चिपळूण | योगेश बांडागळे (प्रतिनिधी):

चिपळूणमध्ये माजी नगरसेवक परिमल भोसले यांनी आपल्या सहकाऱ्यांसह शिवसेनेत प्रवेश केला. राधाताई लाड सभागृहात झालेल्या पक्षप्रवेश सोहळ्यात आमदार निलेश राणे यांनी विकासाच्या राजकारणाला प्राधान्य देणार असल्याचे स्पष्ट केले.

“लोकांना राजकारणाशी काही देणंघेणं नाही, त्यांना विकास हवा आहे. कुडाळ मतदारसंघासोबतच चिपळूणमधील विकासकामांचाही नियमित फॉलोअप घेणार,” अशी ग्वाही त्यांनी दिली. मुख्यमंत्री एकनाथ शिंदे दिवसाचे १६ तास काम करतात तसेच पालकमंत्री उदय सामंत यांचे सातत्याने सहकार्य लाभत असल्याचेही त्यांनी नमूद केले.

या कार्यक्रमास माजी आमदार सदानंद चव्हाण, शिवसेना महिला आघाडी प्रमुख रश्मी गोखले, जिल्हा परिषद सदस्य विनोद झगडे, नगराध्यक्ष उमेश सकपाळ, तालुकाप्रमुख बापू आयरे, बांधकाम सभापती कपिल शिर्के, गटनेते अंकुश आवले, पाणी समिती सभापती निहार कोवळे, माजी नगरसेवक करामत मिठागरी, शिक्षण व क्रीडा समिती सभापती हर्षाली पवार, नीलम जाधव, राणी महाडिक, रुपेश घाग, दिलीप चव्हाण आदी मान्यवर उपस्थित होते. कार्यक्रमाचे सूत्रसंचालन शाहीर शाहीद खेरटकर यांनी केले.

परिमल भोसले हे धडाडीचे कार्यकर्ते असून त्यांना पक्षात सन्मानाने स्थान द्यावे, असे आवाहन आमदार राणे यांनी केले. तसेच पाग पॉवर हाऊस परिसरात उड्डाणपुलासाठी २०२५-२६ च्या अर्थसंकल्पात निधी मंजूर झाल्याची माहितीही त्यांनी दिली.

या पक्षप्रवेशामुळे चिपळूणमधील स्थानिक राजकारणात नवी समीकरणे निर्माण होण्याची चर्चा सुरू झाली आहे.