दिनेश चाफळकर, प्रतिनिधी महाड

महाड | ११ जानेवारी २०२६ :
महाड नगरपरिषद निवडणुकांच्या मतदान प्रक्रियेदरम्यान राष्ट्रवादी काँग्रेस आणि शिवसेना यांच्यात झालेल्या राड्याने संपूर्ण शहरात तणावाचे वातावरण निर्माण झाले होते. या घटनेनंतर दोन्ही राजकीय पक्षांकडून परस्परविरोधी गुन्हे दाखल करण्यात आले असून, पोलिसांनी तपासाला वेग दिला आहे. याच प्रकरणात गुरुवारी महाड शहर पोलिसांनी आणखी एका संशयित आरोपीला अटक केल्याने या प्रकरणाला नवे वळण मिळाले आहे.

अटक करण्यात आलेल्या आरोपीचे नाव विजय रामचंद्र घरटकर (वय ४६, रा. टोळ बु., ता. महाड) असे आहे. ७ जानेवारीच्या रात्री लोणेरे फाटा येथील नंदिनी एंटरप्राइजेस परिसरातून गोरेगाव पोलीस ठाण्याच्या सहकार्याने महाड शहर पोलिसांनी ही कारवाई केली.

या राड्याप्रकरणी याआधीच काही संशयितांना महाड शहर पोलिसांनी ताब्यात घेतले होते. मात्र, तपासादरम्यान आणखी काही नावे समोर आल्यानंतर पोलिसांनी शोधमोहीम तीव्र केली. त्यानुसार विजय रामचंद्र घरटकर याचा सहभाग असल्याची माहिती पोलिसांना मिळाल्याचे सांगण्यात येत आहे.

गोरेगाव पोलीस ठाण्याच्या सहकार्याने लोणेरे फाटा परिसरात सापळा रचून घरटकर याला ताब्यात घेण्यात आले. अटकेनंतर त्याला महाड शहर पोलीस ठाण्यात आणून पुढील चौकशी करण्यात आली.

अटक केलेल्या आरोपीला शुक्रवारी न्यायालयात हजर करण्यात आले. सुनावणीदरम्यान सरकारी वकिलांनी या प्रकरणातील गंभीरता लक्षात घेता आरोपीची पोलीस कोठडी आवश्यक असल्याचे नमूद केले. त्यानंतर न्यायालयाने आरोपीला १२ जानेवारीपर्यंत पोलीस कोठडी सुनावली आहे.

पोलिस सूत्रांनी दिलेल्या माहितीनुसार, या कालावधीत आरोपीची सखोल चौकशी करून राड्यामागील नेमकी भूमिका, इतर सहभागी व्यक्ती आणि घटनाक्रम उलगडण्याचा प्रयत्न केला जाणार आहे.

महाड नगरपरिषद निवडणुकीदरम्यान झालेल्या राड्याप्रकरणी आणखी एका आरोपीची अटक ही तपासातील महत्त्वाची पायरी मानली जात आहे. मात्र, या घटनेमुळे राजकीय संघर्ष कुठपर्यंत जाऊ शकतो, याचं गंभीर चित्र समोर आलं आहे. लोकशाही टिकवायची असेल तर निवडणुकांमध्ये हिंसाचाराला अजिबात थारा न देता, कायद्याच्या चौकटीतच राजकारण होणं आवश्यक आहे, अशी अपेक्षा नागरिकांकडून व्यक्त होत आहे.

✍️ लेखक : कोंकणधारा डेस्क