प्रतिनिधी : कोकणधारा

दापोली: दापोली तालुक्यातील दापोली-खेड मार्गावर वाकवलीजवळ असलेल्या उन्हवरे फाट्याजवळ मंगळवारी पहाटे एका दुचाकीचा भीषण अपघात होऊन एका तरुणाचा मृत्यू झाला, तर दुसरा गंभीर जखमी झाला आहे.

मिळालेल्या माहितीनुसार, ३१ मार्च रोजी पहाटे सुमारे ३ वाजता नरेश चंद्रकांत रुके (वय ३४, रा. जालगाव बौद्धवाडी, ता. दापोली) आणि त्यांचा मित्र अमित अरुण माने (वय ३५, रा. काळकाई कोंड, ता. दापोली) हे अ‍ॅक्टिव्हा (क्र. MH 08 BF 3766) दुचाकीवरून प्रवास करत होते. उन्हवरे फाट्याजवळ आल्यावर चालकाचा ताबा सुटल्याने दुचाकी रस्त्याच्या कडेला असलेल्या गटारावर आदळली.

हा अपघात अत्यंत भीषण होता. धडकेमुळे दुचाकीचा पुढील व मागील भाग पूर्णपणे नुकसानग्रस्त झाला. अपघातानंतर दोघेही रस्त्याच्या कडेला गंभीर जखमी अवस्थेत पडले होते.

दरम्यान, नरेश रुके रात्री घरी न परतल्याने त्यांच्या नातेवाईकांनी सकाळी फोन केला असता पोलिसांनी अपघाताची माहिती दिली. घटनेची माहिती मिळताच नातेवाईक व पोलिसांनी घटनास्थळी धाव घेतली. ग्रामस्थांच्या मदतीने जखमींना तातडीने उपजिल्हा रुग्णालय, दापोली येथे दाखल करण्यात आले.

मात्र, वैद्यकीय अधिकाऱ्यांनी तपासणीनंतर नरेश रुके यांना पहाटे ५:०५ वाजता मृत घोषित केले. गंभीर जखमी अमित माने यांच्या डोक्याला गंभीर दुखापत झाल्याने त्यांना पुढील उपचारासाठी डेरवण येथील रुग्णालयात हलवण्यात आले आहे.

या घटनेची नोंद दापोली पोलीस ठाण्यात करण्यात आली असून, पुढील तपास पोलीस हवालदार बुरोंडकर करत आहेत.