महाराष्ट्र

प्रतिनिधी : कोकणधारा मुंबई :दि .23 :महाराष्ट्रातील मच्छीमारांना वाढत्या डिझेल दरांमुळे मोठ्या आर्थिक अडचणींना सामोरे जावे लागत असून, या पार्श्वभूमीवर राज्य सरकारने केंद्र सरकारकडे तातडीने हस्तक्षेप करण्याची मागणी केली आहे. यासंदर्भात मत्स्यव्यवसाय व बंदरे मंत्री नीतेश राणे यांनी केंद्रीय मंत्री, पंचायती राज तसेच मत्स्यव्यवसाय, पशुसंवर्धन व दुग्धव्यवसाय,राजीव रंजन सिंह उर्फ ललन सिंह जी यांच्या कडे सविस्तर पत्र पाठवून केली आहे. राज्यातील 136 मच्छीमार सहकारी संस्थांमार्फत चालवल्या जाणाऱ्या सुमारे 7,550 यांत्रिक मासेमारी नौकांसाठी डिझेल कोटा मंजूर असला तरी प्रत्यक्षात वाढत्या दरांमुळे मच्छीमारांचे आर्थिक गणित बिघडले आहे. जागतिक कच्च्या तेलाच्या किमतीतील चढउतारांमुळे डिझेल दरात झालेली वाढ ही त्यामागील प्रमुख कारणे मानली जात आहेत.सहकारी संस्थांना ‘बल्क कन्झ्युमर’ म्हणून वर्गीकृत केल्याने मच्छीमारांना किरकोळ दरांपेक्षा जास्त दराने डिझेल खरेदी करावे लागत आहे. यामुळे सामान्य ग्राहकांपेक्षा मच्छीमारांवर अधिक आर्थिक भार पडत असल्याची तक्रार करण्यात आली आहे.वाढत्या इंधन खर्चाचा भार सहकारी संस्थांना सहन करणे कठीण जात असून, हा खर्च अखेरीस वैयक्तिक मच्छीमारांवर टाकला जात आहे. परिणामी अनेक मच्छीमारांना मासेमारीच्या फेऱ्या कमी कराव्या लागत असून, याचा थेट परिणाम मासळी उत्पादन आणि उत्पन्नावर होत आहे. या परिस्थितीमुळे मच्छीमार, मजूर, मासळी विक्रेते आणि संबंधित व्यवसायांवर अवलंबून असलेल्या मोठ्या लोकसंख्येच्या उपजीविकेला धोका निर्माण झाला आहे. मत्स्यव्यवसाय हा अन्नसुरक्षा आणि निर्यातीसाठी महत्त्वाचा क्षेत्र असतानाही, शेतीप्रमाणे इंधन अनुदान किंवा संरक्षण यंत्रणा उपलब्ध नसल्याची खंत व्यक्त करण्यात आली आहे.या पार्श्वभूमीवर केंद्र सरकारने काही महत्त्वाच्या उपाययोजना तातडीने राबवाव्यात, अशी मागणी करण्यात आली आहे. यामध्ये मच्छीमार सहकारी संस्थांचे पुनर्वर्गीकरण करून किरकोळ दराने डिझेल उपलब्ध करून देणे, लक्षित डिझेल अनुदान किंवा थेट लाभ हस्तांतरण (DBT) योजना लागू करणे, तसेच मत्स्यव्यवसायाला इंधन संरक्षण योजनांमध्ये समाविष्ट करणे यांचा समावेश आहे. याशिवाय, मत्स्यव्यवसायासाठी इंधन दर स्थिर ठेवण्यासाठी राष्ट्रीय स्तरावर धोरण आखण्याचीही मागणी करण्यात आली आहे. केंद्र सरकारने याकडे तातडीने लक्ष दिल्यास महाराष्ट्रातील मच्छीमारांना मोठा दिलासा मिळेल, अशी अपेक्षा व्यक्त केली जात आहे.

