कोकणची बातमी

रत्नागिरी : प्रतिनिधी रत्नागिरी : शासनाच्या वाळू/रेती निर्गती धोरण २०२५ अंतर्गत घरकुल योजनांच्या लाभार्थ्यांसाठी महत्त्वपूर्ण निर्णय घेण्यात आला असून, पात्र लाभार्थ्यांना स्थानिक वापरासाठी कमाल 5 ब्रास वाळू मोफत उपलब्ध करून देण्यात येणार आहे, अशी माहिती जिल्हा ग्रामीण विकास यंत्रणेचे प्रकल्प संचालक यांनी दिली. प्रधानमंत्री आवास योजना (ग्रामीण टप्पा 1 व 2), पी.एम. जनमन आवास, रमाई आवास, शबरी आवास, पारधी आवास, अटल बांधकाम कामगार आवास, पुण्यश्लोक अहिल्यादेवी होळकर घरकुल, यशवंतराव चव्हाण मुक्त वसाहत तसेच मोदी आवास योजना या योजनांतील लाभार्थ्यांना या निर्णयाचा लाभ मिळणार आहे. महसूल व वन विभागाच्या 30 एप्रिल 2025 च्या शासन निर्णयानुसार, लिलावात न गेलेल्या वाळू गटांमधून तसेच अवैध उत्खनन प्रकरणांमध्ये जप्त केलेली वाळू रॉयल्टी न आकारता उपलब्ध करून दिली जाणार आहे. पात्र लाभार्थ्यांची यादी गट विकास अधिकाऱ्यांकडून प्राप्त झाल्यानंतर तहसिलदारांकडून ऑनलाईन वाळू पासेस जारी करण्यात येणार असून, लाभार्थ्यांना स्वतंत्र अर्ज करण्याची आवश्यकता नाही.हे पास ग्राम महसूल अधिकारी व ग्रामसेवक/ग्राम विकास अधिकारी यांच्या मार्फत 15 दिवसांच्या आत लाभार्थ्यांना घरपोच देण्यात येतील. पास मिळाल्यानंतर एका महिन्याच्या आत वाळू उचलणे बंधनकारक असून, अन्यथा पास रद्द होईल. तांत्रिक अडचणी निर्माण झाल्यास ऑफलाईन पासेस देण्याचीही तरतूद करण्यात आली आहे. या निर्णयामुळे घरकुल बांधकामाचा खर्च कमी होऊन ग्रामीण भागातील लाभार्थ्यांना मोठा दिलासा मिळणार असल्याचे प्रशासनाने सांगितले आहे.

प्रतिनिधी : कोकणधारा रत्नागिरी : महाराष्ट्र राज्याचे माजी मुख्यमंत्री आणि रत्नागिरी-सिंधुदुर्ग लोकसभा मतदारसंघाचे खासदार नारायणराव राणे १० एप्रिल रोजी आपल्या वयाच्या ७५ व्या वर्षात, म्हणजेच अमृत महोत्सवी वर्षात पदार्पण करत आहेत. या विशेष दिनाचे औचित्य साधून रत्नागिरीतील त्यांच्या कार्यकर्त्यांनी आणि चाहत्यांनी विविध सामाजिक व धार्मिक उपक्रमांद्वारे वाढदिवस साजरा करण्यास उत्साहात सुरुवात केली आहे. या औचित्याने आज सकाळी रत्नागिरीचे ग्रामदैवत श्री देव भैरी चरणी खा. राणे यांच्या उत्तम आरोग्यासाठी आणि उदंड आयुष्यासाठी विशेष प्रार्थना करण्यात आली. श्री सार्वजनिक माघी गणेशोत्सव मंडळ आणि आमदार श्री. निलेश राणे मित्रमंडळाच्या पदाधिकाऱ्यांनी एकत्र येत श्री देव भैरीला ७५ नारळ, ७५ केळी आणि ७५ विडे यांची आकर्षक आरास मांडून श्रद्धापूर्वक अर्पण केली.या धार्मिक कार्यक्रमाला भाजपचे आणि राणे समर्थक पदाधिकारी मोठ्या संख्येने उपस्थित होते. यामध्ये अशोक वाडेकर, नित्यानंद दळवी, शिवाजी कारेकर, अमोल देसाई, निखिल शेट्ये, अभिलाश पिलणकर, सोहम पिलणकर, विशाल कांबळे, राजू झगडे, नरेश बनसोडे आणि अमृत गोरे यांचा समावेश होता.खासदार नारायण राणे यांच्या अमृत महोत्सवी वर्षाच्या निमित्ताने संपूर्ण जिल्ह्यात पुढील काही दिवस विविध विधायक उपक्रम राबवले जाणार आहेत.

