Editorial

माणगाव तालुक्यात बनावट चलनी नोटांचे रॅकेट उध्वस्त; तीन जणांना अटक, ₹3.80 लाख जप्त रायगड — जिल्ह्यातील माणगाव तालुक्यात बनावट चलनी नोटांचे मोठे रॅकेट पोलिसांनी उध्वस्त केले आहे. स्थानिक गुन्हे अन्वेषण शाखा आणि गोरेगाव पोलीस ठाण्याच्या संयुक्त पथकाने तपासून कारवाई केली आणि तिघांना अटक केली आहे. सध्या पोलिसांनी सुमारे ₹3,80,000 मूल्याच्या बनावट नोटा जप्त केल्या आहेत; हा आकडा पुढे वाढण्याची शक्यता अधिक आहे. तपासात समोर आले की, माणगाव टेमपाले येथील मुफस्सिर उर्फ़ मिनी अब्दुल राशिद खानदेशी यांच्या घरातून बनावट नोटा साठवण्यात आढळल्या. तसेच म्हसळा तालुक्यातील निगडीपाब रे येथील सुनील बाळाराम मोरे व मेहबुब उलडे (राहणार: बोर्लीपंचतन, ता. श्रीवर्धन) हे ही या रॅकेटशी संबधित असल्याची माहिती पोलिसांना मिळाली होती. शनिवारी (20 सप्टेंबर) पोलिसांनी पहिली कारवाई केली. त्यानंतर फरार झालेला मेहबुब उलडे सोमवारी रात्री दिघी येथून ताब्यात घेण्यात आला. चौकशीत बंदोबस्तात असे आढळले की, आरोपी वीस, पन्नास आणि पाचशे रुपयांच्या बनावट नोटा तयार करून त्या बाजारात मिसळण्याचा प्रयत्न करत होते. गणेशोत्सवाच्या पार्श्वभूमीवर हा प्रकरण चर्चेत आले होते आणि काही व्यापाऱ्यांनीही बनावट नोटांमुळे फसवणुकीची तक्रार नोंदवली असल्याचे समोर आले आहे. बनावट नोटा खर्‍या नोटांसारख्या दिसत असल्याने सामान्य नागरिक गोंधळले गेले होते. जिल्हा पोलीस अधीक्षक आंचल दलाल यांनी संपूर्ण साखळीचा सखोल तपास करण्याचे आदेश दिले आहेत. गोरेगाव पोलीस ठाण्याचे सहा.पोलीस निरीक्षक विजय सुर्वे यांनी नागरिकांना आवाहन केले आहे की संशयास्पद नोटा त्वरित जवळच्या पोलीस ठाण्यात जमा कराव्यात. गोरेगाव पोलीस आणि गुन्हे अन्वेषण शाखा सध्या रॅकेटची उर्वरित साखळी उघड करण्यासाठी प्रयत्नशील आहेत.

रायगड सायबर सेलची मोठी कारवाई; ऑनलाइन गेमिंग अ‍ॅप घोटाळ्यात १९ कोटींचा भांडाफोड रायगड : ऑनलाइन गेमिंग अ‍ॅप्सच्या माध्यमातून नागरिकांची फसवणूक करणाऱ्या रॅकेटचा रायगड सायबर सेलने मोठा भांडाफोड केला आहे. या कारवाईत पोलिसांनी 44 म्यूल बँक खाती गोठवली असून, तब्बल 19 कोटी 44 लाख 34 हजार रुपये जप्त केले आहेत. या प्रकरणी राजस्थानमधील भारमल हनुमान मिना याला अटक करण्यात आली आहे. अलिबागच्या चेंढरे येथे राहणारे अमित जाधव यांना एम-999, मधूर मार्केट, लकी स्पिन यांसह तब्बल 26 अ‍ॅप्समधून संदेश येत होते. गुगल प्ले स्टोअरवर हे अ‍ॅप्स उपलब्ध असल्याने ते कायदेशीर आहेत असा समज झाल्याने त्यांनी पैसे गुंतवले. मात्र काही दिवसांतच त्यांना परतावा न मिळाल्याने फसवणूक झाल्याचं लक्षात आलं आणि त्यांनी पोलिसांत धाव घेतली. सायबर सेलच्या तपासात हा गुन्हा राजस्थानपर्यंत पोहोचला. भारमल मिना याने आपल्या कुटुंबातील सदस्यांच्या नावाने खाती उघडून त्याद्वारे फसवणुकीचे पैसे जमा केले होते. दररोज लाखो रुपयांचे कमिशन या पद्धतीने मिळत असल्याचे उघड झाले. पोलिसांच्या तपासात या रॅकेटमध्ये दोन मोठ्या बँकांचा सहभाग असल्याचेही समोर आले आहे. उदाहरणादाखल, एका मोबाईल शॉप मालकाच्या खात्यात 2 महिन्यांत तब्बल 56 कोटी रुपयांचा व्यवहार, तर एका गृहीणीच्या खात्यात 114 कोटींचा व्यवहार झाल्याचे आढळले. आणखी एका नागरिकाच्या खात्यात 186 कोटींचे व्यवहार झाले होते. या प्रकरणातील प्रमुख Parimatch Gaming App चा तपास एन्फोर्समेंट डायरेक्टरेट (ED) करत असून, आतापर्यंत 55 म्यूल खात्यांतील 3 हजार कोटी रुपये गोठवण्यात आले आहेत. रायगड पोलिस अधीक्षक आंचल दलाल यांच्या मार्गदर्शनाखाली पोलीस निरीक्षक रिजवान नदाफ, सहायक पोलीस निरीक्षक अमोल जाधव, तसेच सहायक पोलीस अजय मोहिते व पथकातील अधिकारी यांच्यासह ही कारवाई करण्यात आली. पोलिसांकडून या प्रकरणातील आणखी किमान पाच जणांचा शोध घेतला जात आहे.

