कोकणची बातमी

संगमेश्वर (प्रतिनिधी) – संगमेश्वर तालुक्यातील कसबा परिसरात देवी जाखमातेचा पारंपरिक ‘शिंपणे’ उत्सव बुधवारी अत्यंत उत्साहात आणि भक्तीभावात पार पडला. राज्याच्या विविध भागांतून हजारो भाविकांनी या उत्सवासाठी हजेरी लावत परिसर भक्तिमय आणि रंगमय झाला. उत्सवाची सुरुवात ढोल-ताशांच्या गजरात काढल्या जाणाऱ्या पारंपरिक फेऱ्यांनी झाली. सकाळी ६ वाजल्यापासून रंगांच्या उधळणीला प्रारंभ झाला होता. दुपारी सुमारे ३ वाजता मोठ्या वाहनांमधून लाल रंगाचे पाणी आणून फेऱ्यांमध्ये सहभागी भाविकांवर उधळण्यात आले. रस्त्यांवर तसेच घरांच्या गच्च्यांवरूनही रंगांची बरसात होत असल्याने संपूर्ण कसबा परिसर लाल रंगाने न्हाऊन निघाला. दुपारनंतर उत्सवाला अधिकच रंग चढला. ढोल-ताशा, झांज पथक आणि डीजेच्या तालावर हजारो भाविकांनी नृत्य करत आनंद लुटला. जवळपास पाच ते सहा तास हा जल्लोष सुरू होता. उत्सवादरम्यान प्रत्येक घरात मटण-भाकरी, वडे यांसारख्या पारंपरिक पदार्थांचा बेत करण्यात आला होता. कुटुंबातील सर्व सदस्य एकमेकांना रंगवत आनंद साजरा करत होते. विशेषतः ‘जावई’ मानाचा असल्याने त्याला रंगवण्याची परंपरा मोठ्या उत्साहात पार पडली. महिलांचाही सहभाग लक्षणीय होता. धार्मिक विधींचा भाग म्हणून कसबा येथील चंडिका मंदिर, संगमेश्वर येथील निनावी व जाखमाता मंदिर तसेच फणसवणे येथील मूळ जाखमाता मंदिरात भाविकांनी सकाळपासून दर्शनासाठी गर्दी केली होती. दुपारनंतर देवाला ‘रखवाली’ देण्याची परंपरा पार पडली. यामध्ये नारळ, कोंबडे व बकऱ्यांचा समावेश होता. यापासून तयार करण्यात आलेला प्रसाद आणि रात्री हौद फोडल्यानंतरचा प्रसाद एकत्र करून हजारो भाविकांना मटण-भाकरीचे वाटप करण्यात आले. रात्री सुमारे १० वाजता पारंपरिक विधीनुसार मानकरी मंडळींच्या उपस्थितीत पाण्याचा हौद फोडण्यात आला. त्यानंतर प्रसाद वाटपाने उत्सवाची सांगता करण्यात आली. उत्सवादरम्यान कोणताही अनुचित प्रकार घडू नये यासाठी संगमेश्वर पोलीस ठाण्याचे पोलीस निरीक्षक राजाराम चव्हाण यांच्या मार्गदर्शनाखाली कडक पोलीस बंदोबस्त ठेवण्यात आला होता. सर्व कार्यक्रम शांततेत पार पडल्याबद्दल उत्सव समितीने भाविकांचे आभार मानले.

