Editorial

प्रतिनिधी : कोकणधारा रत्नागिरी : कोकणातील आंबा आणि काजू उत्पादक शेतकरी आता शेतकरी नेते राजू शेट्टी यांच्या नेतृत्वाखाली एकवटले आहेत. राज्य सरकारने जाहीर केलेली हेक्टरी २२ हजार रुपयांची आर्थिक मदत तुटपुंजी असल्याचा आरोप करत शेतकऱ्यांनी व्यापक आंदोलन उभारण्याचा निर्णय घेतला आहे. रत्नागिरी जिल्ह्यात झालेल्या बैठकीत आंबा व काजू बागायतदार शेतकऱ्यांनी एकदिलाने लढा उभारण्याचा निर्धार व्यक्त केला. औषध फवारणी, खते, मजुरी आणि वाहतूक खर्च मोठ्या प्रमाणात वाढला असून, लाखो रुपयांचा खर्च होत असताना केवळ २२ हजार रुपयांची मदत अपुरी ठरत असल्याचे शेतकऱ्यांचे म्हणणे आहे. एका आंबा बागेचा वार्षिक खर्च पाहता ही रक्कम फवारणीच्या एका टप्प्यासाठीही पुरेशी नसल्याची भावना व्यक्त करण्यात आली. वारंवार होणाऱ्या नैसर्गिक नुकसानीमुळे कोकणातील शेतकरी कर्जबाजारी होत चालला आहे. अशा परिस्थितीत सरकारची मदत ही शेतकऱ्यांच्या जखमेवर मीठ चोळणारी असल्याची टीका करण्यात आली. तसेच पीकविमा कंपन्यांकडून होत असलेल्या अन्यायकारक वागणुकीबाबत आणि कर्जमाफीतील कठोर अटींबाबतही नाराजी व्यक्त करण्यात आली. या पार्श्वभूमीवर मुंबईत मोठे आंदोलन उभारण्याचा निर्णय घेण्यात आला असून रत्नागिरी, सिंधुदुर्ग, रायगड, पालघर आणि ठाणे जिल्ह्यांतील शेतकऱ्यांना सहभागी करून घेण्यात येणार आहे. दरम्यान, ४ एप्रिल रोजी देवगड येथे होणाऱ्या शेतकरी मेळाव्यास उपस्थित राहण्याचे आवाहन राजू शेट्टी यांनी केले आहे. या बैठकीस माजी आमदार बाळा माने, सुशांत नाईक, राजेंद्र गड्यान्नावर, विनायक कदम, प्रकाश साळवी यांच्यासह जिल्ह्यातील अनेक आंबा बागायतदार शेतकरी उपस्थित होते.

प्रतिनिधी : कोकणधारा चिपळूण : तालुक्यातील गाणे-खडपोली परिसरात घडलेल्या एका दुर्दैवी घटनेने खळबळ उडाली आहे. जंगलात लागलेल्या वणव्यात होरपळून तारामती तुकाराम वाघे (वय ७०) यांचा मृत्यू झाल्याची घटना उघडकीस आली आहे. या घटनेमुळे परिसरात हळहळ व्यक्त होत असून नागरिकांमध्ये चिंतेचे वातावरण निर्माण झाले आहे. मिळालेल्या माहितीनुसार, तारामती वाघे या मागील चार ते पाच दिवसांपासून बेपत्ता होत्या. त्या काही अंशी मानसिक आजाराने त्रस्त होत्या. त्यामुळे त्या अनेकदा घरातून निघून जात असत आणि काही वेळाने पुन्हा घरी परतत असत. यामुळे सुरुवातीला कुटुंबीयांनाही त्या पुन्हा परत येतील, अशी अपेक्षा होती. दरम्यान, गाणे परिसरातील जंगलात चार दिवसांपूर्वी मोठा वनवा लागला होता. त्यानंतर एका व्यक्तीने जंगलातून लाकडाची फाटी आणण्यासाठी जंगलात गेल्यानंतर त्याला जळालेल्या अवस्थेतील एक मृतदेह आढळून आला. मृतदेहाजवळील साडीवरून तो मृतदेह तारामती वाघे यांचाच असल्याची ओळख पटली.