बातम्या

मुंबई :राज्यात पुन्हा एकदा भाषेचा वाद पेटला आहे. काही दिवसांपूर्वी एका कार्यक्रमात झालेल्या वक्तव्यानं मराठी भाषेच्या अस्मितेला धक्का लागल्याचा आरोप करत, राजकीय वातावरण चांगलंच तापलं आहे. या वादाच्या पार्श्वभूमीवर आता ठाकरे बंधूंनी मोर्चा काढण्याची घोषणा केली आहे. हा मोर्चा येत्या २ जुलैला मुंबईत काढण्यात येणार असून, “मराठीचा अभिमान आणि अधिकार अबाधित ठेवण्यासाठी” या मोर्चाचं आयोजन करण्यात आल्याचं त्यांनी जाहीर केलं. उद्धव ठाकरे यांनी स्पष्ट शब्दात सांगितलं, “मराठी भाषेवर कोणत्याही प्रकारचा आघात सहन केला जाणार नाही. ही फक्त भाषा नाही, ती आमची ओळख आहे. सरकारनं या प्रकाराची गंभीर दखल घ्यावी, अन्यथा आम्हाला रस्त्यावर उतरावं लागेल.” दुसरीकडे, राज ठाकरे यांनीही मराठी जनतेला एकत्र येण्याचं आवाहन केलं आहे. “भाषा हा भावनांचा विषय आहे. राजकारणाचा नाही. पण जर मराठीचा अवमान केला जात असेल, तर आम्ही गप्प बसणार नाही,” असं ते म्हणाले. दरम्यान, सरकारकडून या विषयावर अजून कोणतीही ठोस प्रतिक्रिया आलेली नाही. मात्र, आगामी मोर्च्यामुळे मुंबईतील वातावरण अधिक तापण्याची शक्यता आहे.