प्रतिनिधी : कोकणधारा

चिपळूण : महिलांनी त्यांच्या कायदेशीर हक्कांबाबत जागरूक राहणे ही काळाची गरज आहे, असे प्रतिपादन जिल्हा न्यायाधीश डॉ. अनिता नेवसे यांनी केले.

तालुका विधी सेवा समिती व सह्याद्री तंत्रनिकेतन महाविद्यालय, सावर्डे (ता. चिपळूण) यांच्या संयुक्त विद्यमाने महिलांमध्ये कायदेविषयक जागरूकता निर्माण करण्यासाठी आयोजित शिबिरात त्या बोलत होत्या. यावेळी प्राचार्य मंगेश भोसले, प्रा. लिना जावकर, अॅड. वृषाली सावंत तसेच जिजाऊ ब्रिगेडच्या अनुजा भोसले उपस्थित होत्या.

डॉ. नेवसे यांनी विद्यार्थिनींना ८ मार्च हा दिवस आंतरराष्ट्रीय महिला दिन म्हणून का साजरा केला जातो याची ऐतिहासिक पार्श्वभूमी सांगितली. गेल्या १२० वर्षांच्या कालखंडात महिलांनी आपल्या हक्कांसाठी संघर्ष करत विविध स्तरांवर लढा दिला असल्याचे त्यांनी नमूद केले.
यावेळी त्यांनी महिलांना घटनेने दिलेले अधिकार तसेच महिलांसाठी असलेल्या विविध कायद्यांच्या तरतुदींबाबत सविस्तर मार्गदर्शन केले. हुंडाबळी, छेडछाड, लैंगिक छळ, कौटुंबिक हिंसाचार, स्त्रीधन, संपत्ती हक्क यांसारख्या विषयांवर माहिती देत महिलांच्या संरक्षणासाठी अस्तित्वात असलेले कायदे महत्त्वाचे मार्गदर्शक ठरतात, असे त्यांनी सांगितले.

हुंडा प्रतिबंधक कायदा, पोटगीच्या तरतुदी, मुस्लिम महिला संरक्षण कायदा, हिंदू वारसा कायदा, हिंदू दत्तक व भरणपोषण कायदा, गर्भलिंग निदान प्रतिबंध कायदा तसेच कामाच्या ठिकाणी महिलांच्या लैंगिक छळ प्रतिबंधक कायद्याच्या तरतुदी त्यांनी सोप्या भाषेत स्पष्ट केल्या. समाजातील सर्व स्तरांतील महिलांमध्ये कायदेविषयक जागरूकता निर्माण झाल्यास संरक्षण यंत्रणांना त्यांना मदत करणे अधिक सोपे होईल, असेही त्यांनी नमूद केले.

कार्यक्रमात विद्यार्थिनींना प्रेरणा देण्यासाठी त्यांनी कांतीज्योती सावित्रीबाई फुले यांना समर्पित “पंख माया मुक्तीचे सावित्रीबाई फुले” ही कविता सादर केली.
कार्यक्रमाला तंत्रनिकेतन महाविद्यालयाच्या विद्यार्थिनी मोठ्या संख्येने उपस्थित होत्या.
कार्यक्रमाचे नियोजन तालुका विधी सेवा समितीचे कनिष्ठ लिपिक श्री. जुगधर तसेच शिपाई श्री. मरके व श्री. इंगळे यांनी केले.