या घटनेची माहिती तत्काळ अलोरे-शिरगाव पोलिसांना देण्यात आली. माहिती मिळताच पोलिसांनी घटनास्थळी धाव घेत पंचनामा केला. त्यानंतर मृतदेह ताब्यात घेऊन शिरगाव प्राथमिक आरोग्य केंद्रात शवविच्छेदनासाठी पाठविण्यात आला. प्राथमिक माहितीनुसार, जंगलात लागलेल्या वणव्याच्या तीव्रतेमुळे तारामती वाघे या होरपळून मृत्यूमुखी पडल्या असाव्यात, असा अंदाज व्यक्त करण्यात येत आहे. मात्र, मृत्यूचे नेमके कारण शवविच्छेदन अहवालानंतर स्पष्ट होणार आहे. या घटनेमुळे जंगल परिसरात लागणाऱ्या वणव्यांच्या वाढत्या घटनांबाबत गंभीर चिंता व्यक्त केली जात आहे. उन्हाळ्याच्या दिवसांत वणव्यांच्या घटना वाढत असल्याने जंगलालगत राहणाऱ्या नागरिकांनी अधिक सतर्क राहण्याचे आवाहन प्रशासन आणि स्थानिकांकडून करण्यात येत आहे.

प्रतिनिधी : कोकणधारा चिपळूण : आखिल भारतीय मराठी नाट्य परिषद, शाखा चिपळूण यांच्या वतीने दरवर्षीप्रमाणे यंदाही बालनाट्य शिबिराचे तिसरे वर्ष उत्साहात आयोजित करण्यात आले असून, हे शिबिर दि. १ मे ते १० मे या कालावधीत पार पडणार आहे. बालकांमधील अभिनय, वक्तृत्व, संवादकौशल्य, आत्मविश्वास, रंगभूमीची आवड आणि सर्जनशीलता विकसित करण्याच्या उद्देशाने या शिबिराचे आयोजन करण्यात आले आहे. या शिबिरामध्ये मुलांना नाट्याभिनय, संवादफेक, आवाजाचा वापर, देहबोली, रंगमंचावरील वावर, समूह सादरीकरण, व्यक्तिमत्त्व विकास अशा विविध कलात्मक व उपयुक्त घटकांचे प्रशिक्षण दिले जाणार आहे. त्यामुळे मुलांच्या सर्वांगीण विकासासाठी हे शिबिर उपयुक्त ठरणार असल्याचा विश्वास आयोजकांनी व्यक्त केला आहे. यंदाच्या शिबिरासाठी प्रवेश मर्यादित असल्याने नियमितपणे शिबिरात सहभागी होणाऱ्या मुलांना प्रथम प्राधान्य देण्यात येणार असल्याचे स्पष्ट करण्यात आले आहे. त्यामुळे इच्छुक पालकांनी पुढील दोन दिवसांत आपल्या मुलांची नावनोंदणी करून प्रवेश निश्चित करून घ्यावा, असे आवाहन करण्यात आले आहे. शिबिराच्या वेळापत्रकाबाबत माहिती देताना आयोजकांनी सांगितले की, दि. १ मे रोजी शिबिराची वेळ सकाळी १० ते सायंकाळी ४ अशी राहणार आहे. त्यानंतर नेहमीप्रमाणे दररोज सकाळी ८ ते दुपारी २ या वेळेत शिबिराचे सत्र होणार आहे. गेल्या दोन वर्षांत या बालनाट्य शिबिराला चिपळूण व परिसरातील पालक आणि विद्यार्थ्यांकडून उत्स्फूर्त प्रतिसाद मिळाला होता. अनेक मुलांनी या शिबिरातून रंगभूमी, अभिनय आणि सांस्कृतिक उपक्रमांमध्ये सक्रिय सहभाग घेत आपली कला खुलवली आहे. त्यामुळे यंदाच्या तिसऱ्या वर्षीही या शिबिराबाबत मोठी उत्सुकता निर्माण झाली आहे. बालकांच्या सुप्त कलागुणांना योग्य व्यासपीठ मिळावे, त्यांच्यात सांस्कृतिक जाण निर्माण व्हावी आणि रंगभूमीशी त्यांचा जवळचा संबंध निर्माण व्हावा, या उद्देशाने हे शिबिर सातत्याने राबवले जात असल्याचे आयोजकांनी सांगितले. अधिक माहितीसाठी तसेच नावनोंदणीसाठी ॲड. विभावरी रजपूत +917796729587 व दिलीप आंब्रे मो. +91 82910 89302 यांच्याशी संपर्क साधावा, असे आवाहन आखिल भारतीय मराठी नाट्य परिषद शाखा चिपळूणचे अध्यक्ष डॉ. प्रशांत पटवर्धन यांनी केले आहे.