प्रतिनिधी : कोकणधारा संगमेश्वर : कोकण रेल्वे मार्गावरील महत्त्वाचे स्थानक असलेल्या संगमेश्वर रेल्वे स्टेशनला समर स्पेशल गाड्यांचा थांबा न दिल्यामुळे प्रवाशांमध्ये तीव्र नाराजी व्यक्त होत आहे. विशेषतः 06013 / 06014 (थिरुवनंतपुरम सेंट्रल – मदार जंक्शन – थिरुवनंतपुरम सेंट्रल) या गाड्यांना संगमेश्वर येथे थांबा नसल्याने स्थानिक प्रवाशांना मोठा त्रास सहन करावा लागत आहे. या गाड्यांना माणगाव, रोहा, मडगाव तसेच इतर अनेक स्थानकांवर थांबे देण्यात आलेले असताना संगमेश्वरकडे दुर्लक्ष झाल्याची भावना नागरिकांमध्ये व्यक्त होत आहे. संगमेश्वर हे कोकणातील एक महत्त्वाचे प्रवासी केंद्र असून येथून दररोज मोठ्या प्रमाणात प्रवासी प्रवास करतात. विशेष म्हणजे, हे स्थानक वार्षिक सुमारे सहा कोटी रुपयांपर्यंत उत्पन्न देणारे असूनही येथे थांबा न देणे आश्चर्यकारक असल्याचे मत व्यक्त केले जात आहे.दरम्यान, या समर स्पेशल गाड्यांमध्ये अनेक वेळा शेकडो सीट्स रिक्त राहत असल्याचेही दिसून येत आहे. त्यामुळे संगमेश्वर येथे थांबा दिल्यास प्रवाशांची सोय होण्याबरोबरच रेल्वेच्या उत्पन्नातही वाढ होऊ शकते, असे जाणकारांचे म्हणणे आहे. या पार्श्वभूमीवर “निसर्गरम्य चिपळूण आणि संगमेश्वर” या फेसबुक ग्रुपचे प्रमुख संदेश जिमन यांनी कोकण रेल्वे प्रशासनाला अधिकृत पत्र देत तात्काळ थांबा देण्याची मागणी केली आहे. तसेच, स्थानिक नागरिकांकडूनही या मागणीला मोठा पाठिंबा मिळत असून, संगमेश्वरला लवकरात लवकर समर स्पेशल गाड्यांचा थांबा द्यावा, अशी जोरदार मागणी केली जात आहे.

