रत्नागिरी (प्रतिनिधी) – गुहागर तालुक्यातील अंजनवेल दीपस्तंभासमोर समुद्रात बेकायदेशीर मासेमारी करणाऱ्या दोन नौकांवर मत्स्यव्यवसाय विभागाने कारवाई करत लाखोंचा दंड ठोठावला आहे. ही कारवाई शुक्रवारी (१३ मार्च) रात्री सुमारे १० वाजता करण्यात आली.

सहायक मत्स्यव्यवसाय आयुक्त कार्यालयाच्या पथकाने नवदुर्गा गस्ती नौकेतून समुद्रात गस्त घालत असताना ही कारवाई केली. परवाना अधिकारी स्वप्निल चव्हाण, पर्यवेक्षक विनायक शिंदे, सुरक्षारक्षक अक्षय मयेकर व त्यांच्या सहकाऱ्यांनी अंजनवेल किनाऱ्यापासून सुमारे २० वाव अंतरावर संशयास्पद हालचाली करणाऱ्या नौकांची पाहणी केली.

यावेळी रत्नागिरीतील ए. आर. मयेकर यांच्या मालकीची ‘श्री सद्गुरू कृपा’ ही नौका एलईडी प्रकाशाचा वापर करून मासेमारी करताना आढळली. तसेच गुजरातमधील दीव येथील ट्रॉलिंग नौकाही बेकायदेशीररीत्या मासेमारी करताना सापडली.

दोन्ही नौकांना ताब्यात घेऊन दाभोळ बंदरात अटकावून ठेवण्यात आले. यानंतर परवाना अधिकाऱ्यांनी अभिनिर्णय अधिकारी तथा सहायक मत्स्यव्यवसाय आयुक्त सागर कुवेस्कर यांच्या न्यायालयात अहवाल सादर केला.

मंगळवारी झालेल्या सुनावणीत अभिनिर्णय अधिकारी सागर कुवेस्कर यांनी निर्णय देत एलईडी मासेमारी करणाऱ्या ‘श्री सद्गुरू कृपा’ नौकेचे मालक ए. आर. मयेकर यांना ५ लाख रुपयांचा दंड ठोठावला. तसेच गुजरातमधील ट्रॉलिंग नौकेचे मालक विनोद सोळंखी यांना ३ लाख २७ हजार ८०० रुपयांचा दंड भरण्याचे आदेश देण्यात आले.

या कारवाईमुळे बेकायदेशीर मासेमारी करणाऱ्यांमध्ये खळबळ उडाली असून मत्स्यव्यवसाय विभागाने अशा कारवाया पुढेही सुरू राहतील, असा इशारा दिला आहे.