प्रतिनिधी : कोकणधारा खेड: भोस्ते घाट येथे मुंबई-गोवा महामार्गावर मंगळवारी रात्री सुमारे १० वाजता एक भीषण अपघात घडला. मुंबईच्या दिशेने शीतपेयांचे बॉक्स घेऊन जाणाऱ्या कंटेनर ट्रकचा चालकावरील ताबा सुटल्याने वाहन थेट घाटातील संरक्षक भिंतीवर आदळले. धडक इतकी जबरदस्त होती की संरक्षक भिंत तुटून ट्रकचा पुढील भाग दरीत कोसळण्याच्या स्थितीत हवेत लटकून राहिला. या अपघातात ट्रकच्या केबिनचा पूर्ण चक्काचूर झाला असून, त्यामधील दोन जण गंभीर जखमी झाले आहेत. अपघातानंतर महामार्गावरील प्रवासी तसेच स्थानिक मदत गटातील प्रसाद गांधी यांनी तत्काळ घटनास्थळी धाव घेत बचावकार्य सुरू केले. ट्रक हवेत लटकलेल्या अवस्थेत असल्याने जखमींना बाहेर काढणे अत्यंत धोकादायक होते; मात्र उपस्थितांनी धाडस दाखवत दोघांनाही सुरक्षित बाहेर काढले. दरम्यान, घटनेची माहिती मिळताच जगद्गुरु श्री नरेंद्राचार्य महाराज संस्थानची रुग्णवाहिका आणि मदत पथक घटनास्थळी दाखल झाले. जखमींना तातडीने जवळच्या रुग्णालयात उपचारासाठी हलवण्यात आले. या अपघातामुळे काही काळ महामार्गावरील वाहतूक विस्कळीत झाली होती. पोलिसांनी घटनास्थळी पोहोचून परिस्थिती नियंत्रणात आणत वाहतूक सुरळीत केली. अपघातग्रस्त कंटेनरमध्ये थम्सअप कंपनीच्या शीतपेयांचा साठा असल्याचे समोर आले आहे. घाटातील धोकादायक वळणावर चालकाचा अंदाज चुकल्याने हा अपघात झाला असावा, असा प्राथमिक अंदाज व्यक्त करण्यात येत असून, पुढील तपास स्थानिक पोलिसांकडून सुरू आहे. उशिरापर्यंत अपघातग्रस्त वाहन हटवण्याचे काम सुरू होते.

