कोकणची बातमी

प्रतिनिधी : कोकणधारा रत्नागिरी : रत्नागिरी जिल्हा परिषदेतील रिक्त असलेल्या विषय समिती सभापतीपदांच्या निवडीचा सस्पेन्स अखेर संपला असून, पालकमंत्री उदय सामंत यांनी पाच महत्त्वाच्या नावांची अधिकृत घोषणा केली आहे. मुख्यमंत्री एकनाथ शिंदे यांच्या मार्गदर्शनाखाली ही निवड करण्यात आली असून, सर्व नियुक्त्या सव्वा वर्षाच्या कालावधीसाठी असणार असल्याचे स्पष्ट करण्यात आले आहे. जिल्हा परिषद प्रशासनाने या निवडीची प्रक्रिया बुधवार, दि. २५ मार्च रोजी पार पडणार असल्याचे यापूर्वीच जाहीर केले होते. जिल्हा परिषदेच्या कामकाजात विषय समित्यांचे महत्त्व अधोरेखित मानले जाते. विविध योजनांची अंमलबजावणी, विभागनिहाय नियोजन आणि निर्णयप्रक्रियेत सभापतींची भूमिका निर्णायक असते. त्यामुळे या निवडीकडे जिल्ह्याचे लक्ष लागले होते.जाहीर करण्यात आलेल्या नावांनुसार, विलास चाळके यांची उपाध्यक्ष (बांधकाम व आरोग्य) म्हणून निवड करण्यात आली आहे. तसेच मयुरी मिलिंद शिर्के (महिला व बालकल्याण), महेश राघू नाटेकर (कृषी व पशुसंवर्धन), अॅड. सुयोग नंदकुमार कांबळे (समाजकल्याण) आणि नंदकुमार नारायण मुरकर (अर्थ व शिक्षण) यांची सभापतीपदी निवड निश्चित करण्यात आली आहे. पक्षांतर्गत शिस्त राखत सर्वांना संधी मिळावी या उद्देशाने ‘सव्वा वर्षांचा’ कार्यकाळ निश्चित करण्यात आला आहे. मुख्यमंत्री व उपमुख्यमंत्री यांच्या सूचनेनुसार ही नाव निश्चिती करण्यात आली असल्याचेही सांगण्यात आले. आगामी काळात ग्रामीण भागातील विकासकामांना गती देणे आणि योजनांची प्रभावी अंमलबजावणी करणे, ही जबाबदारी नव्याने निवड झालेल्या सभापतींवर असणार आहे.

प्रतिनिधी : कोकणधारा चिपळूण : उन्हाळ्याच्या पार्श्वभूमीवर नागरिकांची पिण्याच्या पाण्याची गरज लक्षात घेऊन नगरसेवक संदीप भिसे यांच्या पुढाकारातून शहरातील काविळतळी येथे पाणपोई सुरू करण्यात आली. या पाणपोईचे उद्घाटन नुकतेच पार पडले. यावेळी दक्षिण रत्नागिरी भाजप जिल्हाध्यक्ष प्रशांत यादव यांनी या उपक्रमाचे कौतुक करताना सांगितले की, सर्वसामान्यांसाठी मोफत पिण्याच्या पाण्याची सोय उपलब्ध करून देणे ही अत्यंत महत्त्वाची सामाजिक जबाबदारी आहे. संदीप भिसे यांनी घेतलेली ही पुढाकार अनुकरणीय असून, अशा उपक्रमांमुळे समाजात सेवा, सहकार्य आणि आपुलकीची भावना अधिक दृढ होते. पाणपोईसारख्या उपक्रमातूनही मोठा सामाजिक संदेश दिला जातो, असेही त्यांनी नमूद केले. पुढे बोलताना त्यांनी विश्वास व्यक्त केला की, नगरसेवक संदीप भिसे आगामी काळातही याच सामाजिक बांधिलकीतून काम करत राहतील. या उद्घाटन प्रसंगी भाजपाचे शहराध्यक्ष शशिकांत मोदी, उपनगराध्यक्ष रूपाली दांडेकर, शहराध्यक्ष रसिका देवळेकर, नगरसेविका वैशाली निमकर, हर्षाली पवार, अर्बन बँक संचालक रत्नदीप देवळेकर, तसेच अभिनव भुरण, सपना भिसे, कुणाल आंबेकर, शक्तीकुमार चव्हाण, प्रवीण भिसे, सचिन शिंदे, अमोल भिसे, वेद सुर्वे, यश खंडजोडे, सुरेश भिसे यांच्यासह पदाधिकारी, कार्यकर्ते व स्थानिक नागरिक मोठ्या संख्येने उपस्थित होते.या पाणपोईमुळे परिसरातील नागरिकांना उन्हाळ्यात मोठा दिलासा मिळणार आहे.

