भारत

नवी दिल्ली | बिहार विधानसभा निवडणुकीच्या पार्श्वभूमीवर काँग्रेस आणि राष्ट्रीय जनता दल (आरजेडी) यांच्यात जागावाटपावरून पेच निर्माण झाला आहे. काँग्रेसने सुमारे ६० जागांची मागणी केली आहे, मात्र आरजेडी फक्त ५० जागांवरच तडजोडीला तयार असल्याचे सूत्रांनी सांगितले. दिल्लीमध्ये काँग्रेसची महत्त्वाची बैठक काँग्रेस अध्यक्ष मल्लिकार्जुन खरगे आणि खासदार राहुल गांधी यांनी मंगळवारी दिल्लीमध्ये बिहार काँग्रेसचे प्रभारी, प्रदेशाध्यक्ष आणि वरिष्ठ नेत्यांची बैठक बोलावली आहे. या बैठकीत आरजेडीसोबतच्या जागावाटपावरील चर्चेसह पुढील रणनीती ठरवली जाणार आहे. तसेच राहुल गांधींच्या नेतृत्वाखाली नुकतीच पार पडलेली ‘वोटर अधिकार यात्रा’ याचे पुनरावलोकनही होणार आहे. आरजेडी का कमी जागा देत आहे? मागील विधानसभा निवडणुकीत काँग्रेसने ७० जागांवर लढून केवळ १९ जागा जिंकल्या होत्या. यावेळी विरोधी आघाडीत वीआयपी, जेएमएम आणि पशुपति पारस गट यांचा समावेश झाल्यामुळे काँग्रेसवर कमी जागांवर लढण्याचा दबाव आहे. त्याचबरोबर सीपीआय-एमएलने ३० जागांची मागणी केली आहे, जे मागील वेळेपेक्षा जास्त आहे. त्यामुळे आरजेडी स्वतः १४० जागा लढण्याच्या तयारीत असून उर्वरित मित्रपक्षांना जागा वाटण्याची योजना आखत आहे. काँग्रेसचा हक्क मजबूत जागांवर? काँग्रेस काही जागा सोडण्यास तयार आहे, मात्र त्याबदल्यात विरोधी समीकरणात प्रभावी ठरतील अशा मजबूत जागा मिळाव्यात, अशी तिची मागणी आहे. मात्र आरजेडीने अद्याप ती मागणी मान्य केलेली नाही. त्यामुळे काँग्रेसच्या वाट्याला अखेरीस फक्त ५० जागा येण्याची शक्यता व्यक्त केली जात आहे.

नवी दिल्ली | देशात आज (मंगळवार) 15व्या उपराष्ट्रपती पदासाठी मतदान पार पडणार असून याच दिवशी निकालही जाहीर केला जाणार आहे. म्हणजेच संध्याकाळपर्यंत देशाला नवा उपराष्ट्रपती कोण होणार हे स्पष्ट होईल. पद रिक्त कसं झालं? माजी उपराष्ट्रपती जगदीप धनखड यांनी ऑगस्ट 2022 मध्ये पदभार स्वीकारला होता. त्यांचा कार्यकाळ 10 ऑगस्ट 2027 पर्यंत राहणार होता. मात्र 21 जुलै रोजी त्यांनी आरोग्य कारणांमुळे राजीनामा दिल्याने पद रिक्त झाले आणि नव्या निवडणुकीची प्रक्रिया सुरू झाली. उमेदवार कोण? या निवडणुकीत एनडीएकडून सी. पी. राधाकृष्णन मैदानात आहेत, तर विरोधी INDIA आघाडीकडून जस्टिस बी. सुदर्शन रेड्डी यांना उमेदवारी देण्यात आली आहे. नंबर गेम कोणाच्या बाजूने? एकूण 782 प्रतिनिधी मतदान करणार आहेत. त्यापैकी सुमारे 420 पेक्षा जास्त मते एनडीएच्या बाजूने असल्याचा अंदाज आहे, तर INDIA ब्लॉककडे जवळपास 312 मते आहेत. दरम्यान, काही पक्षांनी मतदानात सहभागी न होण्याचा निर्णय घेतल्याने 48 मते दोन्ही गटांना मिळणार नाहीत. शर्यत रोचक का आहे? बहुमत एनडीएकडे असलं तरी निकालाकडे सगळ्यांचे लक्ष लागले आहे. राधाकृष्णन आणि सुदर्शन रेड्डी यांच्या कार्यक्षेत्रात काही साम्य असलं, तरी अनेक मुद्द्यांवर दोघेही परस्परविरोधी आहेत. त्यामुळे या निवडणुकीला राजकीय वर्तुळात वेगळीच उत्सुकता निर्माण झाली आहे.