Editorial

प्रतिनिधी : कोकणधारा चिपळूण : आंतरराष्ट्रीय महिला दिनानिमित्त इंडियन मेडिकल असोसिएशन – महिला डॉक्टर्स विंग (IMA WDW) महाराष्ट्र आणि रत्नागिरी जिल्हा पोलीस दल यांच्या संयुक्त विद्यमाने “आरोही – सायबर सुरक्षित नारी, डिजिटल सक्षम नारी” या राज्यस्तरीय जनजागृती व सन्मान सोहळ्याचे आयोजन करण्यात आले आहे. हा कार्यक्रम गुरुवार, दि. १२ मार्च २०२६ रोजी सायंकाळी ४ ते ७ या वेळेत इंदिरा गांधी सांस्कृतिक केंद्र, मार्कंडी (चिपळूण) येथे होणार आहे. डिजिटल युगात महिलांना सायबर गुन्ह्यांपासून सुरक्षित ठेवणे, त्यांच्यात डिजिटल सक्षमीकरणाबाबत जागरूकता निर्माण करणे तसेच समाजासाठी उल्लेखनीय कार्य करणाऱ्या महिलांचा गौरव करणे हा या उपक्रमामागील मुख्य उद्देश आहे. या कार्यक्रमात सायबर सुरक्षा जनजागृती मार्गदर्शन, IMA WDW महाराष्ट्र महिला डॉक्टर्स राज्यस्तरीय हेल्पलाईनचा शुभारंभ, “आरोही नारी गौरव पुरस्कार” प्रदान, “छावा” या विशेष सांस्कृतिक सादरीकरणासह “डिजिटल जागर” जनजागृती कार्यक्रम असे विविध उपक्रम आयोजित करण्यात आले आहेत. या कार्यक्रमास मान्यवरांसह नागरिकांनी मोठ्या संख्येने उपस्थित राहावे, असे आवाहन IMA महिला डॉक्टर्स विंग महाराष्ट्र व रत्नागिरी जिल्हा पोलीस दल यांच्यावतीने करण्यात आले आहे.

प्रतिनिधी : कोकणधारा रत्नागिरी : राज्यातील ऑटोरिक्षा व टॅक्सी परवान्यांच्या खुले धोरणास स्थगिती देण्याचा निर्णय परिवहन विभागाने घेतला आहे. परिवहन मंत्री प्रताप सरनाईक यांच्या अध्यक्षतेखाली सोमवार, दि. ९ मार्च रोजी झालेल्या बैठकीत हा निर्णय घेण्यात आला. त्यानुसार जिल्ह्यात ऑटोरिक्षा व टॅक्सी परवान्यासाठी देण्यात येणाऱ्या इरादापत्रांच्या (Letter of Intent) प्रक्रियेलाही स्थगिती देण्यात आली असल्याची माहिती उपप्रादेशिक परिवहन कार्यालयामार्फत देण्यात आली आहे. राज्यातील विविध संघटनांकडून ऑटोरिक्षा व टॅक्सी परवान्यांचे खुले धोरण बंद करण्याबाबत शासनाकडे सातत्याने मागणी करण्यात येत होती. या पार्श्वभूमीवर परिवहन मंत्री प्रताप सरनाईक यांच्या अध्यक्षतेखाली परिवहन विभागाच्या अधिकाऱ्यांची बैठक घेण्यात आली. या बैठकीत खुले धोरणास तात्पुरती स्थगिती देण्याचे निर्देश देण्यात आले. परिवहन मंत्र्यांच्या निर्देशानुसार जिल्ह्यात ऑटोरिक्षा व टॅक्सी परवान्यांसाठी देण्यात येणाऱ्या इरादापत्रांच्या कामकाजास स्थगिती देण्यात आली आहे. या निर्णयाची जिल्ह्यातील नागरिकांनी नोंद घ्यावी, असे आवाहन उपप्रादेशिक परिवहन कार्यालयाकडून करण्यात आले आहे.

