20 मार्च 2026

प्रतिनिधी : कोकणधारा रत्नागिरी, दि. २० (जिमाका) : दै. लोकसत्ता यांच्या जिल्हा निर्देशांक उपक्रमांतर्गत करण्यात आलेल्या विश्लेषणात रत्नागिरी जिल्ह्याने विकास निर्देशांकात प्रथम क्रमांक पटकावला आहे. पुणे येथील गोखले अर्थशास्त्र संस्थेतर्फे सांख्यिकी विभागाच्या तपशीलांच्या आधारे विविध जिल्ह्यांच्या कामगिरीचे विश्लेषण करण्यात आले होते. या उल्लेखनीय कामगिरीबद्दल मुंबईतील ‘द ताज बाय विवांता’, कफ परेड येथे आयोजित समारंभात मुख्यमंत्री देवेंद्र फडणवीस यांच्या हस्ते जिल्हाधिकारी मनुज जिंदल यांना पुरस्कार देऊन गौरविण्यात आले. रत्नागिरी जिल्ह्याने सर्वांगीण विकासाच्या विविध निकषांवर उत्कृष्ट कामगिरी करत राज्यात अव्वल स्थान मिळविल्याने जिल्ह्याच्या प्रगतीची नोंद राज्यस्तरावर झाली आहे.

प्रतिनिधी : कोकणधारा रत्नागिरी, दि. २० (जिमाका) : जिल्ह्यात कायदा व सुव्यवस्था अबाधित राखण्यासाठी १९ मार्च २०२६ रोजी मध्यरात्रीपासून ते २ एप्रिल २०२६ रोजी रात्री १२ वाजेपर्यंत महाराष्ट्र पोलीस अधिनियम १९५१ च्या कलम ३७ (१)(३) अन्वये संपूर्ण जिल्ह्यात प्रतिबंधात्मक मनाई आदेश लागू करण्यात आला आहे. हा आदेश अपर जिल्हादंडाधिकारी चंद्रकांत सूर्यवंशी यांनी जारी केला आहे. जिल्ह्यात आगामी काळात रमजान ईद (२१ मार्च), श्रीराम नवमी (२६ मार्च), कामदा एकादशी (२९ मार्च), महावीर जयंती (३१ मार्च) आणि हनुमान जयंती (२ एप्रिल) यांसारखे विविध सण-उत्सव साजरे होणार आहेत. यासोबतच विविध राजकीय पक्ष व संघटनांकडून आंदोलन, मोर्चे व कार्यक्रमांचे आयोजन होण्याची शक्यता लक्षात घेता हा निर्णय घेण्यात आला आहे. खेड, चिपळूण, अलोरे-शिरगाव, रत्नागिरी, जयगड आणि देवरुख परिसरात औद्योगिक प्रकल्पांमुळे स्थानिकांच्या मागण्यांवरून अचानक आंदोलन होण्याची शक्यता आहे. तसेच मुंबई-गोवा राष्ट्रीय महामार्गाच्या अपूर्ण कामावरूनही आंदोलन सुरू आहेत. ओबीसी व मराठा आरक्षणाच्या पार्श्वभूमीवर सामाजिक तणाव निर्माण होण्याची शक्यता देखील प्रशासनाने व्यक्त केली आहे.या आदेशानुसार शस्त्रे, दांडके, तलवारी, बंदुका, स्फोटक किंवा दाहक पदार्थ बाळगणे, दगडफेकसाठी साधने गोळा करणे, भडकावू भाषणे करणे, घोषणा देणे किंवा पाचपेक्षा जास्त व्यक्तींनी परवानगीशिवाय एकत्र येणे यास मनाई करण्यात आली आहे. मात्र अंत्ययात्रा, धार्मिक विधी, विवाह सोहळे, सामाजिक कार्यक्रम, शासकीय कार्यक्रम तसेच सिनेमागृहे व नाट्यगृहे यांना या आदेशातून सूट देण्यात आली आहे. मोर्चा, मिरवणूक किंवा सभा आयोजित करण्यासाठी संबंधित उपविभागीय दंडाधिकाऱ्यांची लेखी परवानगी घेणे बंधनकारक राहणार आहे.

