दोडामार्ग : भूषण सावंत : सिंधुदुर्ग जिल्ह्यातील शैक्षणिक क्षेत्रात झोळंबे शाळेने पुन्हा एकदा आपली गुणवत्ता सिद्ध करत उल्लेखनीय यश मिळवले आहे. जिल्हा परिषद सिंधुदुर्ग मार्फत राबविण्यात आलेल्या प्रधानमंत्री पोषण शक्ती निर्माण योजनेअंतर्गत आयोजित परसबाग स्पर्धेत झोळंबे शाळेने जिल्ह्यात तृतीय क्रमांक पटकावत गावाच्या शिरपेचात मानाचा तुरा रोवला आहे.

या दिमाखदार यशाबद्दल शाळेचा शिक्षण सभापती प्रीतेश राऊळ यांच्या हस्ते विशेष सत्कार करण्यात आला. या प्रसंगी शाळा व ग्रामस्थांच्या वतीने सन्मान स्वीकारताना अध्यक्ष दिपक गवस उपस्थित होते. तसेच गटशिक्षणाधिकारी श्री. नदाफ यांचीही प्रमुख उपस्थिती लाभली.

या यशामागे विद्यार्थ्यांचे कष्ट, शिक्षकांचे मार्गदर्शन आणि ग्रामस्थांचे सहकार्य महत्त्वाचे ठरले असल्याचे मान्यवरांनी नमूद केले. झोळंबे शाळेच्या या कामगिरीमुळे संपूर्ण परिसरात अभिमानाचे वातावरण निर्माण झाले असून, भविष्यातही अशाच यशाची परंपरा कायम राहील, असा विश्वास व्यक्त करण्यात आला.