प्रतिनिधी : कोकणधारा चिपळूण : प्रभात रोड फाउंडेशनतर्फे वन विभागातील उल्लेखनीय कार्याबद्दल वन विभागीय अधिकारी गिरीजा देसाई यांचा जाहीर सत्कार करण्यात आला. महाराष्ट्र शासनाकडून त्यांच्या धाडसी व यशस्वी कामगिरीबद्दल सुवर्णपदकाने सन्मानित झाल्यानिमित्त हा कार्यक्रम आयोजित करण्यात आला होता. या वेळी फाउंडेशनचे अध्यक्ष उमेशशेठ काटकर, उपाध्यक्षा सुमती जांभेकर, सेक्रेटरी संतोष इनामदार, विश्वस्त शर्मिला मोरे, स्मिता सरदेसाई, प्रमोदशेठ लाड, संजय अवटी, सहा सेक्रेटरी धनश्री जोशी, सदस्य संपदा लाड यांच्यासह अनेक मान्यवर उपस्थित होते. तसेच चिपळूण नगरपालिकेचे पदाधिकारी व नगरसेवकांनीही उपस्थित राहून देसाई यांना शुभेच्छा दिल्या. कार्यक्रमात बोलताना सेक्रेटरी संतोष इनामदार यांनी प्रभात रोड फाउंडेशनच्या स्थापनेपासूनच्या कार्याचा आढावा घेतला. सन 2000 पासून नारायण तलाव संवर्धन, परिसरातील मूलभूत सुविधा, पर्यावरण संवर्धन, महिला सक्षमीकरण तसेच आपत्ती काळात मदत अशा विविध उपक्रमांद्वारे फाउंडेशनने समाजात भरीव योगदान दिल्याचे त्यांनी सांगितले. गिरीजा देसाई यांनी वनसंवर्धन, वन्यजीव संरक्षण आणि जनजागृती या क्षेत्रात उल्लेखनीय कार्य केले आहे. त्यांनी ठाणे वन विभागात कार्यरत असताना 30 हून अधिक बिबट्यांची सुखरूप सुटका केली, तसेच 200 हून अधिक वन्यप्राण्यांचे प्राण वाचवले. अवैध तस्करीविरोधात कारवाई करत 50 हून अधिक वाहने जप्त करण्याचे धाडसही त्यांनी दाखवले. वन्यप्राण्यांमुळे नागरिकांना होणाऱ्या त्रासावर उपाययोजना करणे, झाडे लावणे व ती जगविणे, तसेच जनजागृती मोहीम राबविणे या बाबींमध्ये त्यांचे कार्य विशेष उल्लेखनीय ठरले आहे. त्यांच्या कार्यामुळे वन विभागाचे कामकाज अधिक प्रभावी व सुबक झाले असल्याचेही यावेळी नमूद करण्यात आले. कार्यक्रमाच्या शेवटी गिरीजा देसाई यांच्या कार्याचा गौरव करत त्यांना शाल, श्रीफळ व पुष्पगुच्छ देऊन सन्मानित करण्यात आले. अशा कर्तव्यदक्ष अधिकाऱ्यांचा सत्कार करताना अभिमान वाटत असल्याची भावना उपस्थितांनी व्यक्त केली.

प्रतिनिधी : कोकणधारा चिपळूण : राज्यात इंधन तुटवड्याच्या मुद्द्यावरून राजकीय वातावरण तापले असून, आमदार भास्कर जाधव यांनी सरकारवर जोरदार टीका केली आहे. एका बाजूला देशाचे पंतप्रधान नरेंद्र मोदी कोरोनासारखी परिस्थिती पुन्हा उद्भवू शकते, असा इशारा देतात, तर दुसऱ्या बाजूला राज्याचे मुख्यमंत्री एकनाथ शिंदे राज्यात इंधनाचा कोणताही तुटवडा नसल्याचे सांगतात. या परस्परविरोधी वक्तव्यांमुळे जनतेमध्ये संभ्रम निर्माण होत असल्याचे जाधव यांनी म्हटले आहे. “जर राज्यात इंधनाचा तुटवडा नाही, तर मग केरोसिन वितरणाचा निर्णय का घेण्यात आला?” असा सवाल उपस्थित करत जाधव यांनी सरकारच्या भूमिकेवर प्रश्नचिन्ह उपस्थित केले. तसेच अफवा पसरवण्याच्या बाबतीत भाजपचा कुणीच हात धरू शकत नाही, अशी टीकाही त्यांनी यावेळी केली. इंधन पुरवठा, संभाव्य संकटाची चर्चा आणि सरकारच्या निर्णयांमुळे सध्या राज्यात चर्चांना उधाण आले असून, या पार्श्वभूमीवर सत्ताधारी आणि विरोधकांमध्ये आरोप-प्रत्यारोप अधिक तीव्र होताना दिसत आहेत. दरम्यान, नागरिकांनी अफवांवर विश्वास न ठेवता अधिकृत माहितीवरच विश्वास ठेवावा, असे आवाहन प्रशासनाकडून करण्यात येत आहे