क्रिकेट इतिहासातील सर्वात प्रसिद्ध आणि आदरणीय अंपायर डिकी बर्ड (Dickie Bird) यांचे वयाच्या 92 व्या वर्षी निधन झाले. इंग्लंडच्या यॉर्कशर क्लबकडून त्यांच्या निधनाची अधिकृत माहिती देण्यात आली. इंग्लंड अँड वेल्स क्रिकेट बोर्डाने (ECB) देखील श्रद्धांजली अर्पण करत म्हटले की, “डिकी बर्ड हे केवळ यॉर्कशरचे अभिमान नव्हते, तर संपूर्ण जगातील क्रिकेटप्रेमींचे लाडके अंपायर होते.”

डिकी बर्ड यांनी आपल्या कारकिर्दीत 150 हून अधिक आंतरराष्ट्रीय सामन्यांमध्ये अंपायरिंग केली. 1975, 1979 आणि 1983 या सलग तीन वर्ल्ड कप अंतिम सामन्यांमध्ये अंपायरिंग करणारे ते जगातील पहिले अंपायर होते. विशेष म्हणजे, 1983 च्या अंतिम सामन्यात भारताने वेस्ट इंडिजचा पराभव करून पहिल्यांदा वर्ल्ड कप जिंकला होता. मोहिंदर अमरनाथच्या निर्णायक एलबीडब्लू निर्णयावेळी डिकी बर्ड यांनी हात वर करत “आऊट” दिला आणि त्याच क्षणी भारतीय क्रिकेटचा सुवर्णअध्याय लिहिला गेला.

1933 मध्ये इंग्लंडच्या बार्न्सले येथे जन्मलेले बर्ड सुरुवातीला फर्स्ट क्लास क्रिकेटपटू होते. मात्र फलंदाज म्हणून फारसं यश न मिळाल्याने त्यांनी 32 व्या वर्षी खेळाला अलविदा करून अंपायरिंगकडे वळण्याचा निर्णय घेतला. 1970 मध्ये काउंटी चॅम्पियनशिपमधून त्यांनी अंपायरिंगची सुरुवात केली आणि 1973 मध्ये इंग्लंड–न्यूझीलंड कसोटीमधून आंतरराष्ट्रीय अंपायरिंगमध्ये पदार्पण केले.

पुढील दोन दशकांत डिकी बर्ड जगातील सर्वाधिक लोकप्रिय आणि आदरणीय अंपायर म्हणून ओळखले गेले. एकूण 66 कसोटी आणि 69 एकदिवसीय सामने त्यांनी निर्णयक्षमतेने पार पाडले. 1996 मध्ये भारताविरुद्धच्या टेस्ट सामन्यात त्यांनी अखेरचा आंतरराष्ट्रीय सामना अंपायर केला. याच सामन्यात सौरव गांगुली आणि राहुल द्रविड यांनी कसोटी पदार्पण केले होते. सामन्यानंतर दोन्ही संघांनी त्यांना गार्ड ऑफ ऑनर देत सन्मानित केले होते.

डिकी बर्ड यांच्या निधनामुळे क्रिकेट विश्वाने एक साधा, अचूक आणि खेळाडूंच्या मनात कायम घर करून राहिलेला अंपायर गमावला आहे. अंपायरिंगची व्यावसायिक प्रतिष्ठा वाढविण्यात त्यांचे योगदान अनमोल राहील.