9 अप्रैल 2026

रत्नागिरी : प्रतिनिधी शहरातील हिंदू कॉलनी परिसरातून गुरुवारी सकाळी 8.15 वा.सुमारास एका युवकाच्या गळ्यातील सोन्याची चेन हिसकावून दोन अज्ञात चोरट्यांनी दुचाकीवरुन पोबारा केला. सायंकाळी उशिरापर्यंत शहर पोलिस ठाण्यात याबाबत कोणतीही नोंद करण्यात आलेली नव्हती. सकाळच्या सुमारास घडलेल्या या धाडसी चोरीमुळे परिसरात प्रचंड खळबळ उडाली असून नागरिकांमध्ये भीतीचे वातावरण निर्माण झाले आहे.हिंदू कॉलनी येथील रहिवासी कांचन जैन हे गुरुवारी सकाळी सव्वा आठच्या सुमारास परिसरात असताना दुचाकीवरून दोन अज्ञात तरुण त्यांच्याजवळ आले. यावेळी चोरट्यांनी त्यांना पत्ता विचारण्याचा बहाणा केला. जैन यांना काही समजण्यापूर्वीच दुचाकीवर मागे बसलेल्या एकाने त्यांच्या गळ्यातील सोन्याच्या चेनवर झडप घातली आणि ती हिसकावून घेतली. चेन हातात लागताच चोरट्यांनी आपल्या काळ्या रंगाच्या दुचाकीवरून वेगाने पलायन केले.चोरीसाठी वापरलेली दुचाकी काळ्या रंगाची असून दोन्ही आरोपी सडपातळ बांध्याचे होते. यातील एकाने तोंडाला रुमाल बांधला होता, तर एक जण उंचीने जास्त होता. हे दोन्ही चोरटे तरुण असून ते एकमेकांशी मराठी भाषेत संवाद साधत होते, असे वर्णन समोर आले आहे. या घटनेची माहिती मिळताच पोलिसांनी घटनास्थळी धाव घेऊन पंचनामा केला असून परिसरातील सीसीटीव्ही फुटेज तपासण्याचे काम सुरू केले आहे. भरवस्तीत आणि वर्दळीच्या वेळी घडलेल्या या प्रकारामुळे चोरट्यांचे धाडस वाढल्याचे दिसून येत आहे. पोलिसांनी या वर्णनाचे तरुण कुठेही संशयास्पदरीत्या दिसून आल्यास किंवा या घटनेबाबत कोणतीही माहिती असल्यास तात्काळ पोलिसांशी संपर्क साधण्याचे आवाहन केले आहे. याप्रकरणी रत्नागिरी शहर पोलीस अधिक तपास करत आहेत.

देवरूख : संगमेश्वर तालुक्यातील आंबा घाटात दख्खननजीक बुधवारी रात्री एक खळबळजनक घटना घडली. बांबावडेकडे बोलेरोमधून म्हैस घेऊन जाणाऱ्या चालकाला आठ जणांच्या टोळीने अडवून त्याच्याकडील २५ हजार रुपये लुटून पोबारा केला. मात्र, देवरूख पोलिसांनी या घटनेचा अत्यंत वेगाने तपास करत ५ आरोपींना तातडीने ताब्यात घेतले असून, उर्वरित ३ जणांचा कसून शोध सुरू आहे. मिळालेल्या माहितीनुसार, बुधवारी रात्री बोलेरो चालक आंबा घाटमार्गे बांबावडेच्या दिशेने म्हैस घेऊन जात होता. गाडी दख्खन परिसराजवळ आली असता, दबा धरून बसलेल्या ८ जणांच्या टोळीने वाहन अडवले. चालकाला धमकावत या टोळीने त्याच्याकडील २५ हजार रुपयांची रोकड जबरदस्तीने हिसकावून घेतली आणि अंधाराचा फायदा घेत पळ काढला. घाटातील या धाडसी लुटीच्या बातमीने परिसरात भीतीचे वातावरण पसरले होते. घटनेची माहिती मिळताच लांजा विभागाचे उपविभागीय पोलीस अधिकारी सुरेश कदम यांच्या मार्गदर्शनाखाली देवरूखचे पोलीस निरीक्षक उदय झावरे यांनी तपासाची चक्रे फिरवली. साखरपा पोलीस दूरक्षेत्राचे सहाय्यक पोलीस उपनिरीक्षक शांताराम पंदेरे, देवरूखचे पोलीस हेड कॉन्स्टेबल सचिन कामेरकर व प्रशांत साळुंखे यांच्या पथकाने तातडीने घटनास्थळी धाव घेतली. तांत्रिक तपास आणि गोपनीय माहितीच्या आधारे पोलिसांनी अवघ्या काही तासांत ५ संशयितांना ताब्यात घेऊन या लुटीचा पर्दाफाश केला. या गुन्ह्यात सहभागी असलेले अन्य ३ आरोपी सध्या फरार असून पोलीस त्यांचा शोध घेत आहेत. “फरार आरोपींची ओळख पटली असून लवकरच त्यांनाही गजाआड केले जाईल,” असा विश्वास पोलिसांनी व्यक्त केला आहे. घटनेचे गांभीर्य ओळखून उपविभागीय पोलीस अधिकारी सुरेश कदम यांनी स्वतः घटनास्थळी भेट देऊन तपासाची पाहणी केली. पोलिसांच्या या जलद कामगिरीचे सर्वत्र कौतुक होत आहे.