प्रतिनिधी : कोकणधारा चिपळूण : देशातील सोळावी आणि स्वातंत्र्यानंतरची आठवी जनगणना असलेल्या ‘जनगणना २०२७’च्या पूर्वतयारीला वेग आला असून, त्याअंतर्गत चिपळूण पंचायत समितीमधील छत्रपती शिवाजी महाराज सभागृहात फील्ड ट्रेनर्ससाठी आयोजित तीन दिवसीय प्रशिक्षण कार्यक्रमास सोमवारी प्रारंभ झाला. या प्रशिक्षण कार्यक्रमाचे उद्घाटन तहसीलदार प्रवीण लोकरे यांच्या हस्ते झाले. यावेळी मंडणगडचे तहसीलदार अक्षय ढाकणे आणि राजापूरचे तहसीलदार विकास गंबरे हे मास्टर ट्रेनर म्हणून उपस्थित होते. तसेच जनगणना समन्वय अधिकारी संजीव गावकर, सहाय्यक महसूल अधिकारी संभाजी ढेंबरे आणि तांत्रिक सहाय्यक अमोल करंडे यांनी उपस्थित राहून मार्गदर्शन केले. यंदाच्या जनगणनेचे सर्वात महत्त्वाचे वैशिष्ट्य म्हणजे ही प्रक्रिया पूर्णपणे डिजिटल आणि पारदर्शक पद्धतीने राबविण्यात येणार आहे. प्रशिक्षणादरम्यान फील्ड ट्रेनर्सना मोबाईल ॲपचा वापर, माहिती नोंदणी प्रक्रिया, नागरिकांना विचारल्या जाणाऱ्या ३३ प्रश्नांची अचूक हाताळणी, तसेच CMMS पोर्टलद्वारे माहिती संकलन आणि नियंत्रण याबाबत सविस्तर प्रशिक्षण दिले जात आहे. ‘जनगणना २०२७’ ही प्रक्रिया दोन टप्प्यांत पार पडणार आहे. पहिला टप्पा ‘घरयादी व घरगणना’ तर दुसरा टप्पा ‘लोकसंख्या गणना’ असा असेल. यासाठी १ मे ते १५ मे २०२६ या कालावधीत नागरिकांना ‘स्वगणनेची’ (Self-Enumeration) सुविधा उपलब्ध करून देण्यात येणार आहे. त्यानंतर १६ मे ते १४ जून २०२६ या कालावधीत प्रगणक घरोघरी जाऊन माहिती संकलित करणार आहेत. या संपूर्ण प्रक्रियेत शिक्षकांची प्रगणक (Enumerators) म्हणून नियुक्ती करण्यात आली आहे. सध्या तयार करण्यात येत असलेले फील्ड ट्रेनर्स पुढे प्रगणक आणि पर्यवेक्षकांना प्रशिक्षण देणार आहेत. त्यामुळे आगामी जनगणना अधिक अचूक, जलद आणि प्रभावीपणे पार पडेल, असा विश्वास प्रशासनाने व्यक्त केला आहे. यंदाच्या जनगणनेत प्रथमच जातनिहाय माहिती संकलित केली जाणार असून, डिजिटल माध्यमामुळे संपूर्ण प्रक्रिया अधिक विश्वासार्ह, वेगवान आणि पारदर्शक होणार असल्याचे प्रशासनाकडून सांगण्यात आले.

प्रतिनिधी : कोकणधारा देवरुख पोलिसांचा जलद तपास, आरोपीला ५ दिवसांची पोलीस कोठडीदेवरुख | प्रतिनिधी: दारू पिण्यावरून झालेल्या वादातून मित्राच्या मृत्यूस कारणीभूत ठरल्याप्रकरणी देवरुख पोलिसांनी जलद तपास करून एका संशयिताला अटक केली आहे. या प्रकरणातील आरोपी आशिष शांताराम भावके (वय २७, रा. घोगाव, ता. कराड, जि. सातारा) असून, मृत व्यक्ती सुधीर अर्जुन यादव (वय ३०, रा. साईकडे, ता. पाटण, जि. सातारा) आहे. दोघेही एकमेकांचे मित्र तसेच नातेवाईक असल्याचे समोर आले आहे. पोलिसांनी दिलेल्या माहितीनुसार, आरोपी आशिष भावके आणि सुधीर यादव हे दोघे ३१ मार्च २०२६ रोजी आशिषच्या एमएच ५० / एन ४६४२ क्रमांकाच्या इर्टिगा कारने रत्नागिरीकडे गेले होते. रत्नागिरीतील आरेवारे परिसरात त्यांनी मद्यपान करून जेवण केले. त्यानंतर रात्री सुमारे ११.