प्रतिनिधी : कोकणधारा चिपळूण: तालुक्यातील कोकरे जिल्हा परिषद गटातील असुर्डे खापरेवाडी येथील ग्रामस्थांनी आमदार शेखर निकम यांच्या विकासाभिमुख कार्यपद्धतीवर विश्वास ठेवत राष्ट्रवादी काँग्रेस पार्टीमध्ये जाहीर प्रवेश केला. या प्रवेशामुळे स्थानिक राजकारणात चांगलीच चर्चा रंगली असून शिवसेना (उबाठा) पक्षाला मोठा धक्का बसल्याचे मानले जात आहे. या प्रवेश सोहळ्यात सोमा खापरे, काशिनाथ खापरे, संतोष खापरे, अजित खापरे, सुमित खापरे, राजेंद्र खापरे, प्रमोद खापरे, प्राजक्ता खापरे, अंकित खापरे, वंदना खापरे, शशिकांत खापरे, सुगंधा खापरे, योगेश खापरे, आरती खापरे, स्वाती खापरे, आयुष आग्रे, आर्यन खापरे, दिनेश खेराडे, सुजाता खेराडे, नरेंद्र खापरे, मानसी खापरे, राजेश आग्रे, कृष्णा आग्रे, अरुण आग्रे, अर्चना आग्रे, सायली आग्रे, मंगेश खापरे, गणपत खापरे, मिनाक्षी खापरे, अंजली खापरे, मारुती खापरे, प्रणय खापरे, बापूजी खापरे, सुजाता खापरे, महेंद्र खापरे, सुस्मिता खापरे, पांडूरंग खापरे, प्रतिभा खापरे, महेश खापरे, शांताराम शिगवण, विशाल शिगवण, दत्ताराम खापरे, कृष्णा खापरे, सुरज खापरे, सावी खापरे, रेश्मा खापरे, शर्मिला भुवड, धोंडू भुवड, संदेश खापरे, पारस खापरे, गणेश खापरे, सृष्टी खापरे, नारायण खापरे, ओम खापरे, सार्थक खापरे, निखील खापरे, ओम भुवड यांनी उत्स्फूर्तपणे सहभाग घेत राष्ट्रवादी काँग्रेसमध्ये प्रवेश केला. यावेळी आमदार शेखर निकम यांनी सर्व नवप्रवेशितांचे संपर्क कार्यालयात मनापासून स्वागत करत त्यांच्याशी सविस्तर संवाद साधला. ग्रामस्थांच्या अडचणी जाणून घेत त्या सोडवण्यासाठी आणि विकासात्मक कामांना गती देण्यासाठी आपण सदैव कटिबद्ध राहू, असा विश्वास त्यांनी व्यक्त केला. या प्रवेशामुळे पक्ष संघटना अधिक मजबूत होईल, असेही त्यांनी नमूद केले. नवनिर्वाचित सावर्डे जिल्हा परिषद सदस्या पुजा निकम यांनीही प्रवेशकर्त्यांचे स्वागत करत पक्षवाढीसाठी शुभेच्छा दिल्या. तसेच कोकरे जि.प. गट सदस्य संजय कदम यांनीही ग्रामस्थांचे स्वागत करून भविष्यात विकासकामांबाबत ठामपणे पाठीशी उभे राहण्याचा शब्द दिला. या कार्यक्रमास राष्ट्रवादी तालुका उपाध्यक्ष दत्ताराम गुजर, आरडीसीसी संचालक राजेंद्र सुर्वे, सरपंच पंकज साळवी, सुधीर राजेशिर्के, निलेश खापरे यांच्यासह कोकरे जिल्हा परिषद गटातील पदाधिकारी व कार्यकर्ते मोठ्या संख्येने उपस्थित होते. हा प्रवेश केवळ राजकीय बदल नसून विकासाच्या दिशेने उचललेले ठोस पाऊल असल्याची भावना ग्रामस्थांनी व्यक्त केली. आमदार शेखर निकम यांच्या नेतृत्वाखाली परिसराच्या सर्वांगीण विकासाला नवी दिशा मिळेल, असा विश्वास यावेळी व्यक्त करण्यात आला.

प्रतिनिधी : कोकणधारा सांगली : S3 Training Academy यांच्या वतीने 19 एप्रिल 2026 रोजी स्प्रिंट ड्युअॅथलॉन स्पर्धेचे आयोजन करण्यात आले असून या स्पर्धेसाठी आयर्न मॅन प्रशांत दाभोळकर यांची रेस अँबेसिडर म्हणून निवड करण्यात आली आहे. देशभरातील खेळाडू या स्पर्धेत सहभागी होणार असून विजेत्यांना रोख पारितोषिक व सन्मानचिन्ह देऊन गौरविण्यात येणार आहे. गेल्या तीन वर्षांपासून S3 Training Academy फिटनेस आणि एंड्युरन्स खेळांना प्रोत्साहन देण्यासाठी ही स्पर्धा आयोजित करत आहे. स्पर्धेचे स्वरूप आव्हानात्मक असून त्यामध्ये प्रथम 5 किलोमीटर धावणे, त्यानंतर 20 किलोमीटर सायकलिंग आणि शेवटी 2.5 किलोमीटर धावणे असा क्रम असणार आहे.या स्पर्धेत महाराष्ट्रासह देशातील विविध राज्यांमधील खेळाडू उत्साहाने सहभागी होतात. 18 ते 30, 31 ते 45, 46 ते 55 तसेच 56 वर्षांवरील अशा विविध वयोगटांमध्ये स्पर्धा होणार असल्याने सर्व वयोगटातील खेळाडूंना आपल्या क्षमतेची चाचणी घेण्याची संधी मिळणार आहे. स्पर्धा पूर्ण करणाऱ्या प्रत्येक स्पर्धकाला आकर्षक ट्रॉफी देण्यात येणार असून प्रत्येक गटातील प्रथम तीन विजेत्यांना रोख पारितोषिक व सन्मानचिन्ह देऊन सन्मानित करण्यात येईल.या उपक्रमामुळे रनिंग आणि सायकलिंग या खेळांबाबत जनजागृती होत असून फिटनेस संस्कृतीला चालना मिळत आहे. त्यामुळे रत्नागिरी जिल्ह्यातील जास्तीत जास्त खेळाडूंनी या स्पर्धेत सहभागी व्हावे, असे आवाहन S3 Training Academy चे रेस डायरेक्टर व अध्यक्ष संतोष शिंदे आणि रेस अँबेसिडर आयर्न मॅन प्रशांत दाभोळकर यांनी केले आहे.