Editorial

प्रतिनिधी : कोकणधारा चिपळूण : येथील जिल्हा न्यायालयात शनिवार, दि. १४ मार्च रोजी आयोजित राष्ट्रीय लोकअदालतीला उत्स्फूर्त प्रतिसाद मिळाला. या लोकअदालतीत प्रलंबित व वादपूर्व अशा विविध प्रकरणांचा निकाल लागून एकूण ३ कोटी ८५ लाखांहून अधिक रक्कमेची तडजोड व वसुली करण्यात आली. या लोकअदालतीमध्ये जिल्हा न्यायालय व तालुका विधी सेवा समितीकडील ७४० प्रलंबित प्रकरणे तसेच १ हजार ३१२ वादपूर्व प्रकरणे ठेवण्यात आली होती. यापैकी ७४० प्रलंबित प्रकरणांपैकी १०७ प्रकरणे निकाली निघाली असून, दिवाणी व फौजदारी प्रकरणांमध्ये एकूण ३ कोटी ५० लाख १० हजार ५२१ रुपयांची तडजोड झाली. तसेच वादपूर्व प्रकरणांपैकी ५० प्रकरणे निकाली निघून ३५ लाख ११ हजार ८ रुपये इतकी रक्कम वसूल करण्यात आली. त्यामुळे पक्षकारांचा वेळ व खर्च वाचला.विशेष म्हणजे, चिपळूण जिल्हा न्यायालयाने गेल्या अडीच वर्षांत सलग ११ राष्ट्रीय लोकअदालतींमधून तब्बल २४ कोटीहून अधिक रक्कमेची वसुली केली असून ही बाब उल्लेखनीय ठरली आहे.ही लोकअदालत जिल्हा न्यायाधीश डॉ. अनिता एस. नेवसे यांच्या मार्गदर्शनाखाली पार पडली. यामध्ये विविध बँका, पतसंस्था, महावितरण, इतर वित्तीय संस्था, नुकसान भरपाई अर्ज, कौटुंबिक हिंसाचार व पोटगीसंबंधित प्रकरणांचा समावेश होता. लोकअदालतीसाठी न्यायाधीश व वकीलांचे तीन पॅनेल कार्यरत होते. या प्रक्रियेत जिल्हा न्यायालय-१ चिपळूणच्या जिल्हा न्यायाधीश डॉ. अनिता नेवसे, दिवाणी न्यायाधीश के. ए. पोवार, सह दिवाणी न्यायाधीश वाय. सी. पाटील तसेच पॅनल विधीज्ञ एन. एस. सावंत, एन. जी. लाड आणि सौ. एन. यू. पवार यांनी कामकाज पाहिले. लोकअदालतीत पक्षकार व वकीलवर्ग मोठ्या संख्येने उपस्थित होता. तसेच चिपळूण वकील संघ, जेष्ठ विधीज्ञ, सरकारी वकील, पोलीस कर्मचारी व न्यायालयीन कर्मचाऱ्यांनी सहकार्य केले. याबद्दल तालुका विधी सेवा समितीच्या अध्यक्षा डॉ. अनिता नेवसे यांनी सर्वांचे आभार मानले.

प्रतिनिधी : कोकणधारा रत्नागिरी : शहरातील एका गॅस एजन्सीत गोडावून कीपरने पाच व्यावसायिक गॅस सिलिंडरची परस्पर अवैध विक्री केल्याचा प्रकार उघडकीस आला आहे. या प्रकरणी संबंधित एजन्सीकडून जिल्हा प्रशासन तसेच शहर पोलिस ठाण्यात तक्रार दाखल करण्यात आली असून, यापैकी चार सिलिंडर परत मिळवण्यात आले आहेत.सध्या देशातील तणावपूर्ण परिस्थितीच्या पार्श्वभूमीवर घरगुती गॅस सिलिंडरचा पुरवठा सुरळीत राहावा यासाठी व्यावसायिक सिलिंडरच्या विक्रीवर निर्बंध घालण्यात आले आहेत. जिल्ह्यातील सर्व गॅस एजन्सींना याबाबत स्पष्ट सूचना देण्यात आल्या असून, केवळ अत्यावश्यक सेवांसाठीच व्यावसायिक सिलिंडर पुरवण्यास परवानगी आहे. रत्नागिरी शहरातील संबंधित गॅस एजन्सीकडे २४ व्यावसायिक सिलिंडरचा साठा उपलब्ध होता. मात्र, गोडावून कीपरने एजन्सी व्यवस्थापकांना कोणतीही माहिती न देता त्यापैकी पाच सिलिंडरची अवैध विक्री केल्याचे समोर आले. हा प्रकार लक्षात येताच एजन्सीकडून तातडीने कारवाई करण्यात आली आणि चार सिलिंडर परत मिळवण्यात यश आले. या प्रकरणी एजन्सीच्या व्यवस्थापक प्रीती राज यांनी जिल्हा पुरवठा विभागाकडे तसेच शहर पोलिस ठाण्यात तक्रार नोंदवली असून, पुढील तपास सुरू आहे.