रत्नागिरी : प्रतिनिधीतालुक्यातील तरवळ मायंगडेवाडी येथ्ाील दोन घरे फोडून रोख 38 हजार रुपये लांबवले. घरफोडीची ही घटना रविवार 5 एप्रिल रोजी दुपारी 2.30 वा.सुमारास घडली आहे.आदित्य देवचंद कांबळे (26,रा.बालाजी अपार्टमेंट कारवांचीवाडी फाटा,रत्नागिरी) असे गुन्हा दाखल करण्यात आलेल्या संशयिताचे नाव आहे. त्याच्या विरोधात विरेश प्रकाश मायंगडे (29),प्रज्योत रविंद्र मायंगडे (23,दोन्ही रा.तरवळ मायंगडेवाडी,रत्नागिरी) यांनी ग्रामीण पोलिस ठाण्यात खबर दिली आहे. त्यानुसार, संशयिताने विरेश मायंगडे यांच्या घराचा मुख्य दरवाजाचा कोयंडा कोणत्यातरी हत्याराने तोडून घरात प्रवेश केला. त्यानंतर घरातील लोखंडी कपाटाच्या ड्रॉव्हरमधील रोख 33 हजार रुपये चोरुन नेले. तर प्रज्योत मायंगडे यांनी दिलेल्या तक्रारीनुसार, संशयिताने त्यांच्या घराच्या मुख्य दरवाजाचे कुलुप तोडून घरातील भिंतीमध्ये असलेल्या उघड्या कपाटातील छोट्या पाकिटात ठेवलेले रोख 5 हजार रुपये लांबवले. दरम्यान, या घरफोड्या करुन पळून जात असताना संशयित आदित्य कांबळेला विरेश मायंगडे आणि सर्वेश मायंगडे यांनी अडविण्याचा प्रयत्न केला असता त्याने त्यांना धक्काबुक्की करुन पळ काढला.

रत्नागिरी : प्रतिनिधीएसबीआय क्रेडिट कार्डचे इन्शूरन्स डिॲक्टिवेट करण्याची प्रोसेस सांगण्याच्या नावाखाली अज्ञाताने तरुणाचे तब्बल 88 हजार रुपयांची ऑनलाईन फसवणूक केली. ही घटना 12 फेब्रुवारी 2026 रोज्ाी दुपारी 12.30 ते 1.11 वा.कालावधीत टिआरपी येथील यामाहा शोरुममध्ये घडली आहे. प्रसाद रघूनाथ यादव (31,रा.सौम्या रेसिडेन्सी श्रीरामनगर नाचणे,रत्नागिरी) यांनी याबाबत शहर पोलिस ठाण्यात सोमवार 6 एप्रिल रोजी तक्रार दिली आहे. त्यानुसार, 12 फेब्रुवारी रोजी प्रसाद यादव हे टिआरपी येथील यामाहा शोरुममध्ये नोकरी निमित्त असताना त्यांच्या मोबाईलवर अज्ञाताने एसबीआय क्रेडिट कार्ड नावाने फोन केला. त्यानंतर त्याने फिर्यादीला एसबीआय क्रेडिट कार्डवर इन्शूरन्सबाबत विचारणा करुन त्याचा इन्शूरन्स डिॲक्टिवेट करण्याची फोसेस सांगण्यास सुरुवात केली. हे संभाषण होत असताना त्या अज्ञाताने फिर्यादीच्या व्हॉटसॲपवर लिंक पाठवून त्याव्दारे फिर्यादीची वैयक्तिक माहिती भरुन घेतली. त्यानंतर फिर्यादीच्या क्रेडिट कार्डवरुन 87 हजार 642 रुपयांची ऑनलाईन फसवणूक केली.