प्रतिनिधी : कोकणधारा रत्नागिरी : लोकनेते शामराव पेजे अभियांत्रिकी महाविद्यालयाच्या परिसरात डॉ. बाबासाहेब आंबेडकर तंत्रशास्त्र विद्यापीठ (बाटू) चे उपकेंद्र तात्काळ सुरू करण्याच्या दृष्टीने कार्यवाही करावी, अशा स्पष्ट सूचना पालकमंत्री डॉ. उदय सामंत यांनी दिल्या. आज पेजे अभियांत्रिकी महाविद्यालयात अभियांत्रिकी महाविद्यालय व शासकीय तंत्रनिकेतनच्या कामकाजाचा व विविध अडचणींचा आढावा घेण्यात आला. यावेळी अपर जिल्हाधिकारी भाऊसाहेब गलांडे, प्रांताधिकारी जीवन देसाई, जि.प. सदस्य बाबू म्हाप, शासकीय तंत्रनिकेतनचे प्रभारी प्राचार्य अजय हुंबरीकर, प्रा. पियुष गजबे, प्रा. उत्तमसखाने काकडे उपस्थित होते. महाविद्यालयाचे प्राचार्य यू. व्ही. पाटील व ‘बाटू’चे कुलगुरू कारभारी काळे हे दूरदृश्य प्रणालीद्वारे सहभागी झाले. बैठकीत महाविद्यालयातील कर्मचारी, विद्यार्थी संख्या, प्रवेश प्रक्रिया, वसतिगृह सुविधा आदी विषयांचा सविस्तर आढावा घेण्यात आला. यावेळी पालकमंत्री सामंत यांनी उपकेंद्रासाठी आवश्यक जागा उपलब्ध करून देण्यासोबत सर्वतोपरी सहकार्य करण्याचे आश्वासन दिले. तसेच विद्यार्थ्यांसाठी वसतिगृह तातडीने सुरू करण्याच्या सूचनाही त्यांनी दिल्या. “महाविद्यालय परिसर स्वच्छ आणि सुस्थितीत ठेवावा. पुढील शनिवारी पुन्हा भेट देणार असून त्यापूर्वी स्वच्छता व आवश्यक कामे पूर्ण करावीत,” असे निर्देशही त्यांनी दिले.तत्पूर्वी पालकमंत्री सामंत यांनी शासकीय वैद्यकीय महाविद्यालय व जिल्हा शासकीय रुग्णालयाच्या कामकाजाचाही आढावा घेतला.

प्रतिनिधी : कोकणधारा खेड : घरगुती काम करताना झालेल्या निष्काळजीपणामुळे खेड येथे १३ वर्षीय मुलगी गंभीररीत्या भाजल्याची घटना घडली आहे. वर्षा सोमनाथ जाधव (वय १३, रा. भरणे नाका, खेड) असे जखमी मुलीचे नाव असून तिच्यावर रत्नागिरी जिल्हा शासकीय रुग्णालयात उपचार सुरू आहेत. मिळालेल्या माहितीनुसार, गुरुवार दि. १२ मार्च रोजी रात्री सुमारे ९ वाजण्याच्या सुमारास ही घटना घडली. भूक लागल्याने वर्षाने गॅसवर शिजवून ठेवलेल्या भाजीचा कुकर स्वतः उघडण्याचा प्रयत्न केला. मात्र कुकरमधील वाफ पूर्णपणे निघाली नसताना झाकण उघडल्याने गरम वाफेचा झोत तिच्या अंगावर आला. या प्रकारात वर्षाचा चेहरा, छाती व पोटाचा भाग गंभीररीत्या भाजला असून त्वचेवर फोड आले आहेत. घटना लक्षात येताच कुटुंबीयांनी तातडीने तिला कळंबणी ग्रामीण रुग्णालयात दाखल केले. तेथे प्राथमिक उपचारानंतर प्रकृती गंभीर असल्याने १९ मार्च रोजी पुढील उपचारासाठी तिला रत्नागिरी जिल्हा शासकीय रुग्णालयात हलवण्यात आले.दरम्यान, या घटनेची नोंद जिल्हा रुग्णालयातील पोलीस चौकीत करण्यात आली आहे.

प्रतिनिधी : कोकणधारा रत्नागिरी : रत्नागिरी जिल्ह्यातील पहिल्या महिला स्त्रीरोग तज्ञ तसेच स्वस्तिक हॉस्पिटल व चिरायु हॉस्पिटलच्या संस्थापिका डॉ. सौ. सुनिता रमेश चव्हाण यांचे आज पहाटे दीर्घ आजाराने निधन झाले. त्यांच्या निधनामुळे जिल्ह्यात सर्वत्र शोक व्यक्त केला जात आहे. डॉ. चव्हाण यांनी आपल्या सेवाभावी वृत्तीने आणि वैद्यकीय कौशल्याने असंख्य महिलांना आरोग्यसेवा दिली. स्त्रीरोग तज्ञ म्हणून त्यांनी जिल्ह्यात मोठे योगदान दिले असून त्यांच्या कार्याची दखल सर्व स्तरांतून घेतली जात होती. त्यांचे पार्थिव अंत्यदर्शनासाठी आज दुपारी २ ते सायंकाळी ४ वाजेपर्यंत माळनाका येथील स्वस्तिक बंगला येथे ठेवण्यात येणार आहे. त्यानंतर सायंकाळी ४ वाजता त्यांच्या राहत्या घरातून अंत्ययात्रा निघून चर्मालय स्मशानभूमीत अंतिम संस्कार करण्यात येणार आहेत.त्यांच्या पश्चात डॉ. नितीन रमेश चव्हाण यांच्यासह शोकाकुल परिवार आहे.