प्रतिनिधी : कोकणधारा

चिपळूण : चिपळूण नगर परिषदेचे नगराध्यक्ष उमेश सकपाळ यांनी बुधवारी सायंकाळी पाग येथील उद्यानाला भेट देत तेथील दुरवस्थेबाबत उद्यान विभागाच्या अधिकाऱ्यांना चांगलेच धारेवर धरले. उद्यानातील स्वच्छतेचा अभाव, बंद असलेले स्वच्छतागृह, वाढलेले गवत आणि अपुऱ्या सुविधांबाबत त्यांनी तीव्र नाराजी व्यक्त केली.

या वेळी नगराध्यक्षांनी उद्यान परिसर स्वच्छ ठेवण्याच्या, नागरिकांना दर्जेदार सुविधा उपलब्ध करून देण्याच्या तसेच उद्यान सकाळी व सायंकाळी नियमित सुरू ठेवण्याच्या सूचना दिल्या. “मी दिलेल्या सर्व सूचनांची अंमलबजावणी करा, आठ दिवसांनंतर पुन्हा पाहणी करणार,” असा इशाराही त्यांनी दिला.

भेटीदरम्यान उद्यानात स्वच्छता करण्यात आल्याचे दिसून आले. मात्र, स्थानिक नागरिकांशी संवाद साधताना त्यांनी ही स्वच्छता नेहमीच असते का, असा प्रश्न विचारला असता नागरिकांनी नकारार्थी उत्तर दिले. त्यामुळे नगराध्यक्षांच्या दौऱ्याच्या पार्श्वभूमीवरच स्वच्छता करण्यात आल्याचे स्पष्ट झाले.

उद्यानात विजेची सुविधा नसल्याचे निदर्शनास आल्याने तातडीने वीज पुरवठ्याची व्यवस्था करण्याच्या सूचना त्यांनी विद्युत विभागाला दिल्या. वीज उपलब्ध झाल्यानंतर सायंकाळी होणारे गैरप्रकार रोखता येतील, असेही त्यांनी सांगितले. तसेच बांधकाम विभागाच्या अधिकाऱ्यांना पेव्हर ब्लॉक दुरुस्त करण्याचे, उद्यानाची दोन्ही गेट्स सुरू ठेवण्याचे व इतर अनधिकृत प्रवेश मार्ग बंद करण्याचे निर्देश दिले.

स्वच्छतागृहाची तातडीने दुरुस्ती करण्याचे आदेश देताना उद्यान विभागाचे प्रमुख बापू साडविलकर यांनाही दुरवस्थेबाबत सुनावले. आरोग्य सभापती शुभम पिसे यांनीही आरोग्य व उद्यान विभागाला आवश्यक त्या सूचना केल्या.

या पाहणीवेळी आरोग्य सभापती शुभम पिसे, नगरसेविका शितल रानडे, शिवसेना उपशहर प्रमुख सुयोग चव्हाण, माजी नगरसेविका सई चव्हाण, तसेच विपुल कांबळी, नयन चव्हाण, संदेश गोरीवले, गणेश किंजळकर, प्रसाद शिंदे, सोहम चव्हाण, अमोल तटकरी, प्रितेश सुतार, हेमंत केळसकर, धिरज तांबडे, प्रथमेश कांबळी, अथर्व चव्हाण आदी उपस्थित होते.