रत्नागिरी, दि. 23 (जिमाका) : राज्य निवडणूक आयोगाने ग्रामपंचायतींच्या पोटनिवडणुकांचा कार्यक्रम जाहीर केला असून जिल्ह्यातील 114 ग्रामपंचायतींमधील 174 रिक्त पदांसाठी 28 एप्रिल 2026 रोजी मतदान होणार आहे. या निवडणुकांमुळे संबंधित ग्रामपंचायतींतील रिक्त पदे भरण्यात येणार आहेत. निवडणूक कार्यक्रम जाहीर झाल्यापासून ते निकाल जाहीर होईपर्यंत संबंधित ग्रामपंचायत हद्दीत आचारसंहिता लागू राहणार असल्याची माहिती उपजिल्हाधिकारी विश्वजीत गाताडे यांनी दिली.

प्रतिनिधी : कोकणधारा खेड : तालुक्यातील खाडीपट्टा विभागातील नांदगावजवळ असलेल्या ‘हॉटेल पिकनिक पॉईंट’ला सोमवारी मध्यरात्री अज्ञात व्यक्तींनी आग लावल्याची धक्कादायक घटना घडली. या आगीत हॉटेल पूर्णपणे जळून खाक झाले असून सुमारे 50 हजार ते 1 लाख रुपयांचे नुकसान झाल्याचा अंदाज व्यक्त केला जात आहे. मिळालेल्या माहितीनुसार, सामाजिक कार्यकर्ते जलाल राजपुरकर यांच्या मालकीचे हे हॉटेल असून रात्री साडेबारा वाजण्याच्या सुमारास आग लागल्याची घटना घडली. स्थानिक नागरिकांनी तात्काळ माहिती दिली, मात्र तोपर्यंत आगीने विक्राळ रूप धारण केल्याने संपूर्ण हॉटेल भस्मसात झाले होते. या घटनेमुळे परिसरात खळबळ उडाली असून आग लागण्यामागील कारणाबाबत विविध तर्कवितर्क लावले जात आहेत. संबंधित मालकांनी ही आग जाणीवपूर्वक लावण्यात आल्याचा संशय व्यक्त केला आहे. काही महिन्यांपूर्वी याच ठिकाणी अवैधरित्या प्रवेश करून मद्यप्राशन करणाऱ्यांना पकडल्याची घटना घडली होती. त्यावेळी संबंधितांकडून धमकी व मारहाणीचा प्रयत्नही झाल्याचे सांगण्यात येते. त्यामुळे या आगीचा त्या घटनेशी संबंध असण्याची शक्यता व्यक्त केली जात आहे. दरम्यान, या प्रकरणी अधिक तपास सुरू असून अज्ञात व्यक्तींविरोधात कठोर कारवाई करण्याची मागणी स्थानिकांकडून करण्यात येत आहे.

प्रतिनिधी : कोकणधारा चिपळूण : सर्वधर्म समभाव आणि सामाजिक सलोखा यांचा सुंदर प्रत्यय देणारा एकात्मतेचा संदेश ईद-उल-फितरच्या निमित्ताने चिपळूणमध्ये अनुभवायला मिळाला. शिवसेना (उद्धव बाळासाहेब ठाकरे) पक्षाच्या वतीने मापारी मोहल्ला मस्जिद (प्रभाग क्र. ४) येथे ईदच्या नमाजानंतर मुस्लिम बांधवांना पुष्प देऊन रमजान ईदच्या शुभेच्छा देण्यात आल्या. या उपक्रमातून सणांच्या माध्यमातून समाजात बंधुभाव, प्रेम, एकात्मता आणि सौहार्द वाढवण्याचा संदेश देण्यात आला. “ईदचा सण केवळ धार्मिक उत्सव नसून समाजाला एकत्र आणणारा आणि मानवतेचा संदेश देणारा आहे,” अशा भावना उपस्थित मान्यवरांनी व्यक्त केल्या.या प्रसंगी नगरसेवक अजय भालेकर, वैशाली कदम, संजय गोताड, युवसेना चिपळूण शहर अधिकारी पार्थ जागुष्टे यांच्यासह प्रसाद म्हापुस्कर, लावेश म्हापुस्कर, सुरेश पाथरे, विलास चिपळूणकर, संदिप मनोरकर, प्रकाश साडविलकर, परिमल साडविलकर, गणेश गांधी, सचिन लकेश्री आणि पंकज सावंत आदी मान्यवर उपस्थित होते. अशा उपक्रमांमुळे सामाजिक सलोखा आणि परस्पर आदराची परंपरा अधिक दृढ होत असल्याचे यावेळी अधोरेखित करण्यात आले.