आमदार निलेश राणे यांच्या उपस्थितीत शिवसेनेची जोरदार रणनीती बैठक; “पूर्ण ताकदीने मैदानात उतरणार”

दोडामार्ग | भूषण सावंत :
दोडामार्ग नगरपंचायत निवडणुकीच्या पार्श्वभूमीवर तालुक्यात राजकीय वातावरण चांगलेच तापू लागले असून, शिवसेनेने आता थेट रणशिंग फुंकले आहे. आमदार निलेश राणे यांच्या प्रमुख उपस्थितीत झालेल्या महत्त्वपूर्ण बैठकीत निवडणूक पूर्ण ताकदीनिशी लढवण्याचा ठाम निर्धार करण्यात आला.

या बैठकीत आमदार राणे यांनी पदाधिकाऱ्यांना थेट मार्गदर्शन करत निवडणुकीसाठी आक्रमक रणनीती आखण्याचे आदेश दिले. प्रत्येक प्रभागातील कामांचे काटेकोर नियोजन, जनसंपर्क वाढवणे आणि तळागाळातील मतदारांपर्यंत पोहोचणे यावर विशेष भर देण्यात आला. “आता कोणतीही ढिलाई चालणार नाही, विजय हाच एकमेव लक्ष्य आहे,” असा स्पष्ट संदेश यावेळी देण्यात आला.

तालुक्यातील शिवसेना पदाधिकारी, सरपंच, उपसरपंच आणि शिवसैनिकांच्या उपस्थितीत झालेल्या या बैठकीत आमदार निलेश राणे यांचा विशेष सत्कार करण्यात आला. आगामी निवडणुकीसाठी संघटनात्मक बळकटी, कार्यकर्त्यांचा सक्रिय सहभाग आणि बूथ स्तरावर मजबूत यंत्रणा उभी करण्यावर सखोल चर्चा झाली.

या प्रसंगी आमदार राजन तेली, जिल्हाप्रमुख संजू परब, जिल्हा परिषद व पंचायत समिती सदस्यांसह मोठ्या संख्येने शिवसैनिक उपस्थित होते. संघटना विस्तार, नव्या कार्यकर्त्यांची जोडणी आणि गावागावांत पक्षाची पकड अधिक मजबूत करण्यासाठी ठोस उपाययोजना आखण्यात आल्या.

बैठकीत जिल्हा प्रमुख संजू परब, विधानसभा प्रमुख प्रेमानंद देसाई, उपजिल्हाप्रमुख राजेंद्र निंबाळकर, शैलेश दळवी, गोपाळ गवस, जिल्हा परिषद सदस्या सौ. तळवणेकर, तालुका प्रमुख तथा उपसभापती गणेशप्रसाद गवस, पंचायत समिती सदस्या सौ. सायली निबाळकर, स्नेहा गवस, सरपंच संघटना अध्यक्ष अनिल शेटकर आदी मान्यवर उपस्थित होते.

👉 या निर्णायक बैठकीनंतर दोडामार्ग तालुक्यातील शिवसैनिकांमध्ये प्रचंड उत्साहाचे वातावरण निर्माण झाले असून, येणाऱ्या नगरपंचायत निवडणुकीत शिवसेना जोरदार ताकद दाखवणार असल्याचे स्पष्ट संकेत मिळत आहेत.