रत्नागिरी : प्रतिनिधीशहरातील विठ्ठल मंदिर परिसरात मुख्य बाजारपेठेत शुक्रवारी सायंकाळी चोरीची घटना घडली. ग्राहकाचा वेश धारण करून आलेल्या महिला चोरट्यांच्या टोळीने एका महिला विक्रेत्याला बोलण्यात गुंतवून तिची 40 हजार रुपयांची रोकड असलेली पर्स अत्यंत चलाखीने लंपास केली. या प्रकारामुळे व्यापारी आणि नागरिकांमध्ये दहशतीचे वातावरण निर्माण झाले आहे. ही घटना शुक्रवार 3 एप्रिल रोजी सायंकाळी 7.30 वा. सुमारास विठ्ठल मंदिर परिसरात घडली. काही संशयित महिला बाजारपेठेत खरेदीचा बहाणा करत फिरत होत्या.त्यांनी केळी विकणाऱ्या एका महिलेकडे जात केळीचा दर विचारला. विक्रेत्याने 80 रुपये डझन असा दर सांगताच, या महिलांनी जाणीवपूर्वक भावतोल करत हुज्जत घालण्यास सुरुवात केली. यातील एक महिला विक्रेत्याचे लक्ष विचलित करत असतानाच, इतर महिलांनी आजूबाजूला गर्दीचा बनाव केला. याच संधीचा फायदा घेत टोळीतील एका मुलीने विक्रेत्याच्या शेजारी ठेवलेली पर्स लंपास केली.पर्स गायब झाल्याचे लक्षात येताच विक्रेत्याने आरडाओरड केली, मात्र गर्दीचा फायदा घेत ही टोळी तेथून पसार झाली होती. चोरी गेलेल्या पर्समध्ये विक्रेत्याने पिग्मी खात्यातून काढलेली 40 हजार रुपयांची रोकड होती. धक्कादायक बाब म्हणजे याच सुमारास परिसरातील दुसऱ्या एका फळ विक्रेत्या महिलेकडूनही एका महिलेने एक किलो काजूगर लंपास केल्याचे समोर आले आहे. या सलग घटनांमुळे ही टोळी बाजारपेठेत वेगवेगळ्या ठिकाणी सक्रिय असल्याचे स्पष्ट होत आहे. या घटनेची माहिती मिळताच पोलिसांनी सीसीटीव्ही फुटेजच्या आधारे तपास यंत्रणा राबवली असून आरोपीचा शोध घेतला जात आहे. बाजारपेठेत पोलिसांनी गस्त वाढवावी अशी मागणी आता जोर धरत असून अनोळखी व्यक्तीशी आर्थिक व्यवहार करताना विशेष खबरदारी घेण्याचे आवाहन पोलिस प्रशासनाकडून करण्यात आले आहे.

प्रतिनिधी : कोकणधारा देवरुख : रत्नागिरी-कोल्हापूर मार्गावरील आंबा घाट परिसरात गाडी अडवून चाकूचा धाक दाखवत चालकाकडून २५ हजार रुपये लुटणाऱ्या टोळीतील पाच आरोपींना देवरुख पोलिसांनी अवघ्या दोन तासांत अटक केली. या प्रकरणातील आणखी तीन आरोपी फरार असून त्यांचा शोध सुरू आहे. पोलिसांनी दिलेल्या माहितीनुसार, प्रथमेश तानाजी दळवी (रा. शाहुवाडी, जि. कोल्हापूर) हे बोलेरो गाडीतून वेतोशी (ता. रत्नागिरी) येथून शिराळा (जि. सांगली) येथे म्हैस घेऊन जात असताना आंबा घाटातील दख्खन परिसरात दोन गाड्यांनी त्यांची गाडी अडवली. आरोपींनी त्यांना खाली उतरवून मारहाण, शिवीगाळ करत चाकूचा धाक दाखवून जबरदस्तीने इनोव्हा गाडीत बसवले. त्यानंतर साखरपा येथील गंद्रे पेट्रोलपंपाजवळ नेऊन फिर्यादीला अर्ध्या वाटेत सोडून आरोपींनी पळ काढला. यावेळी आरोपींनी ५० हजार रुपयांची मागणी करत गाडीतील २५ हजार रुपये जबरदस्तीने काढून घेतले तसेच पोलिसात तक्रार केल्यास जीवे मारण्याची धमकी दिली. या प्रकरणी साखरपा पोलिस ठाण्यात तक्रार दाखल होताच देवरुख पोलिसांनी तातडीने तपास सुरू करून पाच आरोपींना अटक केली. उर्वरित आरोपींचा शोध सुरू आहे.या गुन्ह्यात फरहान रशीद मुल्ला (४२), प्रथमेश सचिन भाटकर (२४), सर्वेश सुभाष किर (२२), धर्मलिंगम विजयकुमार नाडर (२६) व भूषण बिपेंद्र सावंत (२६, सर्व रा. रत्नागिरी) यांना अटक करण्यात आली आहे.या प्रकरणी देवरुख पोलीस ठाण्यात गुन्हा रजिस्टर क्रमांक ४७/२०२६ अन्वये भारतीय न्याय संहिता २०२३ अंतर्गत गुन्हा दाखल करण्यात आला आहे. पोलीस अधीक्षक नितीन बगाटे व अपर पोलीस अधीक्षक बी. बी. महामुनी यांच्या मार्गदर्शनाखाली उपविभागीय पोलीस अधिकारी सुरेश कदम व पोलीस निरीक्षक उदय झावरे यांच्या पथकाने ही कारवाई केली.