27 मई 2026

सिंधुदुर्ग : भूषण सावंत सिंधुदुर्ग जिल्ह्यात पेट्रोल आणि डिझेलचा तुटवडा निर्माण होऊ नये यासाठी जिल्हा प्रशासनाने सतर्कता बाळगली असून परिस्थितीवर सातत्याने लक्ष ठेवण्यात येत आहे. जिल्ह्यातील एकूण ६० पेट्रोलपंपांपैकी ८ पेट्रोलपंपांवर इंधन उपलब्धतेसंदर्भात अडचणी निर्माण झाल्याचे प्रशासनाच्या निदर्शनास आले आहे. प्रशासनाने दिलेल्या माहितीनुसार, ६ पेट्रोलपंपांवर पेट्रोल आणि डिझेल या दोन्ही इंधनांचा तात्पुरता तुटवडा आहे. तसेच २ पेट्रोलपंपांपैकी एका पंपावर केवळ पेट्रोल उपलब्ध असून डिझेल उपलब्ध नाही, तर दुसऱ्या पंपावर डिझेल उपलब्ध असून पेट्रोल उपलब्ध नसल्याचे स्पष्ट करण्यात आले आहे. ड्राय असलेल्या पेट्रोलपंपांचे टँकर लोड करण्यात आले असून उद्यापर्यंत परिस्थिती पूर्ववत होईल, अशी माहिती कंपन्यांचे विक्रय प्रतिनिधी आणि डेपो व्यवस्थापकांनी प्रशासनाला दिली आहे. त्यामुळे नागरिकांनी इंधनासंदर्भात भीती बाळगण्याचे कारण नसल्याचे प्रशासनाने स्पष्ट केले आहे. उर्वरित बहुतांश पेट्रोलपंप सुरळीत सुरू असून संबंधित कंपन्यांच्या पुरवठ्यानुसार आणि डेपोमधील मागणीनुसार इंधन वितरण सुरू असल्याचे प्रशासनाने सांगितले आहे. त्यामुळे नागरिकांनी अफवांवर विश्वास ठेवू नये आणि घाबरून इंधनाचा अतिरिक्त साठा करू नये, असे आवाहन करण्यात आले आहे. दरम्यान, सिंधुदुर्ग जिल्ह्यात पेट्रोल आणि डिझेलची कृत्रिम टंचाई निर्माण होऊ नये यासाठी प्रशासनाने Hindustan Petroleum (HPCL), Indian Oil Corporation (IOCL) आणि Bharat Petroleum (BPCL) या कंपन्यांच्या डेपो व्यवस्थापक आणि विक्री प्रतिनिधींशी सातत्याने संपर्क ठेवला आहे. याशिवाय, कृत्रिम दरवाढ किंवा इंधन साठेबाजीचे प्रकार रोखण्यासाठी तालुकास्तरावर भरारी पथके सक्रिय करण्यात आली आहेत. पेट्रोलपंपांची तपासणी आणि छापे टाकण्याचे आदेश देण्यात आले असून, कोणत्याही प्रकारचा गैरप्रकार आढळल्यास संबंधितांविरोधात कठोर कारवाई करण्यात येणार असल्याचा इशाराही प्रशासनाने दिला आहे.

दोडामार्ग : भूषण सावंत: जिल्ह्यात पावसाळा सुरू होण्यापूर्वीच वीज विभागाच्या कारभाराबाबत नागरिकांमध्ये तीव्र नाराजी व्यक्त होत आहे. अवकाळी पावसात वारंवार खंडित होणारी वीज सेवा, तासन्तास अंधारात राहणारी गावे, दुरुस्तीला होणारा विलंब तसेच ग्राहकांच्या तक्रारींकडे होणारे दुर्लक्ष यामुळे महावितरणच्या कार्यक्षमतेवरच प्रश्नचिन्ह निर्माण झाले आहे. आगामी पावसाळ्यात वीज विभाग सक्षमपणे सेवा देऊ शकेल का? असा संतप्त सवाल आता सर्वसामान्य विज ग्राहकांकडून उपस्थित केला जात आहे. या पार्श्वभूमीवर सिंधुदुर्ग वीज ग्राहक संघटनेच्या वतीने सोमवार दिनांक २५ मे रोजी सकाळी ११ ते दुपारी २ वाजेपर्यंत कुडाळ येथील जिल्हा अधीक्षक अभियंता कार्यालयात जाब विचारणा आंदोलन छेडण्यात येणार आहे. जिल्ह्यातील तमाम विज ग्राहकांनी आपल्या लेखी तक्रारींसह मोठ्या संख्येने उपस्थित राहावे, असे आवाहन संघटनेचे जिल्हाध्यक्ष संजय लाड, समन्वयक ॲड. नंदन वेंगुर्लेकर आणि सोशल मीडिया प्रमुख मनोज घाटकर यांनी केले आहे. “पावसाळा सुरू होण्यापूर्वीच वीज यंत्रणा कोलमडत असेल तर मुसळधार पावसात परिस्थिती किती बिकट होईल, याची कल्पना न केलेली बरी,” असा आक्रमक इशाराही संघटनेच्या पदाधिकाऱ्यांनी दिला आहे. वारंवार होणारे वीज खंडित प्रकार, झाडांच्या फांद्या न छाटणे, जुनाट तारांमुळे उद्भवणारे धोके, ग्रामीण भागातील दुर्लक्षित सेवा आणि ग्राहकांना मिळणारी असमाधानकारक वागणूक याबाबत प्रशासनाला थेट जाब विचारला जाणार असल्याचे स्पष्ट करण्यात आले. सिंधुदुर्ग जिल्ह्यातील नागरिकांनी आता शांत न बसता आपल्या हक्कासाठी एकत्र येण्याची गरज असल्याचे मत व्यक्त करत, या आंदोलनात मोठ्या संख्येने सहभागी होण्याचे आवाहन करण्यात आले आहे.