंचायत समिती सदस्य सुप्रिया देवरुखकर, सरपंच अंजली जांभुर्गे, दादर प्राथमिक आरोग्य केंद्राच्या समुदाय आरोग्य अधिकारी प्रज्ञा यादव, जिजाऊ ब्रिगेडच्या मिलन गुरव, ग्रामपंचायत सदस्य रवींद्र सागवेकर, वैद्यकीय अधिकारी डॉ. सुधा गुंजाळ, माजी सरपंच मीनाक्षी कोठारे, तंटामुक्त समिती अध्यक्षा सुषमा कोठारे, पोलीस पाटील दिपाली बाबर, ग्रामसेवक श्री. कदम, आरोग्य सहाय्यक अभिजित यादव, राजेंद्र मोलाज आदी मान्यवर उपस्थित होते. यावेळी ज्येष्ठ पत्रकार, अध्यक्ष सुनील साळवी, कार्याध्यक्ष सतीश कदम, ज्येष्ठ पत्रकार मकरंद भागवत, सरपंच अंजली जांभुर्गे आणि डॉ. सुधा गुंजाळ यांनी उपस्थितांना मार्गदर्शन केले. डॉ. कांचन मदार यांनी माझं गाव आरोग्य संपन्न गाव अभियानाची पंचसूत्री सांगताना स्वच्छता, शुद्ध पाणी, वैयक्तिक आरोग्याची काळजी आणि प्रतिबंधात्मक आरोग्य यांचे महत्त्व पटवून दिले. प्रिव्हेन्शन इज बेटर दॅन क्युअर, असे सांगत त्यांनी प्रत्येकाने आपल्या गावाला आरोग्यदृष्ट्या सक्षम बनवण्यासाठी पुढाकार घ्यावा, असे आवाहन केले. माझा आरोग्य मी चांगले राखेन, अशा आशयाची शपतही त्यांनी उपस्थित त्यांना दिली. विनोद झगडे यांनी अभियान लोकांपर्यंत प्रभावीपणे पोहोचवण्यासाठी सर्वांनी एकत्रितपणे प्रयत्न करण्याची गरज व्यक्त केली. आपल्या गावाला या अभियानात पुरस्कार मिळवून देण्यासाठी सर्वांनी जबाबदारीने काम करावे, असे आवाहन त्यांनी केले. कार्यक्रमाचे सूत्रसंचालन योगेश बांडागळे यांनी केले, तर आभार संतोष पिलके यांनी मानले. कार्यशाळेला पत्रकार ललेश कदम, ओंकार रेळेकर यांच्यासह आरोग्य विभागाचे कर्मचारी, आशा सेविका, ग्रामस्थ आणि पत्रकार मोठ्या संख्येने उपस्थित होते.

सायकल चालवण्याचे अनेक फायदे आहेत. सायकल संस्कृती वाढावी व सायकलबद्दल आवड निर्माण व्हावी या हेतूने दापोली सायकलिंग क्लबतर्फे आयोजित दापोली समर सायक्लोथॉन २०२६, सिझन ९ सायकल स्पर्धा ९ व १० मे २०२६ रोजी उत्साहात संपन्न झाली. यामध्ये स्थानिक आणि इतर जिल्ह्यातून आलेले वय ६ ते ६५ वयोगटातील १००+ स्पर्धक सहभागी झाले होते. दापोली आसूद सालदुरे पाळंदे आंजर्ले अडखळ पाजपंढरी हर्णै दापोली या समुद्रकिनाऱ्यावरील ५० किमी मार्गावर कोकणातील निसर्ग सौंदर्य अनुभवत सर्वांनी सायकल चालवली. मार्गावर