प्रतिनिधी : कोकणधारा

चिपळूण : चिपळूण नगर परिषदेचे नगराध्यक्ष उमेशदादा सकपाळ यांनी सोमवारी सायंकाळी इंदिरा गांधी सांस्कृतिक केंद्र येथे नगरपालिकेत काम करणाऱ्या सर्व ठेकेदारांची बैठक घेतली. या बैठकीत ठेकेदारांनी नगराध्यक्ष उमेश सकपाळ यांचा सत्कार करून विविध समस्या व प्रश्न मांडले. नगराध्यक्षांनीही ठेकेदारांच्या अडचणी जाणून घेत संवाद साधला.

या वेळी बोलताना नगराध्यक्ष उमेश सकपाळ म्हणाले की, चिपळूण शहराला आकार देण्याचे महत्त्वाचे काम ठेकेदार बंधू करत असतात. त्यामुळे सर्वांनी उत्तम नियोजन करून दर्जेदार कामे करावीत. चिपळूण शहर स्मार्ट सिटी बनवण्याचे माझे स्वप्न आहे आणि ते पूर्ण करण्यासाठी सर्व ठेकेदारांचे सहकार्य आवश्यक आहे.

या बैठकीला साठहून अधिक ठेकेदार उपस्थित होते. तसेच बांधकाम सभापती कपिल शिर्के, पाणीपुरवठा समिती सभापती निहार कोवळे, नगरसेवक योगेश पवार, मुख्याधिकारी संजय जाधव, बांधकाम विभागाचे श्री. डफळ, श्री. निंबाळकर, सचिन शिंदे यांच्यासह अधिकारी व कर्मचारी उपस्थित होते.

ठेकेदार सुरेश चिपळूणकर, सुरेश पवार, किसन चिपळूणकर व अभिजीत जाधव यांच्या वतीने नगराध्यक्ष, मुख्याधिकारी व नगरसेवकांचा सत्कार करण्यात आला. यानंतर विविध विषयांवर साधक-बाधक चर्चा झाली. सर्व ठेकेदारांनी नगर पालिकेला सहकार्य करण्याची भूमिका घेत चिपळूण शहराच्या विकासासाठी दर्जेदार कामे करण्याची ग्वाही दिली.