प्रतिनिधी : कोकणधारा

मुंबई : राष्ट्रवादी काँग्रेस पक्ष (शरदचंद्र पवार) यांच्या अल्पसंख्याक विभागाची संघटनात्मक आढावा बैठक सोमवार, दि. ७ एप्रिल २०२५ रोजी मुंबई येथील प्रदेश कार्यालयात पार पडली. पक्षाच्या राष्ट्रीय कार्याध्यक्षा तथा खासदार सुप्रिया सुळे यांच्या अध्यक्षतेखाली आणि प्रदेशाध्यक्ष तथा आमदार शशिकांत शिंदे यांच्या उपस्थितीत ही बैठक संपन्न झाली.

बैठकीदरम्यान पक्ष संघटन बळकट करण्यासोबतच धार्मिक तणावाला बळी न पडता सामाजिक ऐक्य अबाधित राखणे, तसेच अन्यायाविरुद्ध संघटितपणे लढा उभारणे यासाठी सामूहिक प्रयत्न करण्याचे आवाहन मान्यवरांनी उपस्थित कार्यकर्त्यांना केले.
यावेळी अनेक तरुणांनी राष्ट्रवादी काँग्रेस पक्षात जाहीर प्रवेश केला. तसेच पक्ष संघटनेतील विविध पदांवर नियुक्त्याही करण्यात आल्या. या बैठकीत रईस अलवी यांची राष्ट्रवादी काँग्रेस पक्ष (शरदचंद्र पवार) अल्पसंख्याक जिल्हाध्यक्षपदी फेरनिवड करण्यात आली. त्यांच्या फेरनिवडीमुळे कार्यकर्त्यांमध्ये समाधानाचे वातावरण असून, त्यांच्या पुढील कार्यकाळाकडून अपेक्षा व्यक्त केल्या जात आहेत.

या महत्वपूर्ण बैठकीस पक्षाचे प्रदेश सरचिटणीस रवींद्र पवार, मुंबई विभागीय निवडणूक प्रभारी सहअध्यक्ष सोहेल सुभेदार, अल्पसंख्याक विभागाचे राज्यप्रमुख अफजल फारूक, प्रदेश कार्याध्यक्ष मुजाहिद खान, वारीस पठाण, प्रदेश उपाध्यक्ष रहेमान खान पठाण, सय्यद अन्सारअली, शमीम अहमद, युवक प्रदेशाध्यक्ष महेबुब शेख, तसेच सुहास उभे, मुबिन भाई परकर, मोहसीन मुल्ला यांच्यासह राज्यभरातील अनेक पदाधिकारी आणि कार्यकर्ते मोठ्या संख्येने उपस्थित होते.