Editorial

प्रतिनिधी : कोकणधारा चिपळूण : सर्वधर्म समभाव आणि सामाजिक सलोखा यांचा सुंदर प्रत्यय देणारा एकात्मतेचा संदेश ईद-उल-फितरच्या निमित्ताने चिपळूणमध्ये अनुभवायला मिळाला. शिवसेना (उद्धव बाळासाहेब ठाकरे) पक्षाच्या वतीने मापारी मोहल्ला मस्जिद (प्रभाग क्र. ४) येथे ईदच्या नमाजानंतर मुस्लिम बांधवांना पुष्प देऊन रमजान ईदच्या शुभेच्छा देण्यात आल्या. या उपक्रमातून सणांच्या माध्यमातून समाजात बंधुभाव, प्रेम, एकात्मता आणि सौहार्द वाढवण्याचा संदेश देण्यात आला. “ईदचा सण केवळ धार्मिक उत्सव नसून समाजाला एकत्र आणणारा आणि मानवतेचा संदेश देणारा आहे,” अशा भावना उपस्थित मान्यवरांनी व्यक्त केल्या.या प्रसंगी नगरसेवक अजय भालेकर, वैशाली कदम, संजय गोताड, युवसेना चिपळूण शहर अधिकारी पार्थ जागुष्टे यांच्यासह प्रसाद म्हापुस्कर, लावेश म्हापुस्कर, सुरेश पाथरे, विलास चिपळूणकर, संदिप मनोरकर, प्रकाश साडविलकर, परिमल साडविलकर, गणेश गांधी, सचिन लकेश्री आणि पंकज सावंत आदी मान्यवर उपस्थित होते. अशा उपक्रमांमुळे सामाजिक सलोखा आणि परस्पर आदराची परंपरा अधिक दृढ होत असल्याचे यावेळी अधोरेखित करण्यात आले.

प्रतिनिधी : कोकणधारा चिपळूण : तालुक्यातील नागावे नदीपात्रालगत असलेल्या भंगार प्लास्टिक साठ्याच्या गोडावूनला अचानक लागलेल्या भीषण आगीत संपूर्ण इमारत जळून खाक झाली. या घटनेत सहा कामगारांनी प्रसंगावधान राखत वेळीच बाहेर पडून आपला जीव वाचवला. ही घटना सायंकाळी सुमारे ४ वाजण्याच्या सुमारास घडली. मिळालेल्या माहितीनुसार, पालांडे नामक व्यवसायिकाची नागावे येथे डबर-खडी क्रशर होती. ती बंद पडल्यानंतर संबंधित जागा भंगार व्यवसायिकाला भाडेतत्त्वावर देण्यात आली होती. या ठिकाणी भंगार प्लास्टिक पिशव्या धुणे व सुकवून त्यापासून कच्चा माल तयार करण्याचे काम सुरू होते. गोडावूनमध्ये सुमारे तीन ट्रक इतका प्लास्टिक साठा होता. दरम्यान, इमारतीलगत वाढलेले गवत शेतीकामासाठी पेटवण्यात आले होते. कडक उन्हामुळे ही आग वेगाने पसरत जाऊन प्लास्टिक साठ्यापर्यंत पोहोचल्याची प्राथमिक माहिती समोर आली आहे. त्यामुळे वणव्यामुळे ही आग लागल्याची शक्यता व्यक्त केली जात आहे.आग लागल्यानंतर जवळपास अर्धा तास पोलीस व अग्निशमन दलाला कळवण्यात विलंब झाल्याची माहिती स्थानिकांकडून मिळाली. त्यानंतर महाजनको, पोफळी येथून अग्निशमन बंब घटनास्थळी दाखल झाला. मात्र पाणीसाठा अपुरा पडल्याने आग विझवण्यात अडचणी निर्माण झाल्या. त्यानंतर चिपळूण नगरपालिकेचा अग्निशमन बंबही घटनास्थळी पोहोचला असून आग विझविण्याचे काम युद्धपातळीवर सुरू आहे.आगीची तीव्रता इतकी मोठी होती की काही वेळातच संपूर्ण गोडावून भस्मसात झाले. सुदैवाने कोणतीही जीवितहानी झाली नाही; मात्र मोठ्या प्रमाणात आर्थिक नुकसान झाल्याचा अंदाज व्यक्त केला जात आहे. दरम्यान, घटनेची पुढील चौकशी सुरू असून आगीचे नेमके कारण शोधण्याचे काम प्रशासनाकडून करण्यात येत आहे.

