प्रतिनिधी : कोंकणधारा

रत्नागिरी : आखाती देशांतील युद्धजन्य परिस्थितीमुळे व्यावसायिक गॅस सिलिंडरचा पुरवठा खंडित झाल्याने गणपतीपुळे परिसरातील अनेक हॉटेल्स बंद पडली आहेत. यामुळे भाविकांची गैरसोय होत असल्याच्या पार्श्वभूमीवर गणपतीपुळे देवस्थान समितीने स्वयंभू श्री गणपती मंदिरात दिल्या जाणाऱ्या मोफत महाप्रसादाची वेळ वाढवण्याचा निर्णय घेतला आहे.

नवीन वेळेनुसार, दुपारच्या सत्रातील महाप्रसाद दुपारी १२.१५ ते ३ वाजेपर्यंत, तर सायंकाळच्या सत्रात सायंकाळी ७.१५ ते ८.४५ वाजेपर्यंत उपलब्ध राहणार आहे. यापूर्वी ही वेळ अनुक्रमे दुपारी १२.१५ ते २ आणि सायंकाळी ७.१५ ते रात्री ८.१५ अशी होती.

दरम्यान, गॅस टंचाईमुळे लाडू प्रसाद सध्या बंद ठेवण्यात आला आहे. लाडू तयार करण्यासाठी मोठ्या प्रमाणात गॅस लागतो, त्यामुळे हा निर्णय घेण्यात आल्याची माहिती देवस्थान समितीकडून देण्यात आली आहे.