दोडामार्ग : भूषण सावंत दोडामार्ग : दोडामार्ग पंचायत समितीच्या सभापतीपदी भाजपच्या सौ.पार्वती महादेव गवस तर उपसभापतीपदी शिवसेनेचे गणेशप्रसाद गवस या दोघांची बिनविरोध निवड झाली. सभापती व उपसभापती पदासाठी प्रत्येकी एकच अर्ज दाखल झाल्याने निवडणूक निर्णय अधिकाऱ्यांनी त्यांची बिनविरोध निवड जाहीर केली. निवड जाहीर होताच महायुतीच्या पदाधिकाऱ्यांनी पेढे वाटून आणि पुष्पगुच्छ देऊन नव्या पदाधिकाऱ्यांचे स्वागत करत आनंदोत्सव साजरा केला. पंचायत समिती सभापती व उपसभापती पदासाठीची निवडणूक प्रक्रिया सोमवारी पार पडली.दुपारी शिवसेना तालुकाप्रमुख तथा पंचायत समिती सदस्य गणेशप्रसाद गवस, उपजिल्हाप्रमुख राजेंद्र निंबाळकर, उपतालुकाप्रमुख दादा देसाई, तालुका संघटक गोपाळ गवस, झरेबांबर पंचायत समिती सदस्या श्रीमती स्नेहा गवस, कोनाळ पंचायत समिती सदस्य सौ.सायली स्वप्निल निंबाळकर, विभागप्रमुख अनिल शेटकर, माजी पंचायत समिती उपसभापती लक्ष्मण नाईक, रामदास मेस्त्री हे पदाधिकारी दाखल झाले. त्यानंतर भाजपाचे तालुकाध्यक्ष तथा जिल्हा परिषद सदस्य दीपक गवस, नगराध्यक्ष चेतन चव्हाण, उपतालुकाप्रमुख आनंद तळणकर, युवा मोर्चा तालुकाध्यक्ष पराशर सावंत, साटेली-भेडशी पंचायत समिती सदस्य संजय सातार्डेकर, मणेरी पंचायत समिती सदस्या सौ.सोनिया अंकुश कुबल, माटणे पंचायत समिती सदस्या सौ.पार्वती महादेव गवस, माटणे जिल्हा परिषद सदस्य सौ.साक्षी तळवडेकर, युवा मोर्चा सरचिटणीस अंकुश उर्फ भैया नाईक, खोक्रल सरपंच देवेंद्र शेटकर, कळणे सरपंच श्री.देसाई, तसेच अन्य पदाधिकारी उपस्थित होते. सभापती पदासाठी माटणे पंचायत समिती सदस्य भाजपच्या सौ.पार्वती महादेव गवस यांनी नामनिर्देशन पत्र दाखल केले, तर उपसभापती पदासाठी कोलझर पंचायत समिती सदस्य शिवसेनेचे गणेशप्रसाद गवस यांनी अर्ज सादर केला. दोन्ही पदांसाठी एकमेव अर्ज प्राप्त झाल्याने त्यांची बिनविरोध निवड निश्चित झाली. निवड जाहीर होताच महायुतीच्या कार्यकर्त्यांनी जल्लोष करत पेढे वाटले आणि नव्या सभापती व उपसभापतींचे पुष्पगुच्छ देऊन अभिनंदन केले. पंचायत समितीत महायुतीची सत्ता अधिक बळकट झाल्याचे यावेळी कार्यकर्त्यांनी सांगितले.

प्रतिनिधी : कोकणधारा लांजा : स्वयंपाकासाठी आणलेल्या कोळंबीचे वाटण करण्याच्या किरकोळ कारणावरून झालेल्या वादातून मुलाने आपल्या ७० वर्षीय वृद्ध आईवर जीवघेणा हल्ला केल्याची धक्कादायक घटना लांजा तालुक्यातील धावणेवाडी येथे रविवारी सायंकाळी घडली. या प्रकरणी लांजा पोलीस ठाण्यात गुन्हा दाखल करण्यात आला आहे. मिळालेल्या माहितीनुसार, संतोष गणपत दिवाळे (वय ३५, रा. धावणेवाडी, ता. लांजा) असे गुन्हा दाखल झालेल्या मुलाचे नाव असून सुनिता गणपत दिवाळे (वय ७०) असे जखमी आईचे नाव आहे. रविवारी सायंकाळी सात वाजण्याच्या सुमारास ही घटना घडली.संतोष दिवाळे याने बाजारातून कोळंबी आणली होती. आई सुनिता यांनी कोळंबी साफ केल्यानंतर मुलगा संतोषला मसाल्याचे वाटण करण्यास सांगितले. मात्र याच कारणावरून दोघांमध्ये वाद झाला. हा वाद विकोपाला गेल्यानंतर संतापलेल्या संतोषने घरातील दगडी वरवंटा उचलून आईच्या डोक्यात मारहाण केली. तसेच शर्टाने तिचा गळा आवळून तिला जीवे मारण्याचा प्रयत्न केल्याचे समोर आले आहे. या घटनेप्रकरणी लांजा पोलीस ठाण्याचे श्रेणी पोलीस उपनिरीक्षक भालचंद्र रेवणे यांनी सरकारतर्फे फिर्याद दिली आहे. त्यानुसार संतोष दिवाळे याच्याविरुद्ध खुनाचा प्रयत्न केल्याप्रकरणी गुन्हा दाखल करण्यात आला असून पोलिसांनी त्याला ताब्यात घेतले आहे. या घटनेमुळे लांजा परिसरात खळबळ उडाली असून किरकोळ कारणावरून मुलाने आईवर केलेल्या या जीवघेण्या हल्ल्याबाबत संताप व्यक्त केला जात आहे. या प्रकरणाचा अधिक तपास लांजा पोलीस करीत आहेत.