असलेल्या अनेक पर्यटन ठिकाणांना भेटी दिल्या, कोकणी खाद्यपदार्थ, मासे, आंबे, फणस, काजू कोकणी रानमेवा इत्यादींचा आस्वाद घेतला. ही सायक्लोथॉन स्पर्धा ५० किमी कोस्टल सिनिक रुट, शॉर्ट सिटी लूप, फॅन राईड अशा अनेक गटात झाली. सर्व स्पर्धकांना मेडल आणि प्रमाणपत्र देऊन गौरवण्यात आले. शॉर्ट सिटी लूप मार्गावर ठराविक वेळात जास्तीच जास्त अंतर सायकल चालवण्याचे आव्हान होते. या मार्गावर आयुष शिंदे यांने १००+ किमी, स्वराज राजपूरकर, हेरंब लोंढे यांनी ८०+ किमी, अर्जुन धारसकर, सुनील शिंदे यांनी ७०+ किमी, रुद्र बडबे, श्रीराम शिंदे, मेघराज कळमकर, अश्विन गोविलकर इत्यादींनी ५०+ किमी सायकल चालवली. या सायक्लोथॉन मध्ये शॉर्ट सिटी लूप राईड पूर्ण करणारा ६ वर्षीय राजवीर कुटरेकर हा सर्वात लहान सायकलस्वार ठरला. सायक्लोथॉनसाठी दापोली शिक्षण संस्था, दापोली तालुका आरोग्य अधिकारी व टीम, दापोली पोलीस टीम, मेनेकी अब्सुलूट एनर्जी ड्रिंक, राहुल मंडलिक इत्यादी अनेकांचे सहकार्य लाभले. या सायक्लोथॉन स्पर्धेचे नियोजन करण्यात अंबरीश गुरव, प्रशांत पालवणकर, राजेशकुमार कदम, रागिणी रिसबूड, राजेंद्र नाचरे, नितीन बर्वे इत्यादी अनेकांनी मोलाची भूमिका बजावली.

कोलाड ११ मे (शरद जाधव) रायगड च्या भूमित छत्रपती शिवाजी महाराजांचा राज्याभिषेक झालेली ही पवित्र भूमी आहे .स्वराज्याला पहिला राजा देणारी भूमी असल्यामुळे आज प्रत्येक मराठी माणसाला प्रेरणा व अस्मिता येथून मिळत आहे.याच रायगड जिल्ह्यामध्ये भारतरत्न डॉक्टर बाबासाहेब आंबेडकरांनी महाडचा चवदार तळ्याचा सत्याग्रह केला .आणि सामाजिक समतेचा एक नवा इतिहास लिहिला.यंदा त्याचा शताब्दी वर्षाने आपल्या सगळ्यांना माहिती आहे. समता स्वाभिमान सामाजिक न्यायाचा संदेश देणाऱ्या या महामानवाला मी मनापासून विनम्र अभिवादन करते.कोकण म्हणजे साक्षात देवभूमी निसर्गाने भरभरून दान दिलेली ही भूमी आणि कष्टाळू माणसाने घडलेली भूमी आहे .