सीएम फडणवीस यांच्या हस्ते सन्मान
नवेल तालुका पोलीस ठाण्याच्या स्मार्ट वर्क, सुयोग्य व्यवस्थापन आणि उत्तम कामगिरीला मोठी दाद मिळाली आहे. या ठाण्याला आयएसओ मानांकन प्राप्त झाले असून, मुख्यमंत्री देवेंद्र फडणवीस यांच्या हस्ते वरिष्ठ पोलीस निरीक्षक गजानन घाडगे यांना प्रमाणपत्र प्रदान करण्यात आले.
पनवेल तालुका पोलीस ठाण्याच्या अखत्यारीत खारपाडा टोल नाका ते वावंजे, धोदानी, शिरवली व खालापूर तालुका सीमेपर्यंतचा मोठा भाग येतो. या भागात नवनवीन गृहनिर्माण संकुलांसह ग्रामीण परिसरही आहे. त्यामुळे कायदा आणि सुव्यवस्था राखण्याची मोठी जबाबदारी तालुका पोलिसांवर असते. वरिष्ठ पोलीस निरीक्षक घाडगे यांच्या नेतृत्वाखाली हे कर्तव्य प्रभावीपणे बजावण्यात आले.
या ठाण्यात प्रशस्त इमारत, स्वच्छता, पासपोर्ट, बारानिशी, वायरलेस, स्टेशन डायरी यांसाठी स्वतंत्र खोल्या, महिला-पुरुष आरोपींसाठी कोठडी, संगणक, इंटरनेट, वायफाय, कॅमेरे, पिण्याचे पाणी अशा सुविधा उपलब्ध आहेत. दाखल गुन्ह्यांचे अन्वेषण व प्रकटीकरणाचे प्रमाण समाधानकारक आहे. गुन्हेगारांमध्ये जरब निर्माण करण्यातही यश मिळाले आहे.
पायाभूत सुविधा, तंत्रज्ञानाचा वापर, तत्पर कामकाज, सायबर क्राईम नियंत्रण, प्रशिक्षित पोलिस दल, नागरिकांचा अभिप्राय, सुरक्षा निकष अशा 37 मुद्द्यांवर पनवेल तालुका पोलीस ठाणे पात्र ठरले आहे.
नवी मुंबईतील सानपाडा पोलीस ठाण्याच्या उद्घाटनप्रसंगी सीएम फडणवीस यांच्या हस्ते हे प्रमाणपत्र प्रदान करण्यात आले. यावेळी नवी मुंबईचे पोलीस आयुक्त मिलिंद भारंबे, सह आयुक्त संजय येनपुरे, उपायुक्त प्रशांत मोहिते आणि सहाय्यक आयुक्त भाऊसाहेब ढोले उपस्थित होते. त्यांनी वरिष्ठ निरीक्षक घाडगे आणि त्यांच्या टीमचे अभिनंदन केले.
By