३० वाजण्याच्या सुमारास ते परत घरी निघाले. यावेळी सुधीर यादव याने पुन्हा दारू पिण्याची मागणी केली. मात्र, त्या ठिकाणी दारू मिळणार नसल्याचे आशिष भावके याने सांगितल्याने दोघांमध्ये वाद झाला. या वादातून संतप्त झालेल्या सुधीर यादव याने आरोपीच्या कारच्या बॉनेटवर चढून बसत पुढील काच फोडली आणि वाहनाचे नुकसान केले. याचा राग आल्याने आरोपी आशिष भावके याने, सुधीर यादव हा गाडीच्या बॉनेटवर असतानाच कार सुरू केली. त्यामुळे सुधीर यादव खाली पडून गंभीर जखमी झाला. त्याच्या पायाला फ्रॅक्चर झाले असून बरगडी, कंबर, पोट आणि शरीराच्या डाव्या बाजूस दुखापती झाल्या. मात्र, जखमी अवस्थेत असतानाही आरोपीने त्याला घटनास्थळीच सोडून दिल्याचे पोलिस तपासात उघड झाले आहे. यानंतर दुसऱ्या दिवशी जखमी सुधीर यादव याला उपचारासाठी प्राथमिक आरोग्य केंद्र, साखरपा येथे दाखल करण्यात आले. मात्र उपचार सुरू असतानाच त्याचा मृत्यू झाला. या घटनेप्रकरणी देवरुख पोलीस ठाण्यात प्रथम अकस्मात मृत्यू नोंद (अ.मृ.) क्र. १२/२०२६ अंतर्गत नोंद करण्यात आली होती. त्यानंतर सखोल चौकशीनंतर आरोपीविरुद्ध देवरुख पोलीस ठाणे गुन्हा रजिस्टर क्र. ४५/२०२६ अन्वये भारतीय न्याय संहिता २०२३ च्या कलम १०३ अंतर्गत गुन्हा दाखल करण्यात आला.या प्रकरणातील फिर्यादी पोलीस उपनिरीक्षक प्रमोद अनंत वाघाटे (वय ५७), देवरुख पोलीस ठाणे हे आहेत. आरोपीला न्यायालयात हजर केले असता न्यायालयाने त्याला पाच दिवसांची पोलीस कोठडी सुनावली आहे. या प्रकरणाचा अधिक तपास उपविभागीय पोलीस अधिकारी सुरेश कदम यांच्या मार्गदर्शनाखाली पोलीस निरीक्षक उदय झावरे व त्यांचे सहकारी करीत आहेत.

प्रतिनिधी : कोकणधारा रत्नागिरी : लोकप्रिय गायक महेश काळे यांच्या गायन मैफिलीचा रत्नागिरीतील प्रमोद महाजन क्रीडांगणावर होणारा कार्यक्रम ऐनवेळी रद्द झाल्याने प्रेक्षकांनी तीव्र संताप व्यक्त केला आहे. कार्यक्रम रद्द झाल्याची पूर्वसूचना न दिल्यामुळे बाहेरून आलेल्या रसिकांचा मोठा हिरमोड झाला. रविवारी सायंकाळी ७ वाजता हा कार्यक्रम होणार होता. मात्र, कार्यक्रम रद्द झाल्याची माहिती अनेक प्रेक्षकांना रत्नागिरीत आल्यानंतरच मिळाली. त्यामुळे प्रेक्षकांमध्ये नाराजीचे वातावरण निर्माण झाले असून, अनेकांनी आपली फसवणूक झाल्याची भावना व्यक्त केली आहे. या कार्यक्रमासाठी तिकीट विक्री स्थानिक पातळीवर तसेच ‘बुक माय शो’द्वारे करण्यात आली होती. कोल्हापूरसह विविध ठिकाणांहून रसिक प्रेक्षक कार्यक्रमासाठी आले होते. त्यांनी तिकीटे खरेदी केली होती; परंतु कार्यक्रम रद्द झाल्याने त्यांना मनस्ताप सहन करावा लागला. पुण्याचे गंधार जोग आणि दिवेश बापट यांच्या ‘एकदंत थिएटर’ व ‘ताल इंटरटेनमेंट’तर्फे हा कार्यक्रम आयोजित करण्यात आला होता. आयोजकांच्या म्हणण्यानुसार, कार्यक्रम रद्द झाल्याची माहिती पाच दिवसांपूर्वीच देण्यात आली होती. तसेच ‘बुक माय शो’लाही याबाबत कळविण्यात आले होते. मात्र, तरीही आदल्या दिवशीपर्यंत तिकीट विक्री सुरू असल्याने गोंधळ उडाला. या कार्यक्रमासाठी ५०० ते ३५०० रुपये दरम्यान तिकीट दर ठेवण्यात आले होते. तिकीटांचे पैसे जमा झाल्यानंतरही कार्यक्रम रद्द झाल्याने प्रेक्षकांमध्ये नाराजी वाढली आहे. दरम्यान, कार्यक्रम रद्द करण्यामागचे नेमके कारण अद्याप स्पष्ट झालेले नाही.कार्यक्रमासाठी आवश्यक तयारी, परवानग्या किंवा व्यवस्था करण्यात आल्याचेही दिसून आले नाही. या प्रकरणी रत्नागिरी शहर पोलीस ठाण्यात फसवणूक व मनस्तापाबाबत अर्ज दाखल करण्यात आले आहेत.