आदरणीय दादांचं कोकणावर जास्त प्रेम होतंरोहा अष्टमी नगरपरिषदेच्या विविध विकासकामांचे भूमिपूजन उपमुख्यमंत्री सुनेत्रा अजित पवार यांच्या हस्ते उत्साहात पार पडल्यानंतर डॉ. सी डी देशमुख शहर सभागृहात आयोजित सभेस उपस्थित जनसमुदास मार्गदर्शन करताना त्या बोलत होत्या. यावेळी रोहा शहराच्या विकासासाठी हाती घेतलेल्या प्रकल्पांमुळे शहराच्या प्रगतीला नवे बळ मिळणार असल्याचा विश्वास उपमुख्यमंत्री यांनी व्यक्त करत . आज ज्या विकासकामांचे भूमिपूजन करण्यात आले, ती केवळ बांधकामे नसून रोह्याच्या सर्वांगीण विकासाचा मजबूत पाया आहेत असे सांगितले. या कार्यक्रमाला खासदार सुनील तटकरे, महिला व बालविकास मंत्री अदिती तटकरे, माजी आमदार अनिकेत तटकरे, मुश्ताक अंतुले, स्नेहल जगताप, जिल्हाधिकारी किशन जावळे, जिल्हा पोलीस अधीक्षक आंचल दलाल, रायगड जिल्हा परिषद उपाध्यक्ष मधुकर पाटील, पंचायत समिती सभापती विजया पाशिलकर, रोहा अष्टमी नगरपरिषद नगराध्यक्षा वनश्री समीर शेडगे, मुरुड नगरपरिषद नगराध्यक्षा आराधना दांडेकर, राष्ट्रवादी काँग्रेस जिल्हाध्यक्ष सुधाकर घारे, अॅड. प्रविण ठाकूर, उमा मुंडे, उपसभापती संजय मांडलूसकर, प्रांताधिकारी ज्ञानेश्वर खुटवड, तहसीलदार किशोर देशमुख, उपनगराध्यक्ष अहमद दर्जी, तालुका अध्यक्ष विनोद पाशिलकर, कार्याध्यक्ष समीर शेडगे, माजी नगराध्यक्ष संतोष पोटफोडे राजीव साबळे, उपनगराध्यक्ष अहमद दर्जी, सभापती राजेंद्र जैन महेंद्र दिवेकर,नीता हजारे, रवींद्र चाळके, नगरसेवक अजित मोरे, प्रशांत कडू, दिवेश जैन,स्नेहा आंब्रे, गौरी बाराटक्के, संजना शिंदे,डॉ प्रियांका धनावडे, अल्मास मुमेरे, पूर्वा मोहिते नंदकुमार म्हात्रे, रामचंद्र सकपाळ, स्वप्नील धनावडे, प्रेषित बारटक्के यांच्यासह अनेक मान्यवर उपस्थित होते.त्या पुढे म्हणाल्या, “सुनील तटकरे व अदिती तटकरे यांना दादांनंतर रायगडकडे लक्ष दिले जाईल की नाही, अशी चिंता असेल; मात्र मी आज येथे स्पष्ट सांगते की, अजितदादांनंतर रोहा व रायगडकडे मी नक्कीच विशेष लक्ष देईन.” यावेळी त्यांनी रोहा शहरातील विविध नियोजित विकासकामांचे भूमिपूजन झाल्याची अधिकृत घोषणा केली.कार्यक्रमात रोहा अष्टमी नगरपरिषदेच्या विविध विकासकामांचे भूमिपूजन करण्यात आले. या कामांमुळे शहराच्या पायाभूत सुविधा मजबूत होऊन नागरिकांना अधिक चांगल्या सुविधा उपलब्ध होणार असल्याचे मत उपमुख्यमंत्री सुनेत्रा पवार यांनी व्यक्त केले.उपस्थित नागरिकांनी मोठ्या उत्साहात कार्यक्रमाला प्रतिसाद दिला. रोह्याच्या विकासाला नवी गती देणारा हा कार्यक्रम ठरल्याची भावना नागरिकांमधून व्यक्त करण्यात आली.

