Editorial

प्रतिनिधी : कोकणधारा रत्नागिरी : रत्नागिरी जिल्ह्यातील पहिल्या महिला स्त्रीरोग तज्ञ तसेच स्वस्तिक हॉस्पिटल व चिरायु हॉस्पिटलच्या संस्थापिका डॉ. सौ. सुनिता रमेश चव्हाण यांचे आज पहाटे दीर्घ आजाराने निधन झाले. त्यांच्या निधनामुळे जिल्ह्यात सर्वत्र शोक व्यक्त केला जात आहे. डॉ. चव्हाण यांनी आपल्या सेवाभावी वृत्तीने आणि वैद्यकीय कौशल्याने असंख्य महिलांना आरोग्यसेवा दिली. स्त्रीरोग तज्ञ म्हणून त्यांनी जिल्ह्यात मोठे योगदान दिले असून त्यांच्या कार्याची दखल सर्व स्तरांतून घेतली जात होती. त्यांचे पार्थिव अंत्यदर्शनासाठी आज दुपारी २ ते सायंकाळी ४ वाजेपर्यंत माळनाका येथील स्वस्तिक बंगला येथे ठेवण्यात येणार आहे. त्यानंतर सायंकाळी ४ वाजता त्यांच्या राहत्या घरातून अंत्ययात्रा निघून चर्मालय स्मशानभूमीत अंतिम संस्कार करण्यात येणार आहेत.त्यांच्या पश्चात डॉ. नितीन रमेश चव्हाण यांच्यासह शोकाकुल परिवार आहे.

प्रतिनिधी : कोकणधारा रत्नागिरी : जिल्हा परिषदेच्या विषय समिती सभापती पदांच्या निवडीचा कार्यक्रम जाहीर झाला असून येत्या २५ मार्च रोजी ही महत्त्वपूर्ण निवडणूक पार पडणार आहे. या पार्श्वभूमीवर जिल्ह्याच्या राजकीय वर्तुळात हालचालींना वेग आला असून संभाव्य नावांची जोरदार चर्चा सुरू झाली आहे. जिल्हा परिषदेच्या प्रशासनात विषय समित्यांचे सभापती पद अत्यंत महत्त्वाचे मानले जाते. धोरणात्मक निर्णय, योजना अंमलबजावणी आणि विभागनिहाय कामकाज यामध्ये या पदांची भूमिका निर्णायक असते. त्यामुळे या पदांवर कोणाची निवड होते याकडे संपूर्ण जिल्ह्याचे लक्ष लागले आहे. सत्ताधारी पक्षाकडून अद्याप अधिकृत घोषणा करण्यात आलेली नसली तरी काही अनुभवी आणि निष्ठावान नेत्यांच्या नावांवर शिक्कामोर्तब होण्याची शक्यता व्यक्त होत आहे. चिपळूणच्या मयुरी शिर्के यांना महिला व बालकल्याण समिती सभापतीपद मिळण्याचे संकेत असून महिलांच्या प्रश्नांवरील त्यांची जाण आणि प्रशासकीय अनुभव यामुळे त्यांचे नाव आघाडीवर असल्याचे बोलले जाते.रत्नागिरीचे प्रकाश रसाळ यांच्याकडे समाज कल्याण समितीची धुरा सोपवली जाण्याची शक्यता वर्तवली जात आहे. वंचित घटकांसाठीच्या योजनांच्या प्रभावी अंमलबजावणीसाठी त्यांचा अनुभव उपयोगी ठरेल, अशी चर्चा आहे. राजापूर तालुक्यातील ज्येष्ठ नेते प्रकाश कुवळेकर यांच्या नावाचा विचार शिक्षण व अर्थ समितीसाठी केला जात असल्याचे समजते. शैक्षणिक दर्जा उंचावणे आणि अर्थसंकल्पीय नियोजनात त्यांचा अनुभव महत्त्वाचा ठरेल, असा पक्षाचा विचार असल्याचे सूत्रांकडून सांगितले जाते.गुहागर तालुक्यातील महेश नाटेकर यांना कृषी समिती सभापतीपद दिले जाण्याची शक्यता आहे. कोकणातील शेती व बागायतदारांच्या प्रश्नांवर ठाम भूमिका मांडणारे नेतृत्व म्हणून त्यांच्याकडे पाहिले जाते.दरम्यान, जिल्हा परिषदेचे उपाध्यक्ष विलास चळके यांच्याकडे बांधकाम व आरोग्य या महत्त्वाच्या विभागांची जबाबदारी सोपवली जाऊ शकते. ग्रामीण भागातील रस्ते आणि आरोग्य सुविधांच्या बळकटीसाठी त्यांच्या नेतृत्वाकडून अपेक्षा व्यक्त केली जात आहे. ही सर्व नावे सध्या चर्चेच्या टप्प्यात असून २५ मार्च रोजी होणाऱ्या निवडणुकीपूर्वी पक्षश्रेष्ठींकडून अंतिम निर्णय घेतला जाणार आहे. राजकीय समीकरणे आणि प्रादेशिक समतोल लक्षात घेता या नावांना पसंती मिळण्याची शक्यता वर्तवली जात आहे.या निवडीमुळे जिल्हा परिषदेच्या कामकाजाला नवी गती मिळेल, अशी अपेक्षा व्यक्त होत असून आगामी काळात विकासकामांच्या गतीकडे सर्वांचे लक्ष लागले आहे.

