प्रतिनिधी : कोकणधारा

पाचल (वार्ताहर) : राजापूर तालुक्यातील पाचल परिसरात घरगुती गॅस सिलिंडरचा काळाबाजार होत असल्याचा धक्कादायक प्रकार उघडकीस आला आहे. राजापूर पुरवठा विभागाने बुधवारी संबंधित सर्व्हिस सेंटरवर धाड टाकत मोठी कारवाई केली.

या कारवाईत तब्बल १०९४ ग्राहकांची गॅस पुस्तिका (कार्ड) आणि एक कमर्शियल सिलिंडर जप्त करण्यात आला असून परिसरात खळबळ उडाली आहे. याबाबतची माहिती तहसीलदार विकास गंबरे यांनी दिली असून पुढील चौकशीसाठी प्रकरण जिल्हा पुरवठा विभागाकडे सोपवण्यात आले आहे.

प्राथमिक माहितीनुसार, सर्व्हिस सेंटरकडून ग्राहकांकडून गॅस कार्ड्स जमा करून घेतली जात होती. या कार्ड्सच्या आधारे सिलिंडर बुक करून प्रत्यक्षात ग्राहकांना गॅस न देता तेच सिलिंडर जादा दराने विक्री केल्याचा संशय आहे. काही ग्राहकांच्या नावावर सिलिंडरची उचल दाखवली गेली, मात्र त्यांना गॅस मिळाला नसल्याने हा प्रकार उघड झाला.

१ एप्रिल रोजी दुपारी सुमारे १.३० वाजता पुरवठा विभागाने छापा टाकून झाडाझडती घेतली असता मोठ्या प्रमाणात गॅस पुस्तिका आणि एक कमर्शियल सिलिंडर आढळून आला. सर्व मुद्देमाल जप्त करण्यात आला आहे.

दरम्यान, सर्व्हिस सेंटरच्या संचालकांनी ग्राहक स्वतःहून कार्ड्स ठेवून जात असल्याचे सांगितले असले, तरी इतक्या मोठ्या प्रमाणावर कार्ड्स सापडल्याने प्रशासनाने संशय व्यक्त केला आहे.

या कारवाईत पुरवठा निरीक्षक निलेश लाड, मंडल अधिकारी पूनम गावित, तलाठी नरके, शशिकांत कांबळे, लिपिक विक्रम पाटील, ग्रामवसूल अधिकारी कृष्णा गोरड, कोतवाल अमित चिले व पोलीस कॉन्स्टेबल निलेश कात्रे सहभागी झाले होते.

या प्रकरणाची सखोल चौकशी सुरू असून दोषींवर कठोर कारवाईची मागणी नागरिकांतून होत आहे.