कुडाळमध्ये ५ वे राष्ट्रीय पर्यावरण व पर्यटन संमेलन उत्साहात सिंधुदुर्ग : वृक्ष लागवड करून थांबून चालणार नाही, तर वृक्ष संवर्धन आणि जतन ही काळाची गरज आहे. केवळ फोटोसाठी वृक्षारोपण न करता प्रत्येकाने लावलेले झाड जगवण्याची जबाबदारी स्वीकारली पाहिजे, असे प्रतिपादन माजी शालेय शिक्षण मंत्री आमदार दीपक केसरकर यांनी केले. कुडाळ येथे नैसर्गिक पर्यावरण संवर्धन व मानवता विकास संस्थेच्या वतीने आयोजित ‘५ वे राष्ट्रीय पर्यावरण व पर्यटन संमेलन २०२६’ मोठ्या उत्साहात पार पडले. ‘जय वासुदेवानंद हॉल’ येथे झालेल्या या संमेलनाचे उद्घाटन आ. दीपक केसरकर यांच्या हस्ते झाले. यावेळी जिल्हा परिषद अध्यक्ष प्रमोद कामत, देवगड सभापती तन्वी चांदोस्कर यांची प्रमुख उपस्थिती होती. कार्यक्रमाच्या अध्यक्षस्थानी संस्थेचे संस्थापक अध्यक्ष तथा आदर्श महाराष्ट्र भूषण सन्मानित सुयोग धस होते. यावेळी बोलताना आ. केसरकर म्हणाले की, हवामान बदलाचे संकट दिवसेंदिवस गंभीर होत असून निसर्गाचे चक्र विस्कळीत होत आहे. यावर मात करण्यासाठी शाश्वत विकास आणि पर्यावरण रक्षण यांचा समतोल राखणे आवश्यक आहे. प्रत्येक नागरिकाने किमान एक झाड दत्तक घेऊन ते मोठे होईपर्यंत त्याचे संगोपन करावे, तरच भविष्यातील पिढ्यांसाठी सुरक्षित पर्यावरण निर्माण होईल. जिल्हा परिषद अध्यक्ष प्रमोद कामत यांनीही वाढते प्रदूषण आणि हवामान बदल यामुळे निसर्गाचा समतोल बिघडत असल्याची खंत व्यक्त केली. निसर्ग टिकला तरच मानव टिकेल, त्यामुळे वृक्ष लागवड, पाण्याचा काटकसरीने वापर आणि प्रदूषण रोखणे ही काळाची गरज असल्याचे त्यांनी सांगितले. संमेलनाची सुरुवात सकाळी ‘वृक्षदिंडी’ने झाली. कुडाळ पोलीस स्टेशन ते संमेलन स्थळ अशी ही दिंडी काढण्यात आली. त्यानंतर दीपप्रज्वलन व वृक्षपूजन करून संमेलनाचे उद्घाटन करण्यात आले. यावेळी अंतरीय गड किल्ले संवर्धन समितीचे जिल्हाध्यक्ष गणेश नाईक यांच्या शिवकालीन साहित्य प्रदर्शनाचे उद्घाटन करण्यात आले. तसेच मालवण येथील पिटर शेरॉन यांच्या गडकिल्ले तैलचित्र प्रदर्शनासह प्रकाश कदम यांच्या निसर्ग फोटो गॅलरीचेही उद्घाटन झाले. ऋतुजा गवस यांनी तयार केलेल्या स्मरणिकेचे प्रकाशन मान्यवरांच्या हस्ते करण्यात आले. संमेलनात सर्पमित्र प्रसन्ना गंगावणे, कार्मिस अल्मेडा, ज्ञानेश्वर रेडकर तसेच रक्तचळवळीत योगदान दिल्याबद्दल श्यामल मांजरेकर यांच्यासह विविध क्षेत्रांतील मान्यवरांचा सन्मान करण्यात आला. या संमेलनात पर्यावरण संवर्धन, पर्यटन विकास आणि हवामान बदल या विषयांवर तज्ज्ञांनी मार्गदर्शन केले. महाराष्ट्र आणि गोवा राज्यातील पर्यावरणप्रेमी, सामाजिक कार्यकर्ते आणि विविध क्षेत्रांतील मान्यवर मोठ्या संख्येने उपस्थित होते. फोटो ओळ : कुडाळ येथे आयोजित राष्ट्रीय पर्यावरण व पर्यटन संमेलनात आ. दीपक केसरकर यांचा संस्थेचे अध्यक्ष सुयोग धस यांच्या हस्ते सत्कार करण्यात आला. यावेळी जिल्हा परिषद अध्यक्ष प्रमोद कामत, आशिया रिजवी, बादल बेले, जोवेल डिसिल्व्हा, बापू परब, संजय पिळणकर आदी उपस्थित होते.