प्रतिनिधी : कोकणधारा खेड (प्रतिनिधी): रत्नागिरीच्या दिशेने भरधाव वेगाने जात असलेल्या कारवरील नियंत्रण सुटल्याने ती थेट जगबुडी नदीवरील पुलाच्या संरक्षक कठड्यावर जाऊन आदळल्याची घटना घडली. या अपघातात कारचा समोरील भाग पूर्णपणे चक्काचूर झाला असून वाहनाचे मोठे नुकसान झाले आहे. मात्र सुदैवाने कोणतीही जीवितहानी झाली नाही. प्रत्यक्षदर्शींच्या माहितीनुसार, कारचा वेग अधिक असल्याने चालकाचा ताबा सुटला आणि गाडी रस्त्यावरून घसरत थेट पुलाच्या कठड्यावर चढली. जर ही कार कठड्यावर अडकली नसती, तर ती थेट सुमारे शंभर ते दीडशे फूट खोल जगबुडी नदीत कोसळली असती. त्यामुळे मोठा अनर्थ टळल्याची भावना व्यक्त केली जात आहे.अपघाताचा आवाज ऐकून इतर वाहनधारक व स्थानिक नागरिकांनी तत्काळ घटनास्थळी धाव घेत मदतकार्य सुरू केले. काही काळासाठी या ठिकाणी बघ्यांची गर्दी झाल्याने वाहतुकीचा वेग मंदावला होता. घटनेची माहिती मिळताच खेड पोलिसांनी घटनास्थळी धाव घेऊन परिस्थिती नियंत्रणात आणली. या अपघाताच्या पार्श्वभूमीवर मुंबई-गोवा महामार्गावरील वाढता वेग आणि प्रवाशांच्या सुरक्षिततेचा प्रश्न पुन्हा एकदा ऐरणीवर आला आहे.

प्रतिनिधी : कोकणधारा खेड (प्रतिनिधी): खेड-दापोली महामार्गावरील फुरूस येथे गुरुवारी सायंकाळी साडेसात ते आठ वाजण्याच्या सुमारास झालेल्या भीषण अपघातात फुरूस बुलेश्वर वाडी येथील सचिन खामकर यांचा जागीच मृत्यू झाला, तर त्यांच्या सोबत असलेली मुलगी गंभीर जखमी झाली आहे. सचिन खामकर हे आपल्या मुलीसह ॲक्टिव्हा दुचाकीवरून प्रवास करत असताना एका अज्ञात भरधाव वाहनाने त्यांच्या दुचाकीला जोरदार धडक दिली. धडक अत्यंत भीषण असल्याने खामकर यांचा जागीच मृत्यू झाला. अपघातात जखमी झालेल्या मुलीला तातडीने जवळच्या रुग्णालयात दाखल करण्यात आले असून तिच्यावर उपचार सुरू आहेत. या घटनेची माहिती मिळताच संतप्त ग्रामस्थांनी घटनास्थळी धाव घेत खेड-दापोली महामार्गावर रस्ता रोको केला. सुमारे तीन ते चार तास चाललेल्या या आंदोलनामुळे महामार्गावरील वाहतूक पूर्णपणे ठप्प झाली होती आणि दोन्ही बाजूंना वाहनांच्या लांबच लांब रांगा लागल्या होत्या. घटनेची माहिती मिळताच खेड पोलिसांनी तत्काळ घटनास्थळी पोहोचून परिस्थिती नियंत्रणात आणली. पोलिसांनी एका संशयित वाहनाला ताब्यात घेतले असून पुढील तपास सुरू आहे.