क्राईम

प्रतिनिधी : कोकणधारा रत्नागिरी :- शहरातील मारुती मंदिर परिसरातील सुमित्रा ज्वेलर्स येथे अज्ञात चोरट्यांनी शटर तोडून चोरी केल्याची घटना उघडकीस आली आहे. या चोरीत ज्वेलर्समधून चांदीचे दागिने लंपास करण्यात आल्याचे समोर आले असून, ही घटना पहाटेच्या सुमारास घडल्याचा प्राथमिक अंदाज पोलिसांनी वर्तवला आहे. या घटनेमुळे शहरातील व्यापाऱ्यांमध्ये भीतीचे वातावरण निर्माण झाले आहे. चोरीची माहिती मिळताच रत्नागिरी शहर पोलिसांनी तातडीने घटनास्थळी धाव घेत पंचनामा केला. या प्रकरणाचा तपास करताना पोलिसांनी परिसरातील सीसीटीव्ही फुटेज ताब्यात घेतले असून, त्याच्या आधारे चोरट्यांचा शोध सुरू करण्यात आला आहे. तसेच दुकानातील सीसीटीव्ही फुटेजही तपासण्यात येत आहेत. या तपासात प्रभारी शहर पोलिस निरीक्षक राजेंद्र यादव, सहायक पोलिस निरीक्षक तानाजी पवार, पोलिस उपनिरीक्षक सागर शिंदे तसेच पोलिस कर्मचाऱ्यांनी परिसरात पाहणी करून काही धागेदोरे मिळतात का, याचा शोध घेतला.

प्रतिनिधी : कोंकणधारा मंडणगड : तालुक्यातील शिरगाव येथे पाण्याचे इलेक्ट्रिक पंप चोरीच्या दोन घटना उघडकीस आल्या असून या प्रकरणी चार संशयितांविरोधात मंडणगड पोलीस स्थानकात २६ मार्च रोजी गुन्हा दाखल करण्यात आला आहे. पोलिसांनी दिलेल्या माहितीनुसार, सिकंदर कनोजिया (३०), मोहित कनोजिया (२१) दोघेही रा. महाड, तसेच आकाश पवार (२५) व अविनाश जाधव (२१) दोघेही रा. आकले या चौघांचा यात समावेश आहे. पहिली घटना २५ मार्च रोजी शिरगाव गोमुख येथे घडली. याबाबत सुनील पाटील (४६, व्यवसाय पंपचालक, रा. शिरगाव) यांनी फिर्याद दिली आहे. आरोपींनी पंपहाऊसच्या दरवाजाच्या खालच्या बाजूच्या फळ्या उचकटून आत प्रवेश केला आणि सुमारे दहा हजार रुपये किंमतीचा पाच एच.पी. क्षमतेचा बंद स्थितीतील पाण्याचा इलेक्ट्रिक पंप चोरून नेला. दुसरी घटना याच दिवशी शिरगाव धर्मा येथे घडली. याबाबत आत्माराम जोंधळे (६२, व्यवसाय शेती, रा. तेरडी सुतारवाडी) यांनी तक्रार दाखल केली आहे. आरोपींनी पंपहाऊसचा सिमेंटचा दरवाजा उचकटून आत प्रवेश करत सुमारे वीस हजार रुपये किंमतीचा बारा एच.पी. क्षमतेचा दुरुस्तीसाठी ठेवलेला जुना पाण्याचा इलेक्ट्रिक पंप चोरून नेला. दोन्ही प्रकरणांमध्ये एकाच आरोपींचा सहभाग असल्याचा संशय असून त्यांच्याविरोधात गुन्हा नोंदविण्यात आला आहे. या प्रकरणाचा पुढील तपास मंडणगड पोलीस करीत आहेत.

प्रतिनिधी : कोंकणधारा रत्नागिरी : जुन्या वादातून तसेच एका तरुणीशी बोलतोय या संशयातून २९ वर्षीय तरुणाला चौघांनी रॉडने बेदम मारहाण केल्याची घटना शहरातील राजीवडा येथील पुलाखाली गुरुवारी रात्री घडली. पोलिसांनी दिलेल्या माहितीनुसार, या घटनेत गंभीर जखमी झालेल्या अरमान नझीर होडेकर यांनी फिर्याद दिली आहे. त्यानुसार, रमजान नवाज मिरकर, साजिद बावा मिरकर, अझरुद्दीन अलीमिया मुजावर आणि महम्मद बावा मिरकर (सर्व रा. राजीवडा पुलाखाली, रत्नागिरी) या चौघांविरोधात गुन्हा दाखल करण्यात आला आहे. अरमान होडेकर आणि आरोपी हे सर्व एकाच परिसरातील रहिवासी असून परस्पर परिचित आहेत. जैतापूर (ता. राजापूर) येथील एका सामायिक मैत्रिणीने रमजान मिरकर याचे काही सामान अरमान यांच्याकडे दिले होते. ते सामान पोहोचवण्यासाठी जात असताना, फिर्यादी त्या तरुणीला का भेटतो आणि तिच्याशी का बोलतो, असा संशय रमजान मिरकर याने घेतला. याच कारणावरून दोघांमध्ये शाब्दिक वाद झाला. पुढे या वादाचे रूपांतर हाणामारीत झाले. या वेळी रमजान मिरकर याला इतर तिघांनी साथ देत चौघांनी मिळून अरमान याला रॉडने मारहाण केली.

