प्रतिनिधी : कोकणधारा
खेड : खेड तालुक्यातील हेदली बाजारवाडी येथे सामाईक वाड्यातील वादातून मायलेकासह सुनेवर लोखंडी पाईपने हल्ला केल्याची गंभीर घटना उघडकीस आली आहे. या प्रकरणी एकाच कुटुंबातील चौघांविरुद्ध गुन्हा दाखल करण्यात आला आहे.
पोलीस सूत्रांनी दिलेल्या माहितीनुसार, फिर्यादी अपर्णा जनार्दन शिंदे (वय ५२) या आपल्या मुलासह सामाईक वाड्यात राहत आहेत. ३० मार्च रोजी रात्री सुमारे १०:३० वाजता घरदुरुस्तीचे साहित्य ठेवण्याच्या कारणावरून त्यांचा मुलगा करण हा बोलण्यासाठी गेला असता, पुतण्या मयूर मनोहर शिंदे याने जागा देण्यास नकार देत शिवीगाळ सुरू केली.
वाद वाढताच अपर्णा शिंदे व त्यांची सून काव्या घटनास्थळी पोहोचल्या. यावेळी मयूरची पत्नी मयुरी शिंदे हिने सुनेला पकडून मारहाण केली. त्यानंतर मयूर शिंदे याने घरातून लोखंडी पाईप आणून अपर्णा शिंदे यांच्या हाताच्या मनगटावर जोरदार प्रहार केला. या हल्ल्यात त्या गंभीर जखमी झाल्या.
तक्रारीनुसार, मयुरी शिंदे, कलावती मनोहर शिंदे आणि सुप्रिया केतन शिंदे यांनीही फिर्यादींना पकडून ठेवत मारहाणीला साथ दिली.
घटनेनंतर जखमींना तातडीने कळंबणी येथील उपजिल्हा रुग्णालयात उपचारासाठी दाखल करण्यात आले. खेड पोलिसांनी मयूर मनोहर शिंदे (३६), मयुरी मयूर शिंदे (२८), कलावती मनोहर शिंदे (५५) आणि सुप्रिया केतन शिंदे (२८) यांच्याविरुद्ध भारतीय न्याय संहिता (BNS) २०२३ अंतर्गत कलम ११८(१), ११५(२), ३५२ आणि ३(५) अन्वये गुन्हा नोंदवला आहे.
या प्रकरणाचा पुढील तपास महिला पोलीस हवालदार अस्मिता साळवी करत असून, पोलीस निरीक्षक विवेक अहिर यांच्या मार्गदर्शनाखाली कायदेशीर प्रक्रिया सुरू आहे. सामाईक मालमत्तेच्या वादातून झालेल्या या हल्ल्यामुळे परिसरात भीतीचे वातावरण निर्माण झाले आहे.
By