प्रतिनिधी : कोकणधारा रत्नागिरी, दि. २० (जिमाका) : दै. लोकसत्ता यांच्या जिल्हा निर्देशांक उपक्रमांतर्गत करण्यात आलेल्या विश्लेषणात रत्नागिरी जिल्ह्याने विकास निर्देशांकात प्रथम क्रमांक पटकावला आहे. पुणे येथील गोखले अर्थशास्त्र संस्थेतर्फे सांख्यिकी विभागाच्या तपशीलांच्या आधारे विविध जिल्ह्यांच्या कामगिरीचे विश्लेषण करण्यात आले होते. या उल्लेखनीय कामगिरीबद्दल मुंबईतील ‘द ताज बाय विवांता’, कफ परेड येथे आयोजित समारंभात मुख्यमंत्री देवेंद्र फडणवीस यांच्या हस्ते जिल्हाधिकारी मनुज जिंदल यांना पुरस्कार देऊन गौरविण्यात आले. रत्नागिरी जिल्ह्याने सर्वांगीण विकासाच्या विविध निकषांवर उत्कृष्ट कामगिरी करत राज्यात अव्वल स्थान मिळविल्याने जिल्ह्याच्या प्रगतीची नोंद राज्यस्तरावर झाली आहे.

प्रतिनिधी : कोकणधारा रत्नागिरी, दि. २० (जिमाका) : जिल्ह्यात कायदा व सुव्यवस्था अबाधित राखण्यासाठी १९ मार्च २०२६ रोजी मध्यरात्रीपासून ते २ एप्रिल २०२६ रोजी रात्री १२ वाजेपर्यंत महाराष्ट्र पोलीस अधिनियम १९५१ च्या कलम ३७ (१)(३) अन्वये संपूर्ण जिल्ह्यात प्रतिबंधात्मक मनाई आदेश लागू करण्यात आला आहे. हा आदेश अपर जिल्हादंडाधिकारी चंद्रकांत सूर्यवंशी यांनी जारी केला आहे. जिल्ह्यात आगामी काळात रमजान ईद (२१ मार्च), श्रीराम नवमी (२६ मार्च), कामदा एकादशी (२९ मार्च), महावीर जयंती (३१ मार्च) आणि हनुमान जयंती (२ एप्रिल) यांसारखे विविध सण-उत्सव साजरे होणार आहेत. यासोबतच विविध राजकीय पक्ष व संघटनांकडून आंदोलन, मोर्चे व कार्यक्रमांचे आयोजन होण्याची शक्यता लक्षात घेता हा निर्णय घेण्यात आला आहे. खेड, चिपळूण, अलोरे-शिरगाव, रत्नागिरी, जयगड आणि देवरुख परिसरात औद्योगिक प्रकल्पांमुळे स्थानिकांच्या मागण्यांवरून अचानक आंदोलन होण्याची शक्यता आहे. तसेच मुंबई-गोवा राष्ट्रीय महामार्गाच्या अपूर्ण कामावरूनही आंदोलन सुरू आहेत. ओबीसी व मराठा आरक्षणाच्या पार्श्वभूमीवर सामाजिक तणाव निर्माण होण्याची शक्यता देखील प्रशासनाने व्यक्त केली आहे.या आदेशानुसार शस्त्रे, दांडके, तलवारी, बंदुका, स्फोटक किंवा दाहक पदार्थ बाळगणे, दगडफेकसाठी साधने गोळा करणे, भडकावू भाषणे करणे, घोषणा देणे किंवा पाचपेक्षा जास्त व्यक्तींनी परवानगीशिवाय एकत्र येणे यास मनाई करण्यात आली आहे. मात्र अंत्ययात्रा, धार्मिक विधी, विवाह सोहळे, सामाजिक कार्यक्रम, शासकीय कार्यक्रम तसेच सिनेमागृहे व नाट्यगृहे यांना या आदेशातून सूट देण्यात आली आहे. मोर्चा, मिरवणूक किंवा सभा आयोजित करण्यासाठी संबंधित उपविभागीय दंडाधिकाऱ्यांची लेखी परवानगी घेणे बंधनकारक राहणार आहे.

