दिनेश चाफळकर, महाड

महाड | १२ फेब्रुवारी २०२६:
महाड तालुक्यातील दहिवड गावाच्या हद्दीत गुरुवारी सायंकाळी सुमारे सहा वाजण्याच्या सुमारास झालेल्या भीषण रस्ते अपघातात २५ वर्षीय सुजित सुधीर सकपाळ याचा दुर्दैवी मृत्यू झाला, तर त्याच्यासह चार जण जखमी झाले आहेत. या घटनेमुळे महाड परिसरात शोककळा पसरली आहे.

प्राथमिक माहितीनुसार, सुजित सकपाळ हा आपल्या मित्र-मैत्रिणींसह महाड एमआयडीसी परिसरात फिरून परत येत होता. तो स्वतः ऑटो रिक्षा चालवत होता. दहिवड गावाजवळ रस्त्यावरील परिस्थितीकडे दुर्लक्ष झाल्याने वाहनावरील नियंत्रण सुटले आणि रिक्षा पलटी झाल्याची माहिती पोलिसांनी दिली आहे. अपघात इतका गंभीर होता की रिक्षा रस्त्याच्या कडेला उलटली.

जखमींवर उपचार सुरू

या अपघातात समृद्धी सुधीर धायळकर, अनिकेत शशिकांत धायळकर, रोहिणी हिरामण धायळकर आणि अंतरा शशिकांत धायळकर हे जखमी झाले. स्थानिक नागरिकांनी तत्काळ मदत करत सर्व जखमींना महाड ग्रामीण रुग्णालयात दाखल केले. डॉक्टरांनी तपासणीअंती सुजित सकपाळ याला मृत घोषित केले. इतर जखमींची प्रकृती स्थिर असल्याची माहिती रुग्णालय प्रशासनाकडून देण्यात आली आहे.

पोलिसांकडून गुन्हा नोंद

या प्रकरणी महाड एमआयडीसी पोलिस ठाणे येथे भारतीय न्याय संहिता (BNS) कलम 106(1), 281, 125(अ), 125(ब) तसेच मोटार वाहन कायदा कलम 184 अंतर्गत गुन्हा नोंदविण्यात आला आहे. सहाय्यक पोलीस निरीक्षक जीवन माने यांच्या मार्गदर्शनाखाली पुढील तपास सुरू आहे.

सुरक्षित वाहनचालना गरजेची

या घटनेनंतर पोलिसांनी नागरिकांना वेगमर्यादा पाळण्याचे आणि रस्त्यावरील परिस्थितीकडे लक्ष देऊन वाहन चालवण्याचे आवाहन केले आहे. स्थानिक नागरिकांनीही या मार्गावर वाहतूक सुरक्षिततेसाठी आवश्यक उपाययोजना कराव्यात, अशी मागणी प्रशासनाकडे केली आहे.

या दुर्दैवी अपघातामुळे सकपाळ कुटुंबावर दुःखाचा डोंगर कोसळला असून गावात हळहळ व्यक्त केली जात आहे.