१४७० पैकी १४२७ विद्यार्थी उत्तीर्ण; २९८ विद्यार्थ्यांना विशेष प्राविण्य सावर्डे : महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात आलेल्या माध्यमिक शाळा प्रमाणपत्र परीक्षा (एसएससी) मार्च २०२६ च्या निकालात सह्याद्रि शिक्षण संस्था, सावर्डे संचलित मराठी व इंग्रजी माध्यमाच्या शाळांनी उल्लेखनीय यश संपादन केले आहे. संस्थेच्या ३६ शाळांचा एकूण निकाल ९७ टक्के लागला असून गुणवत्तेची परंपरा पुन्हा अधोरेखित झाली आहे. संस्थेच्या मराठी माध्यमाच्या ३३ व इंग्रजी माध्यमाच्या ३ शाळांमधून एकूण १४७० विद्यार्थी परीक्षेस प्रविष्ट झाले होते. त्यापैकी १४२७ विद्यार्थी उत्तीर्ण झाले आहेत. गोविंदराव निकम माध्यमिक व उच्च माध्यमिक विद्यालयाच्या विद्यार्थिनी कु. स्वरा महेश खातू हिने ९८.२० टक्के गुण मिळवत संस्थेत प्रथम क्रमांक पटकावला. त्याच विद्यालयातील कु. शौर्य सुनील टाकसाळे याने ९७ टक्के गुणांसह द्वितीय क्रमांक मिळविला. तसेच कु. तेजस अमित राऊत आणि धोंडीराम शेठ दाभोळकर इंग्लिश मीडियम स्कूल, खेर्डी-चिंचघरी (सती) येथील कु. हर्षवर्धन सोमनाथ भिंगे यांनी प्रत्येकी ९६ टक्के गुण मिळवत संयुक्त तृतीय क्रमांक प्राप्त केला. उत्तीर्ण विद्यार्थ्यांपैकी २९८ विद्यार्थ्यांनी विशेष प्राविण्य श्रेणी मिळविली असून ५५० विद्यार्थी प्रथम श्रेणीत, ४४८ विद्यार्थी द्वितीय श्रेणीत तर १३१ विद्यार्थी तृतीय श्रेणीत उत्तीर्ण झाले आहेत. केवळ ४३ विद्यार्थी अनुत्तीर्ण राहिले आहेत. ग्रामीण भागात कार्यरत असतानाही संस्थेच्या शाळांनी सातत्याने दर्जेदार शिक्षण देत उत्कृष्ट निकालाची परंपरा कायम राखल्याचे या निकालातून स्पष्ट झाले आहे. विद्यार्थ्यांची मेहनत, शिक्षक व शिक्षकेतर कर्मचाऱ्यांचे परिश्रम, पालकांचे सहकार्य आणि संस्थेचे नियोजन यामुळे हे यश शक्य झाल्याची भावना संस्थेच्या वतीने व्यक्त करण्यात आली. या यशाबद्दल संस्थेचे अध्यक्ष तथा चिपळूण-संगमेश्वर विधानसभा मतदारसंघाचे आमदार शेखर निकम यांनी विद्यार्थ्यांचे अभिनंदन करून पुढील वाटचालीस शुभेच्छा दिल्या. तसेच उपाध्यक्ष प्रशांत निकम, सौ. युगंधरा प्रकाश राजेशिर्के, डॉ. इसाक खतीब, कार्याध्यक्ष अनिरुद्ध शेखर निकम, सेक्रेटरी महेश मनोहर महाडिक, सर्व विश्वस्त, पदाधिकारी, मुख्याध्यापक, शिक्षक व शिक्षकेतर कर्मचाऱ्यांनी यशस्वी विद्यार्थ्यांचे कौतुक केले.