प्रतिनिधी : कोकणधारा रत्नागिरी : लोकनेते शामराव पेजे अभियांत्रिकी महाविद्यालयाच्या परिसरात डॉ. बाबासाहेब आंबेडकर तंत्रशास्त्र विद्यापीठ (बाटू) चे उपकेंद्र तात्काळ सुरू करण्याच्या दृष्टीने कार्यवाही करावी, अशा स्पष्ट सूचना पालकमंत्री डॉ. उदय सामंत यांनी दिल्या. आज पेजे अभियांत्रिकी महाविद्यालयात अभियांत्रिकी महाविद्यालय व शासकीय तंत्रनिकेतनच्या कामकाजाचा व विविध अडचणींचा आढावा घेण्यात आला. यावेळी अपर जिल्हाधिकारी भाऊसाहेब गलांडे, प्रांताधिकारी जीवन देसाई, जि.प. सदस्य बाबू म्हाप, शासकीय तंत्रनिकेतनचे प्रभारी प्राचार्य अजय हुंबरीकर, प्रा. पियुष गजबे, प्रा. उत्तमसखाने काकडे उपस्थित होते. महाविद्यालयाचे प्राचार्य यू. व्ही. पाटील व ‘बाटू’चे कुलगुरू कारभारी काळे हे दूरदृश्य प्रणालीद्वारे सहभागी झाले. बैठकीत महाविद्यालयातील कर्मचारी, विद्यार्थी संख्या, प्रवेश प्रक्रिया, वसतिगृह सुविधा आदी विषयांचा सविस्तर आढावा घेण्यात आला. यावेळी पालकमंत्री सामंत यांनी उपकेंद्रासाठी आवश्यक जागा उपलब्ध करून देण्यासोबत सर्वतोपरी सहकार्य करण्याचे आश्वासन दिले. तसेच विद्यार्थ्यांसाठी वसतिगृह तातडीने सुरू करण्याच्या सूचनाही त्यांनी दिल्या. “महाविद्यालय परिसर स्वच्छ आणि सुस्थितीत ठेवावा. पुढील शनिवारी पुन्हा भेट देणार असून त्यापूर्वी स्वच्छता व आवश्यक कामे पूर्ण करावीत,” असे निर्देशही त्यांनी दिले.तत्पूर्वी पालकमंत्री सामंत यांनी शासकीय वैद्यकीय महाविद्यालय व जिल्हा शासकीय रुग्णालयाच्या कामकाजाचाही आढावा घेतला.

प्रतिनिधी : कोकणधारा खेड : घरगुती काम करताना झालेल्या निष्काळजीपणामुळे खेड येथे १३ वर्षीय मुलगी गंभीररीत्या भाजल्याची घटना घडली आहे. वर्षा सोमनाथ जाधव (वय १३, रा. भरणे नाका, खेड) असे जखमी मुलीचे नाव असून तिच्यावर रत्नागिरी जिल्हा शासकीय रुग्णालयात उपचार सुरू आहेत. मिळालेल्या माहितीनुसार, गुरुवार दि. १२ मार्च रोजी रात्री सुमारे ९ वाजण्याच्या सुमारास ही घटना घडली. भूक लागल्याने वर्षाने गॅसवर शिजवून ठेवलेल्या भाजीचा कुकर स्वतः उघडण्याचा प्रयत्न केला. मात्र कुकरमधील वाफ पूर्णपणे निघाली नसताना झाकण उघडल्याने गरम वाफेचा झोत तिच्या अंगावर आला. या प्रकारात वर्षाचा चेहरा, छाती व पोटाचा भाग गंभीररीत्या भाजला असून त्वचेवर फोड आले आहेत. घटना लक्षात येताच कुटुंबीयांनी तातडीने तिला कळंबणी ग्रामीण रुग्णालयात दाखल केले. तेथे प्राथमिक उपचारानंतर प्रकृती गंभीर असल्याने १९ मार्च रोजी पुढील उपचारासाठी तिला रत्नागिरी जिल्हा शासकीय रुग्णालयात हलवण्यात आले.दरम्यान, या घटनेची नोंद जिल्हा रुग्णालयातील पोलीस चौकीत करण्यात आली आहे.