योगेश बंडागळे, चिपळूण |

कोंकणधारा डेस्क:

कोकणातील पहिला मानाचा शिमगोत्सव अशी ओळख असलेल्या चिपळूणमधील गोवळकोट येथील श्रीदेवी करंजेश्वरी मंदिर येथे शनिवारी सायंकाळी भक्तीमय वातावरणात उत्साहात प्रारंभ झाला. परंपरेनुसार देवी करंजेश्वरी आणि श्री देव सोमेश्वर यांच्या पालख्या मंदिरातून विधीवत बाहेर पडल्या.

ढोल-ताशांच्या गजरात आणि भक्तांच्या जयघोषात पालख्या ऐतिहासिक गोविंदगड किल्ला येथे रेडझाई मातेच्या दर्शनासाठी पोहोचल्या. पारंपरिक विधी आणि धार्मिक मंत्रोच्चारात हा सोहळा पार पडला.

 बाजार पुलावर जल्लोषात स्वागत

दर्शनानंतर रात्री सुमारे अकरा वाजता श्रीदेवी करंजेश्वरी आपल्या माहेरी, पेठमाप येथे आगमन झाले. बाजार पुलावर दोन्ही पालख्यांचे जल्लोषात स्वागत करण्यात आले. जुना कालभैरव देवस्थानासह विविध ढोल पथकांनी उपस्थित राहून उत्सवाची शोभा वाढवली. संपूर्ण परिसर ढोल-ताशांच्या निनादाने दुमदुमून गेला होता.

पहाटे होम प्रज्वलित; सोमवारी ‘शेरणी’ सोहळा

पेठमाप येथे पहाटे चार वाजण्याच्या सुमारास होम प्रज्वलित होणार आहेत. संपूर्ण महाराष्ट्रात प्रसिद्ध असलेला श्रीदेवीचा ‘शेरणी काढण्याचा’ सोहळा सोमवारी पार पडणार असून त्यानंतर या मानाच्या शिमगोत्सवाची सांगता होणार आहे.

चिपळूण शहर भक्तीरंगात

गोवळकोटसह संपूर्ण चिपळूण शहर सध्या भक्ती, परंपरा आणि उत्साहाच्या रंगात न्हाऊन निघाले आहे. हजारो भाविक या शिमगोत्सवात सहभागी होत असून कोकणातील सांस्कृतिक वारसा आणि परंपरेची समृद्ध परंपरा पुन्हा एकदा उजळून निघाली आहे.