रत्नागिरी: प्रतिनिधी मिरकरवाडा ते गणपतीपुळे दरम्यान नियमित सागरी गस्त घालत असताना मत्स्यव्यवसाय विभागाने अनधिकृत एल.ई.डी. (LED) लाईट लावून मासेमारी करणाऱ्या नौकेवर मोठी कारवाई केली आहे. दि. ३ एप्रिल २०२६ च्या रात्री सुरू झालेल्या या मोहिमेत ४ एप्रिल रोजी पहाटे २.१७ वाजेच्या सुमारास ही नौका पकडण्यात आली. मत्स्यव्यवसाय विभागाचे अंमलबजावणी अधिकारी तथा जयगडचे परवाना अधिकारी श्रीम. स्मितल कांबळे या आपल्या पथकासह नियमित गस्तीवर होत्या. यावेळी मिऱ्या-काळबादेवी समोर समुद्रात साधारण १०.८३ सागरी मैल (NM) अंतरावर ‘भराडी प्रसन्न’ (नोंदणी क्रमांक: IND-MH-04-MM-3723) ही नौका संशयास्पदरीत्या नांगरून उभी असल्याचे आढळले. या नौकेचे मालक श्री. कैलास उल्हास कुबल (रा. राजवाडी, भगवती बंदर, रत्नागिरी) असून, नौकेकडे राज्याच्या जलधि क्षेत्रासाठी मासेमारी परवाना आहे. मात्र, ही नौका अनधिकृतपणे एल.ई.डी. लाईट लावून मासेमारी करण्याच्या उद्देशाने उभी असल्याचे निष्पन्न झाले.कठोर कायदेशीर पावलेकारवाईदरम्यान नौकेवर तांडेलसह ५ खलाशी मिळून आले. पथकाने नौकेवरील एल.ई.डी. लाईट आणि जनरेटरसह संपूर्ण नौका जप्त केली असून पुढील कार्यवाहीपर्यंत ती मिरकरवाडा बंदरात सुरक्षित ठेवण्यात आली आहे. सदर प्रकरणी महाराष्ट्र सागरी मासेमारी नियमन अधिनियम (सुधारणा) अध्यादेश, २०२१ अन्वये कठोर कारवाई करण्यात येणार आहे.यांनी बजावली भूमिकासदर मोहीम मत्स्यव्यवसाय विभागाचे सहाय्यक आयुक्त श्री. सागर कुवेसकर यांच्या मार्गदर्शनाखाली अत्यंत नियोजनबद्ध पद्धतीने राबवण्यात आली. यामध्ये अंमलबजावणी अधिकारी श्रीम. स्मितल कांबळे यांच्यासह सुरक्षा रक्षक श्री. सुजन पोवार, सागरी सुरक्षा रक्षक श्री. अमोल पिलणकर, श्री. अनिकेत पवार आणि श्री. भूषण करमरकर यांनी सक्रिय सहभाग घेतला. अंमलबजावणी अधिकाऱ्यांनी या कारवाईचा सविस्तर अहवाल (प्रतिवेदन) दाखल केला आहे. यानंतर आता या प्रकरणाची रीतसर सुनावणी अभिनिर्णय अधिकारी तथा सहाय्यक आयुक्त मत्स्यव्यवसाय, रत्नागिरी यांच्या न्यायालयात पार पडणार आहे. बेकायदेशीर मासेमारी करणाऱ्यांविरुद्ध मत्स्यव्यवसाय विभागाने उचललेल्या या पावलामुळे अवैध मच्छीमारांचे धाबे दणाणले आहेत.