अलिबाग : पर्यटन नगरी अलिबागमध्ये गेल्या सहा महिन्यांपासून सुरू असलेल्या बेकायदेशीर रेंटल बाईक व्यवसायामुळे स्थानिक परवानाधारक रिक्षाचालकांमध्ये संतापाची लाट उसळली आहे. याच पार्श्वभूमीवर रिक्षाचालकांनी अलिबाग पोलीस स्टेशनला निवेदन देऊन या रेंटल बाईकवर कारवाई करण्याची मागणी केली आहे. रिक्षाचालकांच्या मते, शहरात केवळ दोन परवानाधारकांना 10 ते 12 बाईक भाड्याने देण्याची परवानगी आहे. मात्र प्रत्यक्षात हेच परवानाधारक 40 ते 50 बाईक रस्त्यावर सोडत आहेत. तसेच अनेकजण कोणतेही परवाने न घेता बेकायदेशीरपणे रेंटल बाईकचा धंदा सुरू ठेवत आहेत, असा आरोप करण्यात आला आहे. या प्रकारामुळे अलिबागमधील पारंपरिक रिक्षा व्यवसायावर संकट ओढावले असून, अनेक रिक्षाचालक कुटुंबांवर उपासमारीची वेळ आल्याचे निवेदनात म्हटले आहे. या निवेदनासाठी माजी उपनगराध्यक्षा अ‍ॅड. मानसी म्हात्रे आणि शेकाप तालुका प्रमुख सुरेश घरत यांच्या नेतृत्वाखाली रिक्षाचालक प्रतिनिधी मंडळाने अधीक्षक आँचल दलाल तसेच पोलीस निरीक्षक किशोर साळे यांना निवेदन दिले. या वेळी अलिबाग ऑटो रिक्षा चालक-मालक संघटनेचे पदाधिकारी अफजल सय्यद, अमीन मुल्ला, पप्पू पडावे, शरद राऊत, स्वप्नील नाईक, मन्सूर आगा आणि संदीप म्हात्रे आदी मान्यवर उपस्थित होते. निवेदनात रिक्षाचालक संघटनेने स्पष्ट इशारा दिला आहे की, जर बेकायदेशीर रेंटल बाईकवर तातडीने कारवाई झाली नाही तर पुढील काळात मोठं आंदोलन छेडलं जाईल.

नवरात्रोत्सवात सुगरणीचा शोध! रोहाच्या वर्से गावात महिलांसाठी खास उपक्रम, राणी म्हात्रे सन्मानित कोकणात सध्या नवरात्रोत्सवाची पारंपरिक धूम पाहायला मिळत आहे. रोहा तालुक्यातील वर्से गावात काळभैरव ग्रामस्थ मंडळाने नव्याने बांधलेल्या जरीमरी मंदिरात नवरात्रोत्सवाचे सांस्कृतिक कार्यक्रम मोठ्या उत्साहात पार पाडले. या कार्यक्रमात महिलांसाठी विशेष उपक्रमांचे आयोजन करण्यात आले होते. नऊ दिवस विविध मनोरंजक स्पर्धा व सांस्कृतिक उपक्रम ठेवले होते. त्यात विशेष आकर्षण ठरली पाककला स्पर्धा. या स्पर्धेतून गावातील महिलांची कला आणि परंपरा पुढे आली. या पाककला स्पर्धेत विजेतेपद पटकावून ‘शोध सुगरणीचा’ हा मान राणी म्हात्रे यांना मिळाला. मंडळाच्या वतीने त्यांचा सन्मान करण्यात आला. या सोहळ्यात ग्रामस्थ, महिला व तरुणींचा उत्स्फूर्त सहभाग दिसून आला. वर्से गावातील ग्रामस्थांनी सांगितले की, अशा उपक्रमांमुळे गावातील महिलांना आपली कला सादर करण्याची संधी मिळते आणि नवरात्रोत्सवाचा आनंद अधिकच वाढतो. पारंपरिक पद्धतीने साजरा होणारा हा उत्सव महिलांच्या सहभागामुळे अधिक रंगतदार झाला आहे.