प्रतिनिधी : कोकणधारा रत्नागिरी, दि. १६ (जिमाका) : भारतरत्न डॉ. बाबासाहेब आंबेडकर स्मारकाच्या माध्यमातून बाबासाहेबांचे विचार दीपस्तंभाप्रमाणे समाजात मार्गदर्शक ठरावेत आणि ते जनसामान्यांपर्यंत पोहोचावेत, यासाठी सर्वांनी प्रयत्न करणे गरजेचे आहे. तसेच या स्मारकातून भगवान गौतम बुद्धांचे विचार समाजापर्यंत कशा पद्धतीने पोहोचतात याचा अभ्यासही होणे आवश्यक आहे, असे मार्गदर्शन पालकमंत्री डॉ. उदय सामंत यांनी केले. पाली येथे जिल्हा वार्षिक योजना अनुसूचित जाती घटक कार्यक्रमांतर्गत ३ टक्के वैशिष्ट्यपूर्ण योजनेमधून उभारण्यात आलेल्या भारतरत्न डॉ. बाबासाहेब आंबेडकर स्मारक व दीक्षाभूमी इमारतीचे लोकार्पण पालकमंत्री डॉ. उदय सामंत यांच्या हस्ते कोनशिला अनावरण करून करण्यात आले. या प्रसंगी जिल्हा परिषद सदस्य महेश म्हाप, उपसभापती गजानन धनावडे, पंचायत समिती सदस्य पद्मजा कांबळे, समाज कल्याण सहाय्यक दीपक घाटे, पाली पंचक्रोशी बौद्ध समाज मंडळाचे अध्यक्ष व सरपंच विठ्ठल सावंत, सल्लागार एम. बी. कांबळे, जि.प. सदस्य ॲड. सुयोग कांबळे, माजी जि.प. सदस्य रामभाऊ गराटे, प्रांताधिकारी जीवन देसाई, तहसीलदार राजाराम म्हात्रे, भंते कश्यपजी थेरो, संतोष सावंत आदी मान्यवर उपस्थित होते. यावेळी बोलताना पालकमंत्री डॉ. सामंत म्हणाले की, तत्कालीन गृहमंत्री दिवंगत आर. आर. पाटील यांनी स्मारकासाठी जागा उपलब्ध करून देण्यासाठी सहकार्य केले होते. तब्बल २३ वर्षांनंतर या स्मारकाच्या इमारतीचे उद्घाटन होत आहे. माणूस म्हणून जगण्याचा अधिकार देणाऱ्या संविधानकर्त्याचे हे स्मारक सर्व समाजासाठी असून ते कोणत्याही एका समाजापुरते मर्यादित नसावे. लोकसभा निवडणुकीच्या काळात संविधान बदलले जाणार असल्याच्या अफवा पसरविण्यात आल्या होत्या; मात्र त्या केवळ अफवाच ठरल्या. बापजन्मात संविधान कुणीही बदलू शकत नाही. अशी वेळ आलीच तर त्याच्या विरोधात समाजाचे नेतृत्व करण्यास आपण तयार आहोत, असेही त्यांनी ठामपणे सांगितले. बाबासाहेबांच्या स्मारकासाठी एखादा कार्यकर्ता काम करत असेल तर समाजाने त्याच्या पाठीशी उभे राहिले पाहिजे. ‘विकास हीच माझी जात आणि विकास हाच माझा धर्म’ या भावनेतून आपण काम करत असल्याचे सांगून त्यांनी भविष्यकाळात सर्वांनी एकसंघपणे सामाजिक कार्य करण्याचे आवाहन केले. आखाती देशांतील लोकही ‘युद्ध नको, बुद्ध हवा’ असा संदेश देत आहेत. या स्मारकातून बाबासाहेबांचे विचार दीपस्तंभाप्रमाणे समाजाला दिशा देणारे ठरावेत आणि ते जनमानसात रुजावेत, असेही ते म्हणाले. कार्यक्रमाच्या प्रास्ताविकात पाली पंचक्रोशी बौद्ध समाज मंडळाचे सल्लागार एम. बी. कांबळे यांनी स्मारकाच्या उभारणीविषयी सविस्तर माहिती दिली. कार्यक्रमाला परिसरातील ग्रामस्थ मोठ्या संख्येने उपस्थित होते.