प्रतिनिधी : कोंकणधारा संगमेश्वर : तालुक्यातील निवे बुद्रुक-शिंदेवाडी येथे घराचे किंवा कपाटाचे कोणतेही कुलूप न तोडता कपाटातच ठेवलेल्या चावीचा वापर करून अज्ञात चोरट्याने सोन्याचे दागिने लंपास केल्याची घटना उघडकीस आली आहे. ही घटना २४ फेब्रुवारी ते ५ मार्च २०२६ या कालावधीत घडली असून ५ मार्च रोजी ती उघड झाली. याबाबत सर्वत्र शोधाशोध केल्यानंतर २७ मार्च रोजी देवरूख पोलिस स्थानकात फिर्याद नोंदवण्यात आली. पोलिसांनी दिलेल्या माहितीनुसार, संतोष दौलत पाल्ये (वय ५६) यांनी तक्रार दाखल केली आहे. त्यांचे निवे बुद्रुक येथे सामायिक घर असून, घटनेच्या वेळी कपाटाच्या लॉकरची चावी घरातच ठेवलेली होती. चोरट्याने याचाच फायदा घेत कपाट उघडून दोन तोळे सोन्याचा हार आणि दोन तोळे सोन्याची चेन, असे एकूण चार तोळे सोन्याचे दागिने चोरून नेले. घरामध्ये कोणत्याही प्रकारची तोडफोड किंवा जबरदस्तीच्या खुणा आढळून न आल्यामुळे, घरातील व्यवस्था आणि चाव्यांची माहिती असलेल्या एखाद्या जवळच्या किंवा परिचित व्यक्तीनेच ही चोरी केली असावी, असा संशय व्यक्त करण्यात येत आहे. दरम्यान, पोलिसांनी या घटनेची दखल घेत परिसरातील संशयितांची चौकशी सुरू केली असून पुढील तपास देवरूख पोलिसांकडून सुरू आहे.

प्रतिनिधी : कोकणधारा चिपळूण : शहरातील बाजारपेठ परिसरात एका दुकानात काम करणाऱ्या महिला कर्मचाऱ्याची कथित छेड काढणाऱ्या तरुणाला संबंधित महिलेच्या भावाने बेदम मारहाण केल्याची घटना शुक्रवारी दुपारी सुमारे तीन वाजण्याच्या सुमारास घडली. या प्रकारामुळे बाजारपेठ परिसरात काही काळ तणावाचे वातावरण निर्माण झाले होते. घटनेनंतर रात्री उशिरापर्यंत चिपळूण पोलीस ठाण्यात दोन्ही बाजूंनी परस्परविरोधी तक्रारी दाखल करण्यात आल्या. मिळालेल्या माहितीनुसार, तक्रारदार महिला आणि संबंधित तरुण हे दोघेही शहरातील बाजारपेठेतील एका दुकानात कामाला आहेत. कामाच्या ठिकाणी संबंधित तरुणाकडून महिलेला वारंवार त्रास दिला जात असल्याची चर्चा असून, याबाबत त्याला यापूर्वीही समज देण्यात आल्याचे सांगितले जात आहे. मात्र, समज देऊनही त्याच्या वर्तनात कोणताही बदल न झाल्याने संबंधित महिला मानसिक त्रासात होती, अशी माहिती पुढे आली आहे. शुक्रवारी दुपारी हा प्रकार पुन्हा घडल्याने महिलेच्या कुटुंबीयांमध्ये संतापाची लाट उसळली. याची माहिती मिळताच महिलेचा भाऊ थेट दुकानाजवळ पोहोचला.त्यानंतर संबंधित तरुणाला जाब विचारण्यात आला. या वेळी दोघांमध्ये सुरुवातीला शाब्दिक वाद झाला. हा वाद काही क्षणांतच विकोपाला गेला आणि संतापाच्या भरात महिलेच्या भावाने तरुणाला मारहाण केल्याचे समोर आले आहे.घटनेदरम्यान परिसरातील काही नागरिक आणि व्यापाऱ्यांनी मध्यस्थी करत परिस्थिती नियंत्रणात आणण्याचा प्रयत्न केला. अचानक घडलेल्या या प्रकारामुळे बाजारपेठेत काही काळ गोंधळाचे वातावरण निर्माण झाले होते. दुपारच्या वेळी बाजारपेठेत नागरिकांची वर्दळ मोठ्या प्रमाणात असल्याने या घटनेकडे अनेकांचे लक्ष वेधले गेले. दरम्यान, या प्रकरणात संबंधित महिलेच्या बाजूने छेडछाडीबाबत तक्रार देण्यात आली असून, दुसरीकडे मारहाण झालेल्या तरुणानेही स्वतःवर हल्ला झाल्याची तक्रार नोंदवली आहे. त्यामुळे पोलीस दोन्ही बाजूंच्या तक्रारींची पडताळणी करत असून, दुकानातील सहकारी, परिसरातील साक्षीदार तसेच उपलब्ध सीसीटीव्ही फुटेजची तपासणी केली जाण्याची शक्यता आहे.चिपळूण पोलीस ठाण्याचे अधिकारी या प्रकरणाचा अधिक तपास करत असून, सत्य परिस्थिती समोर आल्यानंतर पुढील कायदेशीर कारवाई केली जाणार असल्याचे समजते. महिला सुरक्षिततेचा प्रश्न पुन्हा एकदा ऐरणीवर आला असून, कामाच्या ठिकाणी होणाऱ्या अशा प्रकारांविषयी व्यापारी वर्तुळातही चिंता व्यक्त केली जात आहे. घटनेमुळे बाजारपेठ परिसरात चर्चेला उधाण आले असून, नेमका प्रकार काय घडला, याबाबत विविध स्तरावर चर्चा सुरू आहे. पोलीस तपासानंतर या प्रकरणाचे स्पष्ट चित्र समोर येणार आहे.