प्रतिनिधी : कोकणधारा कोल्हापूर : महाराष्ट्र राज्य सहकारी पतसंस्था फेडरेशन मर्या. आयोजित सहकारी पतसंस्थांचा महिला मेळावा शुक्रवारी (ता. ३) कोल्हापूर येथे मोठ्या उत्साहात पार पडला. यावेळी चिपळूण नागरी सहकारी पतसंस्थेच्या मुख्य कार्यकारी अधिकारी सौ. स्वप्ना प्रशांत यादव यांचा सहकार क्षेत्रातील उल्लेखनीय कार्याची दखल घेत ‘बेस्ट सीईओ’ पुरस्काराने मान्यवरांच्या हस्ते सन्मान करण्यात आला. महाराष्ट्र राज्य सहकारी पतसंस्था फेडरेशनच्या वतीने दरवर्षी सहकार क्षेत्रात उत्कृष्ट कामगिरी करणाऱ्या आणि आपल्या कार्याचा ठसा उमटविणाऱ्या कर्तबगार महिलांचा गौरव केला जातो. याच पार्श्वभूमीवर यंदाचा ‘बेस्ट सीईओ’ पुरस्कार सौ. स्वप्ना यादव यांना जाहीर करण्यात आला होता. हा पुरस्कार वितरण सोहळा कोल्हापूर येथील आनंद भवन, सायबर कॉलेज येथे दिमाखदार वातावरणात पार पडला. कार्यक्रमाचे उद्घाटन कोल्हापूरचे खासदार धनंजयराव महाडिक यांच्या हस्ते झाले, तर समारोपप्रसंगी महाराष्ट्र राज्याचे आरोग्यमंत्री ना. प्रकाश आबिटकर यांची प्रमुख उपस्थिती लाभली. या सोहळ्याला कोल्हापूरच्या महापौर रुपाराणी निकम, गोदावरी अर्बन मल्टीस्टेटच्या राजश्रीताई पाटील, भागिरथी महिला पतसंस्थेच्या चेअरमन अरुंधती महाडिक यांच्यासह अनेक मान्यवर उपस्थित होते. तसेच भाजपचे रत्नागिरी दक्षिण जिल्हाध्यक्ष प्रशांत यादव, महाराष्ट्र राज्य सहकारी पतसंस्था फेडरेशनचे अध्यक्ष ओमप्रकाश दादाप्पा उर्फ काका कोयटे, मुख्य कार्यकारी अधिकारी सौ. सुरेखा लवांडे, सहसचिव सौ. भारतीताई मुथ्था, संचालिका सौ. निलिमा बावणे, ॲड. अंजलीताई पाटील यांच्यासह विविध क्षेत्रातील मान्यवर मोठ्या संख्येने उपस्थित होते. सौ. स्वप्ना यादव यांनी चिपळूण नागरी सहकारी पतसंस्थेच्या मुख्य कार्यकारी अधिकारी म्हणून केलेल्या प्रभावी आणि जबाबदार कामगिरीची दखल घेत हा पुरस्कार प्रदान करण्यात आला. त्यांच्या या सन्मानामुळे चिपळूणसह संपूर्ण सहकार क्षेत्रात आनंदाचे वातावरण निर्माण झाले आहे. सौ. स्वप्ना यादव यांना मिळालेल्या या मानाच्या पुरस्काराबद्दल विविध स्तरांतून त्यांच्यावर अभिनंदनाचा वर्षाव होत आहे.