प्रतिनिधी : कोकणधारा चिपळूण : शिवसेना महिला आघाडीच्या वतीने आंतरराष्ट्रीय महिला दिनाच्या औचित्याने रविवारी सायंकाळी नगराध्यक्ष उमेश सकपाळ यांच्या माऊली संपर्क कार्यालयात ‘खेळ पैठणीचा’ या विशेष कार्यक्रमाचे आयोजन करण्यात आले होते. या कार्यक्रमाला चिपळूण शहरातील महिलांचा उत्स्फूर्त प्रतिसाद लाभला. कार्यक्रमात स्वप्नाली बांदेकर, श्रुती बागडे आणि मधुरा नवरत या पैठणीच्या मानकरी ठरल्या.कार्यक्रमाची सुरुवात हिंदुहृदयसम्राट स्वर्गीय बाळासाहेब ठाकरे व मीनाताई ठाकरे यांच्या प्रतिमेला पुष्पहार अर्पण करून तसेच दीपप्रज्वलनाने करण्यात आली. यावेळी उपनगराध्यक्ष रूपाली दांडेकर, शिवसेना महिला आघाडीच्या जिल्हाप्रमुख रश्मीताई गोखले, तालुकाप्रमुख सुप्रियाताई सुर्वे, शहरप्रमुख प्राजक्ता टकले, सुकन्या चव्हाण, शिक्षण व क्रीडा समिती सभापती हर्षाली पवार, महिला व बालकल्याण समिती सभापती रसिका देवळेकर, नगरसेविका वैशाली निमकर, अंजली कदम, वैशाली कदम, पंचायत समितीच्या माजी सभापती व जिल्हा परिषद सदस्या पूजाताई निकम, आरतीताई सकपाळ, महिला बालकल्याण समितीच्या उपाध्यक्षा राणी महाडिक, नगरसेविका नीलम जाधव आदी मान्यवर उपस्थित होते. ‘खेळ पैठणीचा’ या खेळाचे सूत्रसंचालन योगेश बांडागळे यांनी केले. कार्यक्रमादरम्यान प्रश्नमंजुषा स्पर्धा घेण्यात आली. यामध्ये ऐश्वर्या लांडे, प्रतिभा खोत, निकिता शिंदे, विद्या नरळकर, पूनम भोजने यांना विशेष बक्षिसे देऊन गौरविण्यात आले. ज्येष्ठ महिलांसाठी घेण्यात आलेल्या खेळांमध्ये मनीषा पाटील प्रथम, अनुसया पानकर द्वितीय, तर अमिता नवरत तृतीय ठरल्या. तसेच खेळादरम्यान काढण्यात आलेल्या लकी ड्रॉमध्ये गीता कदम, मनीषा नवरत आणि राखी कमलाकर या भाग्यवान ठरल्या. विजेत्या तीन महिलांना पैठणी देऊन सन्मानित करण्यात आले. या कार्यक्रमाच्या यशस्वीतेसाठी संगीता ठोंबरे, विशाखा उत्तेकर, तेजू साटम, दिशा किंजलकर, प्रिया शिंदे, अनामिका हरदारे, अपर्णा पवार, गायत्री जोशी, स्मिता खंदारे, वंदना पाटील, प्रतीक्षा हरवडे, रिया कांबळी, स्नेहा मोरे, अर्चना कारेकर यांनी विशेष परिश्रम घेतले. सुमारे तीन तास चाललेल्या या ‘खेळ पैठणीचा’ कार्यक्रमाने उपस्थित महिलांचे चांगलेच मनोरंजन केले.