मुंबई | १५ जानेवारी २०२६ :बृहन्मुंबई महानगरपालिका सार्वत्रिक निवडणूक 2025–26 अंतर्गत आज, गुरुवार १५ जानेवारी २०२६ रोजी पार पडलेल्या मतदानानंतर आता सर्वांचे लक्ष उद्या होणाऱ्या मतमोजणीकडे लागले आहे. मुंबई महापालिकेच्या २२७ प्रभागांसाठी झालेल्या या निवडणुकीची मतमोजणी प्रक्रिया शुक्रवार, १६ जानेवारी २०२६ रोजी सकाळी १० वाजल्यापासून सुरू होणार आहे. ही मतमोजणी बृहन्मुंबई महानगरपालिका कार्यक्षेत्रातील विविध ठिकाणी उभारण्यात आलेल्या २३ मतमोजणी केंद्रांवर पार पडणार असून, त्यासाठी स्वतंत्र निवडणूक निर्णय अधिकाऱ्यांची नियुक्ती करण्यात आली आहे. 227 प्रभागांसाठी 23 निवडणूक निर्णय अधिकारी मुंबई महानगरपालिका कार्यक्षेत्रातील एकूण २२७ निवडणूक प्रभागांकरिता २३ निवडणूक निर्णय अधिकारी नेमण्यात आले आहेत. प्रत्येक निर्णय अधिकाऱ्यांच्या कार्यक्षेत्रात स्वतंत्र अभिरक्षा कक्ष (Strong Room) आणि मतमोजणी कक्ष निश्चित करण्यात आले आहेत. या सर्व ठिकाणांना सार्वजनिक बांधकाम विभाग (PWD) आणि पोलिस विभागाकडून आवश्यक ती अधिकृत मान्यता देण्यात आली आहे. मतमोजणी केंद्रांची रचना, टेबल मांडणी, अधिकारी-कर्मचाऱ्यांची नेमणूक, सीसीटीव्ही यंत्रणा, अग्निशमन व्यवस्था तसेच वैद्यकीय सुविधा यांचा सविस्तर आढावा घेऊन अंतिम नियोजन करण्यात आले आहे. कायदा व सुव्यवस्थेसाठी पोलिस बंदोबस्त मतमोजणीदरम्यान कोणताही कायदा व सुव्यवस्थेचा प्रश्न उद्भवू नये यासाठी मुंबई पोलिसांशी विशेष समन्वय साधण्यात आला आहे. सर्व मतमोजणी केंद्रांवर कडक पोलिस बंदोबस्त तैनात करण्यात येणार असून, संवेदनशील भागांमध्ये अतिरिक्त सुरक्षा उपाय राबवण्यात येणार आहेत. तसेच मतमोजणी केंद्र परिसरात वाहतूक नियंत्रण, वाहनतळ व्यवस्था आणि जमाव नियंत्रणासाठी स्वतंत्र आराखडा तयार करण्यात आला आहे. 2,299 अधिकारी-कर्मचारी मतमोजणीत सहभागी मतमोजणी प्रक्रिया सुरळीत पार पाडण्यासाठी एकूण अशा एकूण २,२९९ अधिकारी-कर्मचाऱ्यांची नियुक्ती करण्यात आली आहे. या सर्व कर्मचाऱ्यांना मतमोजणीपूर्व प्रशिक्षण देण्यात आले असून, अचूकता व पारदर्शकता राखण्यासाठी संगणकीय प्रणालीचा वापर केला जाणार आहे. मतमोजणी केंद्रांचे तपशील (संक्षेप) मुंबईतील आर, पी, के, एच, टी, एस, एन, एम, एल, एफ, जी, डी, ई, बी आणि ए विभागांतील प्रभागांसाठी वेगवेगळ्या ठिकाणी मतमोजणी होणार आहे.यामध्ये दहिसर, बोरीवली, कांदिवली, मालाड, गोरेगाव, अंधेरी, सांताक्रुझ, मुलुंड, घाटकोपर, चेंबूर, कुर्ला, सायन, दादर, वरळी, गिरगाव, भायखळा आदी परिसरांचा समावेश आहे. प्रत्येक मतमोजणी केंद्रावर संबंधित निवडणूक निर्णय अधिकारी संपूर्ण प्रक्रियेवर देखरेख ठेवणार आहेत. माध्यमांसाठी स्वतंत्र व्यवस्था मतमोजणी प्रक्रियेचे वार्तांकन सुरळीत व्हावे यासाठी प्रत्येक केंद्रावर प्रसारमाध्यमांसाठी स्वतंत्र कक्ष उभारण्यात आले आहेत. अधिकृत निकाल जाहीर होताच त्याची माहिती संगणकीय प्रणालीद्वारे अद्ययावत केली जाणार आहे. मुंबई महापालिकेच्या 227 प्रभागांसाठी झालेल्या या निवडणुकीचा निकाल उद्या, १६ जानेवारी २०२६ रोजी स्पष्ट होणार असून, मुंबईच्या राजकारणाची पुढील दिशा ठरवणारा हा दिवस ठरणार आहे. मतमोजणीची प्रक्रिया किती शांत, पारदर्शक आणि शिस्तबद्ध पद्धतीने पार पडते, याकडे राज्यासह देशाचे लक्ष लागले आहे. ✍️ लेखक : कोंकणधारा डेस्क
