संगमेश्वर (प्रतिनिधी) : देवरुख पोलीस ठाण्याच्या हद्दीत शुक्रवारी अवैध दारू विक्री व सार्वजनिक ठिकाणी दारू पिणाऱ्यांविरोधात पोलिसांनी दोन स्वतंत्र कारवाया केल्या.

पहाटे सुमारे १:३० वाजता कांजिवरा ते रत्नागिरी रोडवरील ओजी बिअरशॉपीसमोर सिमेंटच्या बाकावर बसून विनापरवाना बिअर पिणाऱ्या दोन तरुणांना पोलिसांनी ताब्यात घेतले. अभिजीत अनंत जाधव (वय ३०) व नईम मुनवर पटेल (वय २४) अशी त्यांची नावे असून, त्यांच्यावर महाराष्ट्र दारूबंदी कायद्याच्या कलम ८४ अन्वये गुन्हा दाखल करण्यात आला आहे.

तसेच १७ एप्रिल रोजी सायंकाळी ७:०५ वाजता देवरुख खालची आळी येथील मच्छीमार्केटच्या पाठीमागे, गणेश घाटाजवळील नदीकिनारी पोलिसांनी हातभट्टीवर कारवाई केली. यावेळी निलेश बाळकृष्ण निवळकर (वय ३९) हा गावठी हातभट्टीची दारू विक्रीसाठी बाळगून असल्याचे आढळले. पोलिसांनी त्याच्याकडून ८ लिटर गावठी दारू व अन्य साहित्य असा एकूण ८७० रुपयांचा मुद्देमाल जप्त केला. याप्रकरणी गुन्हा क्रमांक ४९/२०२६ नोंदविण्यात आला आहे.

या कारवायांमुळे परिसरात खळबळ उडाली असून, अवैध धंद्यांविरोधात पोलिसांची कारवाई सुरूच राहणार असल्याचे सांगण्यात आले.