दिनेश चाफळकर, महाड प्रतिनिधी
कोकण | २० जानेवारी २०२६ :
२३ ते २६ जानेवारी २०२६ या सलग चार दिवसांच्या सुट्ट्यांच्या पार्श्वभूमीवर कोकण रेल्वे मार्गावर प्रवासी आणि पर्यटकांची मोठी गर्दी होण्याची चिन्हे स्पष्टपणे दिसत आहेत. प्रजासत्ताक दिनासह सलग सुट्ट्यांचा लाभ घेण्यासाठी मुंबई, पुणे आणि इतर शहरांतून कोकणात जाणाऱ्या प्रवाशांची संख्या मोठ्या प्रमाणात वाढते. या पार्श्वभूमीवर कोकण रेल्वे मार्गावर तातडीने विशेष रेल्वेगाड्या चालवाव्यात, अशी जोरदार मागणी पुढे येत आहे.

विशेषतः मुंबई ते सावंतवाडी रोड, पुणे ते सावंतवाडी रोड आणि मुंबई ते चिपळूण या मार्गांवर अतिरिक्त विशेष गाड्या सुरू करण्याची मागणी प्रवासी आणि सामाजिक संघटनांकडून केली जात आहे.

नियमित गाड्या आधीच हाऊसफुल

कोकण रेल्वे मार्गावरील बहुतांश नियमित गाड्या सुट्टीच्या आठवड्याभर आधीच पूर्णपणे आरक्षित होतात, हे दरवर्षीचे वास्तव आहे. यंदाही जानेवारीच्या शेवटच्या आठवड्यासाठी बहुतेक गाड्यांचे आरक्षण ‘वेटिंग लिस्ट’मध्ये गेले असून, अनेक प्रवाशांना तिकीट मिळणे अशक्य झाले आहे.

यामुळे मोठ्या संख्येने प्रवासी अडकून पडतात किंवा त्यांना खासगी बस, लक्झरी कोच किंवा खासगी वाहनांवर अवलंबून राहावे लागते. या रस्ते वाहतुकीचे दर प्रचंड वाढलेले असतात, शिवाय प्रवासही असुरक्षित आणि वेळखाऊ ठरतो, अशी तक्रार प्रवाशांकडून सातत्याने केली जात आहे.

पर्यटकांचीही मोठी गर्दी अपेक्षित

सलग सुट्ट्यांमुळे कोकणातील समुद्रकिनारे, देवस्थाने आणि पर्यटनस्थळांवर पर्यटकांची मोठी गर्दी अपेक्षित आहे. दापोली, गणपतीपुळे, मालवण, सावंतवाडी, चिपळूण, आंबोली यांसारखी ठिकाणे या काळात पर्यटकांनी फुलून जातात.

पर्यटनासाठी जाणारे कुटुंबीय, विद्यार्थी, नोकरदार वर्ग आणि चाकरमानी मोठ्या संख्येने कोकणात दाखल होतात. मात्र रेल्वेगाड्यांची मर्यादित संख्या आणि वाढलेली मागणी यामुळे प्रवाशांना मोठ्या अडचणींना सामोरे जावे लागत आहे.

कोकण विकास समितीची रेल्वे मंडळाकडे मागणी

या पार्श्वभूमीवर कोकण विकास समिती ने थेट रेल्वे मंडळाकडे मागणी केली आहे.
समितीच्या मागणीनुसार —

मुंबई ते सावंतवाडी रोड विशेष रेल्वे
पुणे ते सावंतवाडी रोड विशेष रेल्वे
मुंबई ते चिपळूण विशेष रेल्वे

या तीन विशेष गाड्या सलग सुट्ट्यांच्या कालावधीत तातडीने सुरू करण्यात याव्यात.

समितीचे म्हणणे आहे की, दरवर्षी या कालावधीत प्रवाशांची संख्या वाढते, हे माहिती असतानाही पुरेशी व्यवस्था न केल्याने प्रवाशांना नाहक त्रास सहन करावा लागतो. जर विशेष गाड्या चालवण्यात आल्या, तर प्रवाशांची गैरसोय टाळता येईल, तसेच रस्ते वाहतुकीवरील ताणही कमी होईल.