प्रतिनिधी : कोकणधारा सावंतवाडी : मळेवाड-सावळवाडी येथे आज सकाळी साडेआठच्या सुमारास झालेल्या एका अपघातात दुचाकीस्वार पिता-पुत्र गंभीर जखमी झाले आहेत.यात औदुंबर बाबुराव खोत (वय – ४६) आणि त्यांचा मुलगा अथर्व खोत (वय – १०, दोघेही रा.कोंडुरे) अशी जखमींची नावे आहेत. सविस्तर वृत्त असे की,आज सकाळच्या सुमारास कोंडूरे येथील औदुंबर खोत हे आपल्या मुलासह दुचाकीवरून मळवाड मार्गे शिरोडाच्या दिशेने जात होते यावेळी मळेवाड सावळवाडी येथील वळणावर आले असता अचानक ब्रेक लावल्याने त्यांची दुचाकी घसरली आणि समोरून येणाऱ्या डंपरला जाऊन धडकली.या अपघातात दोघेही पिता – पुत्र जखमी झाले. दरम्यान अपघाताची माहिती मिळताच स्थानिकांनी तातडीने मदतीसाठी घटनास्थळी गाव घेतली आणि जखमींना मळेवाड येथील प्राथमिक आरोग्य केंद्रात दाखल केले.आरोग्य केंद्राचे वैद्यकीय अधिकारी डॉक्टर अदिती ठाकूर व डॉक्टर विक्रम मस्के यांनी त्यांच्यावर तातडीने उपचार केले. त्यानंतर त्यांना अधिक उपचारासाठी गोवा बांबूळी येथील गोमेकॉ हॉस्पिटलमध्य दाखल करण्यात आले.

प्रतिनिधी : कोकणधारा वेंगुर्ला : वेंगुर्ला पंचायत समिती सभापतीपदी भाजपाचे मातोंड पं. स.सदस्य शंकर शशिकांत घारे तर उपसभापतीपदी शिवसेनेचेपरुळे पं.स.सदस्य सचिन दामोदर देसाई यांची बिनविरोध निवड झाली आहे.पिठासन अधिकारी तथा तहसीलदार ओंकार ओतारी यांच्या अध्यक्षतेखाली पंचायत समिती सभागृहात आज सोमवारी ९ मार्च २०२६ रोजी झालेल्या सभेनंतर ही निवड जाहीर करण्यात आली. यावेळी गटविकास अधिकारी, सहाय्यक गटविकास अधिकारी दिनेश पाटकर आदी उपस्थित होते.दोन्ही पदासाठी प्रत्येकी एक – एक अर्ज दाखल झाल्याने ही निवड बिनविरोध संपन्न झाली.यावेळी या सभेस शंकर घारे,सचिन देसाई यांच्यासह म्हापण पं.स.सदस्य विष्णू उर्फ आप्पी फणसेकर,तुळस पं.स.सदस्या सुचिता वजराटकर, आडेली पं.स.सदस्य नितीन मांजरेकर,वायंगणी पं.स.सदस्या शीतल राऊत,उभादांडा पं.स. सदस्या साक्षी नार्वेकर,आसोली पं.स.सदस्य संकेत धुरी,रेडी पं.स.सदस्या प्रियांका घाटवळ व शिरोडा पं.स.सदस्या योगिता परब आदी उपस्थित होते. निवड जाहीर होताच प्रशासन तसेच जिल्हा बँक अध्यक्ष मनीष दळवी,संचालक महेश सारंग, भाजपा जिल्हा उपाध्यक्ष प्रसन्ना उर्फ बाळू देसाई,शिवसेना जिल्हा समन्वयक सचिन वालावलकर, भाजपा तालुकाप्रमुख पप्पू परब, नगरसेवक प्रणव वायंगणकर व भाजपा,शिवसेना,राष्ट्रवादी काँग्रेस पदाधिकारी,कार्यकर्ते यांनी नवनिर्वाचित सभापती व उपसभापती यांचे अभिनंदन केले.