चिपळूण, ता. ११ : सामाजिक, शैक्षणिक, सांस्कृतिक आणि पर्यावरणपूरक उपक्रमांसाठी ओळखली जाणारी आपलं चिपळूण संस्थेची वार्षिक सर्वसाधारण सभा नुकतीच खेंड येथील स्प्रिंग क्लिनिकमधील संस्थेच्या कार्यालयात पार पडली. यावेळी पुढील पाच वर्षांसाठी नव्या कार्यकारिणीची घोषणा करण्यात आली. २०१२ पासून कार्यरत असलेल्या या संस्थेने प्रसिद्धीपासून दूर राहून निःस्वार्थ भावनेने विविध सामाजिक उपक्रम राबविले आहेत. शिक्षण, कला, क्रीडा, आरोग्य शिबिरे, निराधारांना मदत, निसर्ग संवर्धन, प्राणी-पक्षी संरक्षण, शहर सुशोभीकरण तसेच दुर्गम भागातील विद्यार्थी आणि निराधार वृद्धांना सहाय्य अशा अनेक क्षेत्रांत संस्थेचे योगदान राहिले आहे. सभेत आगामी वर्षासाठी विविध उपक्रमांचा सविस्तर आराखडा निश्चित करण्यात आला. चिपळूण शहराच्या विकासासाठी तालुक्यातील लोकप्रतिनिधी, सामाजिक कार्यकर्ते, पर्यावरणप्रेमी आणि नदी-नाले संवर्धन कार्यकर्त्यांसोबत चर्चासत्र आयोजित करण्याचा निर्णय घेण्यात आला. तसेच कोकणातील परंपरा आणि संस्कृतीवर आधारित सांस्कृतिक कार्यक्रम, आर्थिकदृष्ट्या दुर्बल विद्यार्थ्यांसाठी अभ्यासिका, पुस्तक रोटेशन योजना, गुणवंत विद्यार्थ्यांमार्फत मार्गदर्शन शिबिरे, गड-किल्ले भ्रमंती, पशु-पक्षी निरीक्षण, वृक्षलागवड, कार्बन क्रेडिट योजनेबाबत जनजागृती तसेच आरोग्य, ध्यान, मनःशांती आणि निसर्गोपचार विषयक उपक्रम राबविण्याचा मनोदय व्यक्त करण्यात आला. बैठकीच्या शेवटी गेल्या १४ वर्षांपासून कार्यभार सांभाळणाऱ्या पदाधिकाऱ्यांचे आभार मानण्यात आले. मावळते अध्यक्ष उदय ओतारी यांनी नव्या कार्यकारिणीची घोषणा केली. नवीन कार्यकारिणीत अध्यक्षपदी डॉ. यतिन जाधव, कार्याध्यक्षपदी संतोष देशमुख, उपाध्यक्षपदी प्रशांत पाटेकर व मनोज जाधव, सचिवपदी उदय ओतारी, सहसचिवपदी प्रशांत देवळेकर, खजिनदारपदी फैय्याज देसाई, सहखजिनदारपदी राजू दरेकर यांची निवड करण्यात आली. तसेच कार्यकारिणी सदस्य म्हणून जितेंद्र सुर्वे, निहार जोशी, मंगेश गोंधळेकर, प्रसन्न आवले आणि विशाल जानवलकर यांचा समावेश करण्यात आला. ही संस्था महाराष्ट्र धर्मादाय आयुक्त कार्यालयाकडे नोंदणीकृत असून लवकरच महिला व पुरुष सर्वसाधारण सभासदांची निवड करण्यात येणार असल्याची माहिती विद्यमान सचिव उदय ओतारी यांनी दिली.

