प्रतिनिधी : कोकणधारा

देवरूख (संगमेश्वर) : संगमेश्वर तालुक्यातील वांझोळे गावची सुवर्णकन्या आणि राष्ट्रीय सुवर्णपदक विजेती खो-खो खेळाडू तेजस्विनी सनगले हिचा कोल्हापूर येथे उपचारादरम्यान दुर्दैवी मृत्यू झाला. पंधरा दिवसांपूर्वी झालेल्या अपघातात तिच्या डोक्याला गंभीर दुखापत झाली होती. त्यानंतर तिच्यावर कोल्हापूर येथे उपचार सुरू होते; मात्र बुधवारी रात्री उपचारादरम्यान तिची प्राणज्योत मालवली.

तेजस्विनी ही वांझोळे गावातून घडलेली एक आघाडीची खेळाडू होती. मागील काही वर्षांत वांझोळे गावाने खो-खो क्षेत्रात आपली वेगळी ओळख निर्माण केली असून अनेक राज्य व राष्ट्रीय स्तरावरील खेळाडू या गावातून घडले आहेत. त्या परंपरेतील तेजस्विनी ही एक उज्ज्वल नाव होती.

अवघ्या १२ व्या वर्षी भुवनेश्वर (ओडिशा) येथे झालेल्या १४ वर्षांखालील राष्ट्रीय स्पर्धेसाठी तिची निवड झाली होती. त्या स्पर्धेत तिने उत्कृष्ट कामगिरी करत संघाला सुवर्णपदक मिळवून देण्यात महत्त्वाची भूमिका बजावली. जि.प. शाळेतील सर्वात कमी वयातील राष्ट्रीय खेळाडू म्हणूनही तिने विशेष नावलौकिक मिळवला होता.

उंचीने लहान असली तरी खेळातील चपळता, वेग आणि जिद्द यामुळे ती मैदानावर उठून दिसत असे. अनेक सामने तिने आपल्या संघासाठी जिंकून दिले होते. मात्र खो-खोच्या मैदानावर जिद्दीने लढणारी ही खेळाडू आयुष्याचा सामना हरली, ही बाब सर्वांना वेदना देणारी ठरत आहे.

तिच्या अकाली निधनामुळे सनगले कुटुंबावर दुःखाचा डोंगर कोसळला असून वांझोळे गावासह संपूर्ण पंचक्रोशीवर शोककळा पसरली आहे. रत्नागिरी खो-खो परिवाराचीही ही मोठी हानी मानली जात आहे. संगमेश्वर तालुक्यातून सर्वत्र हळहळ व्यक्त केली जात आहे.