विशेष प्रतिनिधी, कोकणधारा देवरुख : इस्राईल तसेच अमेरिका–इराणदरम्यान निर्माण झालेल्या युद्धजन्य परिस्थितीमुळे हवाई वाहतूक बंद झाल्याने दुबईमध्ये अडकलेले संगमेश्वर तालुक्यातील नागरिक अखेर सुखरूप मायदेशी परतले आहेत. यात देवरुख येथील जेष्ठ पत्रकार सुरेश सप्रे यांच्यासह एकूण १३ जणांचा समावेश आहे. हे सर्व जण गुरुवारी (ता. ५) सकाळी हैद्राबाद व बेंगळुरू विमानतळावर पोहोचले. त्यानंतर विविध वाहनांनी ते आपल्या गावी परतले.मायदेशी परतलेल्या नागरिकांमध्ये सुरेश सप्रे, ज्योती सप्रे, नगरसेविका श्रद्धा इंदुलकर, जितेंद्र निमकर, कृतुजा निमकर, अभिषेक निमकर, मानसी निमकर, साखरप्यातील संदेश (बापू) शेट्ये, सोनम शेट्ये यांच्यासह अन्य चार जणांचा समावेश आहे. तसेच चिपळूण येथील सनी व रुची जागुष्टे हेही चिपळूणला सुखरूप परतले आहेत. दुबईत विमानसेवा बंद झाल्याने या सर्वांना काही दिवस हॉटेलमध्ये थांबावे लागले होते. नंतर दुबई प्रशासन आणि केंद्र सरकारने विमानसेवेची व्यवस्था केल्यानंतर बुधवारी (ता. ४) एक जण मुंबईत, तर सहा जण हैद्राबाद आणि सहा जण बेंगळुरू येथे विमानाने दाखल झाले. यानंतर गुरुवारी ते सर्वजण आपल्या गावी परतले असून त्यांच्या आगमनाने कुटुंबीय, नातेवाईक आणि मित्रांमध्ये आनंदाचे वातावरण निर्माण झाले आहे.

महाड | प्रतिनिधी – दिनेश चाफळकर: महाड शहर आणि नडगाव गावाच्या परिसरात रविवारी दोन वेगवेगळ्या ठिकाणी आग लागल्याच्या घटना घडल्या. या दोन्ही आगीत मालकांचे लाखो रुपयांचे नुकसान झाले असून सुदैवाने कोणतीही जीवितहानी झालेली नाही. शहरातील एका डायग्नोस्टिक लॅबला आणि नडगाव येथील भंगार गोदामाला आग लागल्याने परिसरात काही काळ खळबळ उडाली होती. रोहिदास नगरमधील लॅब जळून खाक महाड शहरातील रोहिदास नगर परिसरात प्रगती विराज दळवी यांच्या मालकीच्या ‘आयकॉन डायग्नोसिस लॅब’ला रविवारी मध्यरात्री अचानक आग लागली. आग लागल्याची माहिती मिळताच स्थानिक नागरिकांनी तत्काळ धाव घेतली. दरवाजा तोडून आग नियंत्रणात आणण्याचा प्रयत्न केल्याची माहिती रहिवासी विराज दळवी यांनी दिली. या आगीत लॅबमधील महागडी इलेक्ट्रॉनिक उपकरणे, फर्निचर, संगणक तसेच एक्स-रे मशिनरी जळून खाक झाली. प्राथमिक अंदाजानुसार या घटनेत सुमारे ३५ ते ४० लाख रुपयांचे नुकसान झाले आहे. आग नेमकी कशामुळे लागली याबाबत तपास सुरू आहे. नडगावमध्ये भंगार गोदामाला आग दुसरी घटना रविवारी सायंकाळी सुमारे पाच वाजण्याच्या सुमारास नडगाव गावाजवळ घडली. येथील कलाम यांच्या मालकीच्या भंगार गोदामाला आग लागली. आगीमुळे गोदामातील मोठ्या प्रमाणात साहित्य जळून गेले. गोदामाच्या शेजारी असलेल्या पॅलेट तयार करणाऱ्या एका लघुउद्योगालाही या आगीचा फटका बसला. लाकडी भुसा व इतर साहित्य जळून सुमारे दोन लाख रुपयांचे नुकसान झाल्याची माहिती व्यवसायिक शाम सुरेश गुडेकर यांनी दिली. भंगार गोदामाचेही लाखो रुपयांचे नुकसान झाल्याचे सांगण्यात येत आहे. अग्निशमन दलाची तत्पर कारवाई दोन्ही घटनांमध्ये अग्निशमन दलाने तातडीने घटनास्थळी दाखल होत आग आटोक्यात आणली. आगीवर नियंत्रण मिळवण्यात यश आल्यामुळे मोठी दुर्घटना टळली. सध्या दोन्ही घटनांबाबत तपास सुरू असून आग लागण्याचे कारण शोधले जात आहे. सुरक्षेचा प्रश्न ऐरणीवर महाड शहरात अल्पावधीत दोन आगीच्या घटना घडल्याने स्थानिकांमध्ये चिंता व्यक्त केली जात आहे. व्यापारी आणि नागरिकांनी अग्निसुरक्षा उपाययोजना काटेकोरपणे राबविण्याची मागणी प्रशासनाकडे केली आहे. एक्स-रे लॅब आणि भंगार गोदाम या दोन्ही ठिकाणी झालेल्या नुकसानीमुळे संबंधित व्यावसायिकांना मोठा आर्थिक फटका बसला असून प्रशासनाकडून मदत व तपासाच्या निष्कर्षाकडे सर्वांचे लक्ष लागले आहे.