९ लाखांचा मुद्देमाल जप्त; मोटारसह अवैध मद्य ताब्यात राजापूर : जिल्ह्यात सुरू असलेल्या अवैध मद्यविक्रीविरोधातील विशेष मोहिमेत राज्य उत्पादन शुल्क विभागाने राजापूर तालुक्यात मोठी कारवाई करत गोवा बनावटीच्या अवैध दारूसह सुमारे ९ लाख रुपयांचा मुद्देमाल जप्त केला आहे. राजापूर तालुक्यातील साखरतरवाडी येथे शुक्रवारी दुपारी साडेदोनच्या सुमारास उत्पादन शुल्क विभागाच्या पथकाने छापा टाकला. गोपनीय माहितीच्या आधारे करण्यात आलेल्या या कारवाईदरम्यान उभ्या असलेल्या एका मोटारीची तपासणी करण्यात आली. तपासणीत गाडीत गोवा बनावटीच्या मद्याचे बॉक्स आढळून आले. या कारवाईत २ लाख ८ हजार ३२० रुपये किमतीची अवैध दारू तसेच ७ लाख रुपये किमतीची मोटार असा एकूण ९ लाख ८ हजार रुपयांचा मुद्देमाल जप्त करण्यात आला. या प्रकरणी गाडीचा मालक अक्षय अरविंद खटावकर याच्याविरोधात महाराष्ट्र दारूबंदी कायद्यान्वये गुन्हा दाखल करण्यात आला आहे. महाराष्ट्र दिनानिमित्त राजापूर येथील परवानाधारक मद्यविक्रेत्यांनी अवैध दारूविक्रीविरोधात उपोषणाचा इशारा दिला होता. त्यानंतर अधीक्षक कीर्ती शेडगे यांनी कडक कारवाईचे आश्वासन दिले होते. निरीक्षक अमित यादव यांच्या मार्गदर्शनाखाली पथकाने ही कारवाई केली. दरम्यान, राजापूरसह रत्नागिरी शहर परिसरातील भाटीमिऱ्या, चवडेवठार, तेली आळी, एमआयडीसी, सैतवडे आणि वाटद परिसरातही अवैध दारूविक्रीविरोधात मोहीम तीव्र करण्यात आल्याची माहिती उत्पादन शुल्क विभागाकडून देण्यात आली.

दापोली :- दापोली तालुक्यातील जयभवानी मराठा समाज कोळथरे येथील गुणी, कार्यक्षम आणि समाजकार्यात सक्रिय असलेले युवा कार्यकर्ते सुशील सूर्यकांत सावंत यांची श्री. शरदचंद्र पवार राष्ट्रवादी काँग्रेस पक्षाच्या दापोली तालुका युवक अध्यक्षपदी निवड झाल्याने कोळथरे परिसरात आनंदाचे वातावरण निर्माण झाले आहे. त्यांच्या निवडीबद्दल विविध स्तरांतून अभिनंदनाचा वर्षाव होत असून जयभवानी मराठा समाजाच्या शिरपेचात आणखी एक मानाचा तुरा खोवला गेला आहे. सुशील सावंत यांनी सामाजिक, शैक्षणिक तसेच युवकांच्या प्रश्नांवर सातत्याने काम करत आपली वेगळी ओळख निर्माण केली आहे. त्यांच्या नेतृत्वगुणांची दखल घेत पक्षाने त्यांच्यावर ही महत्त्वाची जबाबदारी सोपविली आहे. युवकांना संघटित करून पक्ष बळकटीसाठी तसेच सर्वसामान्यांच्या प्रश्नांसाठी ते प्रभावीपणे काम करतील, असा विश्वास कार्यकर्त्यांनी व्यक्त केला.यावेळी त्यांचा पुष्पगुच्छ देऊन सत्कार करण्यात आला. या सत्कार प्रसंगी समाजातील मान्यवर, पदाधिकारी, महिला वर्ग तसेच युवक मोठ्या संख्येने उपस्थित होते. उपस्थितांनी सुशीलकुमार सावंत यांना पुढील राजकीय आणि सामाजिक वाटचालीसाठी शुभेच्छा दिल्या.“ही जबाबदारी माझ्यासाठी सन्मानासोबतच मोठी जबाबदारी आहे. पक्ष संघटना अधिक मजबूत करण्यासाठी तसेच युवकांच्या न्याय्य प्रश्नांसाठी सातत्याने काम करणार आहे,” असे मनोगत सुशील सावंत यांनी व्यक्त केले.